Ejra 8 - Sră Goh 2018

Sơnđan mat ală cau at bồ hìu nhă rê wơl bal mơ Ejra

¹ Do la ală cau at bồ hìu nhă mơ ală cau geh cih sơnđan bal mơ bol khai la ală cau guh bal mơ añ bơh di Babilôn tòm rài at bồ bơtau Artaserses dê:

² bơh di ală kòn sau Phineas gơs Gersôm; bơh di kòn sau mpồl Ithamar gơs Daniel; bơh di kòn sau Dabit gơs Hattus;

³ bơh di kòn sau Sekania; bơh di kòn sau Parôs gơs Sacari, bal mơ khai gơs cih sơnđan mat bàr rhiang pram jơt nă cau klau;

⁴ Bơh di kòn klau mpồl Pahat Môap dê gơs Eliôenai kòn Jerahiah, bal mơ khai gơs bàr rhiang nă cau klau;

⁵ bơh di kòn sau Jattu gơs Sekeniah kòn klau Jahajiel, bal mơ khai gơs pe rhiang nă cau klau;

⁶ bơh di kòn sau Adin gơs Ebet kòn klau Jônathan, bal mơ khai gơs pram jơt nă cau klau;

⁷ bơh di kòn sau Elam gơs Jesayah kòn klau Athalia, bal mơ khai gơs poh jơt nă cau klau;

⁸ bơh di kòn sau Sephatiah gơs Jebadia kòn klau Mikael, bal mơ khai gơs phàm jơt nă cau klau;

⁹ bơh di kòn sau Jôap gơs Ôbadia kòn klau Jehiel, bal mơ khai gơs bàr rhiang jơt phàm nă cau klau;

¹⁰ bơh di kòn sau Bani gơs Selômit kòn klau Jôsiphia, bal mơ khai gơs dô rhiang prau jơt nă cau klau;

¹¹ bơh di kòn sau Bebai gơs Sacari kòn klau Bebai, bal mơ khai gơs bàr jơt phàm nă cau klau;

¹² Bơh di kòn sau Asgat gơs Jôhanan kòn klau Hakkatan, bal mơ khai gơs dô rhiang jơt nă cau klau;

¹³ Bơh di kòn sau Adônikam, ală cau lồi dut, sơnđan mat bol khai la Eliphelet, Jeuel mơ Semayah, bal mơ bol khai gơs prau jơt nă cau klau;

¹⁴ Bơh di kòn sau Bikbai gơs Utai mơ Jakkur, bal mơ bol khai gơs poh jơt nă cau klau.

Bơta rê wơl hơ Jerusalem

¹⁵ Añ pơjum tơrgòm bol khai di gah hiòng hòr tus hơ Ahaba, mơ bol hi lơh sàl tềng hơ̆ tòm pe ngai. Tòm tŭ añ sền sơwì làng bol mơ ală cau gơnoar ơn phan duh khoai, gen añ gŏ ò gơs dô nă kòn sau cau Lebi lơi tềng hơ̆.

¹⁶ Behơ̆ añ hòi Eliejer, Ariel, Semayah, Elnathan, Jarip, Elnathan, Nathan Sacari mơ Mesullam la ală cau jak chài,

¹⁷ mơ añ sồr bol khai lòt tus hơ Idô la cau at bồ tòm tiah sơnđan Kasipha, sồr bol khai mbe pal đơs mơ Idô bal mơ ală gơp bơtiàn khai dê la ală cau duh broă tòm hìu duh khoai tòm Kasipha, tồ bol khai lam ală cau duh broă tòm hìu Yàng Tom Trồ bol he dê tus mơ bol he.

¹⁸ Bơh di tŭ tê bơta nđàc Yàng Tom Trồ bol he dê ơm hơđang bol he, bol khai cèng bol he in dô nă cau geh khat gơboh tòm kòn sau Mahli, kòn klau Lebi, sau Israel; hơ̆ la Serebia, bal mơ ală kòn klau mơ oh mi jơt phàm nă;

¹⁹ kung gơs Hasabia bal mơ khai gơs Jesayah la kòn sau Merari dê, bal mơ ală oh mi khai dê mơ ală kòn klau bol khai dê, gơs bàr jơt nă.

²⁰ Rlau mơ bàr rhiang bàr jơt nă cau duh broă tòm hìu duh khoai, hơ̆ la ală cau mơ Dabit mơ ală cau kwang at bồ neh bơtào nàng dong kòl ală cau Lebi. Jơh ală cau hơ̆ geh cih sơnđan.

²¹ Gen añ yal tơnggit dô bơta ơt sa tềng hơ̆, di gah hiòng Ahaba, mơ tơnliah să bol hi di đap Yàng Tom Trồ bol hi dê, mơ jòi jat Kơnràñ ai bol hi in bơta ring lơngai tòm gùng lòt bol hi dê, kòn sau bol hi dê mơ ală phan mơna bol hi dê.

