Ejra 6 - Sră Goh 2018

Jơnau gơnoar sồr Darius dê

¹ Gen bơtau Darius tơlik dô gơnoar sồr, mơ sồr cau jòi sơwì tòm ală sră pơàr neh prap lòi tòm Babilôn.

² Mơya tòm Ekbatana, ƀòn dờng tòm kơnhwàl lơgar Medi dê, gơs dô nơm sră pồt neh bàn tềng hơ̆ mơ tòm hơ̆ gơs jơnau cih be do: “Dô jơnau cih kah:

³ Tòm nam sơnròp bơtau Sirus dê, bơtau yal tơlik dô bơta lơh nền gơwèt hơ hìu duh khoai Yàng Tom Trồ dê tòm Jerusalem: Lòi tĕ hìu duh khoai geh bơt bơtào wơl, tềng hơ̆ lơh gơs tiah ơn ală phan ơn duh khoai, mơ ơn phan ơn chu pơrguc, đah jơnhoa rơp la prau jơt tal mơ ơnàng prau jơt tal,

⁴ gơs pe sèng lŭ dờng mơ dô sèng mpàn, lòi tĕ khà jền priă tơm rơp geh tă bơh tòm đam jàr bơtau dê

⁵ Rlau mơ hơ̆, ală phan lơh mơ màh mơ priă ngui tòm hìu Yàng Tom Trồ dê mơ Nebukatnessar neh ai bơh di hìu duh khoai tòm Jerusalem mơ neh cèng tus hơ Babilôn, gen kung pal ơn wơl tòm tiah gơ dê tòm hìu duh khoai tòm Jerusalem; mê pal ơn ală phan hơ̆ wơl tòm hìu Yàng Tom Trồ dê.

Bơtau Darius sồr broă lơh pal geh pơnjat

⁶ Tŭ do, ơ Tattenai cau kwang at bồ kơnhwàl Đah Ne Hiòng, mơ Sethar Bôjenai mơ ală cau tòm mpồl jơnum bal mơ mê, lơh broă bal tòm kơnhwàl hơ̆, ơm tĕ ngài bơh tềng hơ̆.

⁷ Bañ kơryan broă lơh hìu duh khoai Yàng Tom Trồ. Lòi tĕ cau kwang at bồ ală cau Juda mơ ală cau kwang kra bol khai dê bơt bơtào wơl hìu Yàng Tom Trồ dê hơđang tiah yau gơ dê.

⁸ Rlau mơ hơ̆, añ ai jơnau gơnoar sồr do bol mê in bơh bơta bol mê pal lơh mơ ală cau kwang kra làng bol Juda dê tòm broă bơt bơtào hìu Yàng Tom Trồ dê: ngui tĕ bơh tòm đam jàr bơtau dê jền priă boh dia kơnhwàl Đah Ne Hiòng dê nàng tơm wil tơl ală cau hơ̆ in tồ broă lơh rơp ò dơh wơl.

⁹ Ală phan lơi pal càng be ală kơnrồ dam, belàt dam nàng lơh gơs phan ơn duh khoai chu pơrguc Yàng Tom Trồ hơđang trồ in; kòi mi, boh, tơrnòm mơ mơñà jat be bơta pal gơs ală cau gơnoar ơn phan duh khoai in tòm Jerusalem, jơh ală bơta hơ̆ pal ai bol khai in kòp ngai bañ siơ̆u,

¹⁰ tồ bol khai rgơi ơn phan duh khoai niam nùs Yàng hơđang trồ, mơ hòi dan bơta lơngai cau bơtau bal mơ ală kòn cau bơtau in.

¹¹ Rlau mơ hơ̆ tai, añ ai jơnau gơnoar sồr lah dilah cau lơi tòmgơl ală jơnau sồr do gen pal tă tĕ dô nơm ròc bơh di hìu khai, sơntơp ròc hơ̆ mơ yồng khai hơđang; mơ hìu khai pal lơh gơlik gơs dô gơnru sù siă.

