Ephesô 2 - Sră Goh 2018

Geh dong klàs bơh bơta nđàc

¹ Oh mi neh chơt tòm bơta tìs glài mơ tồi glài oh mi dê,

² la ală bơta lài òr oh mi lơh jat bơta òs mòng dunnia do, jat bơtau gơnoar at bồ dê tòm pah gòi, hơ̆ la cà tŭ do at bồ tòm ală cau ò dòn bơr Yàng.

³ Lài òr bol he jơh tơl nă kung lơh lòt bal mơ bol khai, kis tòm bơta hàm kòñ is poac să dê, lơh ală bơta poac să mơ nùs kơlôi kòñ, ngan la cau rơp kong bơta gơjrañ dờng Yàng dê, kung be cau ndai.

⁴ Mơya Yàng Tom Trồ la Bơtau gơs bềng lìu bơta kòñ sơngit, bơh bơta kòñ gơboh dờng Kơnràñ dê mơ Kơnràñ neh kòñ gơboh di bol he,

⁵ tian gơs tòm tŭ he chơt tòm ală bơta tìs glài he dê, gen Kơnràñ neh lơh bol he in kis bal mơ Bơtau Krist hơ̆ la kơnòm di bơta nđàc mơ oh mi geh dong klàs.

⁶ Yàng Tom Trồ neh lơh bol he in kis wơl bal mơ Yàng Krist Jesu, mơ nggui bal mơ Kơnràñ hơđang trồ,

⁷ tồ tòm ală rài tơnơ̆, Kơnràñ rgơi yal tơlik bơta nđàc dờng ơnàng ò git lơh Kơnràñ dê tòm bơta kơ̆ dơn gơwèt mơ bol he tòm Yàng Krist Jesu.

⁸ Oh mi geh dong klàs kơnòm di bơta nđàc mơ bơh bơta dòn, bơta hơ̆ ò di bơh oh mi ò, mơya la bơta ai gòi Yàng Tom Trồ dê;

⁹ kung ò di bơh broă lơh ò, tồ ò gơs cau lơi jòng să.

¹⁰ Bơh bol he la broă lơh Kơnràñ dê, neh geh Kơnràñ crơng gơs tòm Yàng Krist Jesu nàng lơh broă niam, mơ Yàng Tom Trồ neh rcang lài nàng bol he in lơh jat.

Dô bă bal tòm Bơtau Krist

¹¹ Behơ̆, kah wơl tĕ lah lài òr jat poac să oh mi la cau làng bol bơdìh, gơtìp cau kong siat gơltau tòm poac să bơh tê cau lơh, bol khai sơnđan oh mi la cau ò kong siat gơltau;

¹² tŭ hơ̆ oh mi ơm ngài mơ Bơtau Krist, ơm bơdìh làng bol Israel, mơ be cau nac crih gơwèt hơ bơta ho bal jơnau ho pơgon dê. Tòm dunnia oh mi ò gơs bơta gơn kơnòm, mơ ò gơs Yàng Tom Trồ.

¹³ Bulah oh mi bơh lài òr la cau ơm ngài, mơya tŭ do tòm Yàng Krist Jesu oh mi neh geh cèng tus rềp, kơnòm di mhàm Bơtau Krist dê.

¹⁴ Bơh Kơnràñ la bơta ring lơngai bol he dê, neh lơh cau Juda mơ cau làng bol bơdìh in gơs dô bă bal, lơh tơrlah dơrñang cah is tòmsò digùl bol he.

¹⁵ Bơh kơnòm di poac să Kơnràñ dê mơ Kơnràñ neh tơnroh bơta boh lam bal mơ bơta sồr lam mơ gơnoar sồr gơ dê, nàng ai bàr đah mơ crơng gơs dô nă cau pa tòm să tòm Kơnràñ, tồ lơh gơtòmsòr bal.

¹⁶ Bơh chi pơng mơ Kơnràñ lơh bàr đah in gơtòmsòr wơl mơ Yàng Tom Trồ tòm dô nơm să jan, bơh bơta hơ̆ Kơnràñ neh tơnroh bơta tòmsò rau.

¹⁷ Bơtau Krist neh tus nàng bơto yal Jơnau Niam bơh bơta ring lơngai cau làng bol bơdìh in, la cau ơm ngài bơh Yàng Tom Trồ, mơ cau Juda in la cau ơm rềp mơ Kơnràñ.

¹⁸ Bơh kơnòm di Kơnràñ mơ bol he jơh bàr đah tòm dô nă Yàng Hwềng mơ geh mut di đap Yàng Bèp.

¹⁹ Behơ̆ oh mi ò di la cau nac crih hala cau ơm ing tai, mơya la cau làng tòm bal mơ ală cau sàng goh mơ la cau tòm hìu nhă Yàng Tom Trồ dê.

²⁰ Oh mi kung geh bơt bơtào hơđang mơnàng ală cau gơnoar bơto dờng mơ ală cau gơnoar hwơr dê, să tòm Yàng Krist Jesu la lŭ mum hìu.

²¹ Jơh dô nơm hìu hơ̆ tơrbŏ bal tòm Kơnràñ, rhòi dờng gơlik Hìu Duh Khoai Sàng Goh Yàng dê.

²² Tòm Kơnràñ oh mi kung geh bơt bơtào bal tòm hìu hơ̆ nàng lơh gơs tiah ơm Yàng Tom Trồ dê tòm Yàng Hwềng.