²² Bơh añ ƀàssìl nàng dan bơtau ai dô mpồl ling bal mơ ală cau ling hào ơseh nàng sền gàr bol hi klàs bơh di ală cau sò tơm tòm gùng bol hi dê, bơh di tŭ bol hi neh đơs mơ cau bơtau lah: “Tê Yàng Tom Trồ bol hi dê kòñ nđàc jơh ală cau jòi Kơnràñ, mơya gơnoar pràn mơ bơta gơjrañ Kơnràñ dê tòmdră mơ jơh ală cau sang lòi Kơnràñ.”

²³ Behơ̆ bol hi ơt sa mơ hòi dan mơ Yàng Tom Trồ bol hi dê bơh bơta hơ̆, mơ Kơnràñ iat jơnau hòi dan bol hi dê.

²⁴ Gen añ neh ơn is jơt bàr nă cau gơnoar lam bồ ơn phan duh khoai, bal mơ Serebia, Hasabia mơ jơt nă ală oh mi bol khai dê.

²⁵ Mơ añ neh kơr bol khai in ală phan ơn mơ priă mơ màh, mơ ală phan ngui mơ cau bơtau, ală cau bơyai broă mơ ală cau kwang duh broă bơtau dê, bal mơ jơh Israel gơs mat tềng hơ̆ neh ơn hìu Yàng Tom Trồ bol he in.

²⁶ Añ kơr mơ jào bol khai in prau rhiang pram jơt talơng priă, dô rhiang talơng ală phan ngui lơh mơ priă, dô rhiang talơng màh,

²⁷ bàr jơt nơm mơngàn màh màng dô rbô darik mơ bàr nơm phan ngui lơh mơ kòng niam màng be màh.

²⁸ Añ neh đơs mơ bol khai lah: “Bol mê la sàng goh Yàng Jehôwa in, bal mơ ală phan ngui la sàng goh; mơ priă mơ màh la phan jat nùs kòñ ơn Yàng Jehôwa in la Yàng Tom Trồ ồng pàng bol mê dê.

²⁹ Sền gàr gơ mơ prap gơ jơl tus di tŭ bol mê kơr gơ di đap cau gơnoar lam bồ ơn phan duh khoai mơ ală cau Lebi mơ ală cau at bồ ală hìu nhă tòm Israel, tòm Jerusalem, tòm dơlam ơdŭ hìu Yàng Jehôwa dê.”

³⁰ Behơ̆ ală cau gơnoar ơn phan duh khoai mơ ală cau Lebi ai priă, màh mơ ală phan ngui mơ bol khai neh kơr, mơ cèng tus hơ Jerusalem, hơ hìu Yàng Tom Trồ bol he dê.

³¹ Gen bol hi lòt bơh hiòng Ahaba tòm ngai jơt bàr kơnhai dùl nàng lòt hơ Jerusalem. Tê Yàng Tom Trồ bol hi dê ơm hơđang bol hi, mơ Kơnràñ sền gàr bol hi klàs bơh di ală cau sò tơm ơm kơp òm rò gùng.

³² Bol hi tus tòm Jerusalem mơ ơm tềng hơ̆ tòm pe ngai.

³³ Tòm ngai poan tòm hìu Yàng Tom Trồ bol hi dê, priă, màh, mơ ală phan ngui neh kơr ơn tòm tê cau gơnoar ơn phan duh khoai Meremôt kòn klau Uria, bal mơ khai la Eleajar kòn klau Phineas, lòt bal mơ bol khai kung gơs ală cau Lebi la Jôsaƀat kòn klau Jesua mơ Nôadia kòn klau Binnui.

³⁴ Jơh ală phan geh kòp khà mơ kơr, mơ kơnjơ̆ kàr lơi neh geh cih kah rau.

³⁵ Tŭ hơ̆ ală cau neh rê wơl bơh di tiah kong kup cèng ơn phan ơn chu pơrguc Yàng Tom Trồ Israel in: Jơt bàr nơm kơnrồ dam bơh jơh làng bol Israel in, sin jơt prau nơm belàt dam, poh jơt nơm belàt kòn, mơ jơt bàr nơm be dam lơh gơs phan ơn tơwài glài. Jơh ală phan ơn hơ̆ la phan ơn chu pơrguc Yàng Jehôwa in.

³⁶ Bol khai kung jào sră cih jơnau gơnoar sồr cau bơtau dê ală cau bơtau oh bal mơ ală cau kwang at bồ kơnhwàl Đah Ne Hiòng in, gen bol khai dong kòl làng bol mơ hìu Yàng Tom Trồ dê.