¹² Dan Yàng Tom Trồ, la Bơtau neh bơtào sơnđan Kơnràñ dê tềng hơ̆, tă sang cau bơtau lơi hala làng bol lơi rơp pò tê tòmgơl jơnau gơnoar sồr do hala tơnroh hìu duh khoai do tòm Jerusalem. Añ la Darius ai jơnau gơnoar sồr do, lơh jat tĕ dô bă ngac ngar.”

Bơt sir mơ ơn hìu duh khoai pa Yàng in

¹³ Gen, jat be jơnau gơnoar sồr bơtau Darius neh pơyoa, gen Tattenai cau kwang at bồ kơnhwàl Đah Ne Hiòng, Sethar Bôjenai, mơ ală cau tòm mpồl mơ bol khai lơh jat dô bă kràñ cê ngan jat be jơnau bơtau Darius neh sồr.

¹⁴ Behơ̆, ală cau kwang kra cau Juda dê kư̆ pơnjat bơt bơtào mơ gơlik cồng nha tòm toh jat be jơnau bơto Age cau gơnoar hwơr mơ Sacari kòn sau Idô dê. Bol khai bơt sir hìu duh khoai jat be gơnoar sồr Yàng Tom Trồ Israel dê, mơ jat be jơnau sồr Sirus, Darius, mơ Artaserses la ală bơtau Persia dê.

¹⁵ Hìu duh khoai neh geh bơt sir tòm ngai pe kơnhai Adar, nam dơ̆ prau rài at bồ bơtau Darius dê.

¹⁶ Gen làng bol Israel, ală cau gơnoar ơn phan duh khoai, ală cau Lebi, mơ jơh ală cau neh rê wơl bơh di tiah neh kong kup cèng lơh dĭ, bol khai pơjum sa ngai ơn hìu Yàng Tom Trồ in dô bă chò hòp ngan.

¹⁷ Tòm bơta ơn hìu do Yàng Tom Trồ in, bol khai ơn dô rhiang nơm kơnrồ dam, bàr rhiang nơm belàt dam, poan rhiang nơm belàt kòn, mơ jat be khà jơi bơtiàn Israel dê, bol khai ơn jơt bàr nơm be dam lơh gơs phan ơn duh khoai tơwài glài jơh Israel in, jat be khà jơi bơtiàn Israel dê.

¹⁸ Mơ bol khai jào ală cau gơnoar ơn phan duh khoai jat mpồl bol khai dê mơ ală cau Lebi in jat tap sèng ală mpồl bol khai dê nàng duh broă Yàng Tom Trồ tòm Jerusalem, jat be neh cih tòm sră Môise dê.

Pơjum sa ngai wèr Lòt Gan

¹⁹ Tòm ngai dơ̆ jơt poan kơnhai dùl, ală cau rê bơh di tiah kong kup cèng lơh dĭ pơjum sa ngai wèr Lòt Gan.

²⁰ Ală cau gơnoar ơn phan duh khoai mơ ală cau Lebi neh lơh goh să tòm bol khai dê mơ jơh tơl nă bol khai neh gơs goh. Behơ̆ bol khai hàl belàt kòn ngai wèr Lòt Gan, ală cau neh rê bơh di tiah kong kup cèng in ơn, bơh ală oh mi bol khai la cau ơn phan duh khoai, mơ ơn bơh să tòm bol khai in.

²¹ Behơ̆ ală cau Israel neh rê wơl bơh di tiah kong kup cèng lơh dĭ neh sa gơ, bal mơ jơh ală cau neh cah is bol khai bơh di ală bơta òs mòng ƀơ̆ ƀơl ală làng bol bơdìh ơm tòm lơgar nàng duh khoai Yàng Jehôwa la Yàng Tom Trồ Israel dê.

²² Bol khai ñô sa chò hòp bơta pơjum sa piang lă ò gơs kañ tòm poh ngai, tài bơh Yàng Jehôwa neh lơh bol khai in bềng lìu bơta hòn chò, mơ neh tơrwơl nùs Asiri dê hơ bol khai, tian gơs khai dong kòl bol khai tòm broă bơt bơtào hìu Yàng Tom Trồ la Yàng Tom Trồ Israel dê.