Ejra 5 - Sră Goh 2018

Tattenai pơyoa sră Darius in

¹ Tŭ hơ̆ cau gơnoar hwơr Age mơ cau gơnoar hwơr Sacari, kòn klau Idô, đơs hwơr bơh ală cau Juda ơm tòm Juda mơ tòm Jerusalem, ai sơnđan Yàng Tom Trồ Israel dê la Bơtau ơm at bồ bol khai.

² Gen Jerubabel kòn klau Sealthiel mơ Jesua kòn klau Jôjadak lik lòt nàng bơt wơl hìu Yàng Tom Trồ dê tòm Jerusalem; bal mơ bol khai gơs ală cau gơnoar hwơr Yàng Tom Trồ dê dong kòl bol khai.

³ Tòm tŭ hơ̆ Tattenai, cau kwang at bồ kơnhwàl Đah Ne Hiòng, mơ Sethar Bôjenai bal mơ ală cau tòm mpồl jơnum bol khai dê neh tus hơ bol khai mơ đơs be do: “Ñcau ai gơnoar bol mê in bơt wơl hìu duh khoai do mơ neh sir crap ală pơnah bơtào wơl taih?”

⁴ Bol khai kung lùp tai lah: “Ñchi sơnđan ală cau bơt bơtào hìu do taih?”

⁵ Mơya mat Yàng Tom Trồ bol khai dê sền gàr ală cau kwang kra cau Juda dê, mơ bol khai ò rgơi dơh wơl jơl tus di tŭ gơs sră yal broă tus bơh Darius mơ geh jơnau ho wơl bơh sră pơyoa bơh bơta hơ̆.

⁶ Sră cih wơl jat sră pơyoa mơ Tattenai cau kwang at bồ kơnhwàl Đah Ne Hiòng, mơ Sethar Bôjenai mơ ală cau tòm mpồl jơnum bol khai dê, hơ̆ la ală cau kwang at bồ kơnhwàl đah ne Ơphrat neh pơyoa bơtau Darius in.

⁷ Sră yal broă bol khai pơyoa cau bơtau in gơs cih be do: “Pơyoa Bơtau Darius: Dan bơtau in geh ring lơngai!

⁸ Dan yal bơtau in git lah bol hi neh lòt tus hơ kơnhwàl Juda, tus hơ hìu Yàng Tom Trồ dờng. Làng bol ơm bơt wơl hìu hơ̆ mơ lŭ dờng, mơ ală chi mpàn neh pơng tòm ală dơrñang rau. Broă lơh do neh lơh sir dô bă ngac ngar ngan mơ ntoat tơngguh tòm tê bol khai dê.

⁹ Gen bol hi đơs mơ ală cau kwang kra mơ lùp bol khai lah: ‘Ñcau neh ai gơnoar bol mê in bơt wơl hìu duh khoai do mơ bơtào wơl ală dơrñang do taih?’

¹⁰ Bol hi kung neh lùp sơnđan bol khai nàng bol hi rgơi cih bơtau in git sơnđan ală cau lam bồ bol khai dê.

¹¹ Do la jơnau bol khai ho wơl bol hi in: ‘Bol hi la ală cau duh broă Yàng Tom Trồ, hơđang trồ mơ tiah dê, mơ bol hi ơm bơt wơl hìu duh khoai neh geh bơt jŏ sơnam lài òr, la hìu duh khoai mơ dô nă cau bơtau dờng Israel dê neh bơt bơtào mơ lơh sir.

¹² Mơya tài bơh ală ồng pàng bol hi dê neh lơh Yàng Tom Trồ ơm hơđang trồ in gơjrañ tian gơs Kơnràñ neh jào phi bol khai tòm tê Nebukatnessar cau Kalde, bơtau Babilôn, bơtau hơ̆ neh tơnroh hìu duh khoai do mơ kup cèng pơrdô làng bol tus hơ Babilôn.

¹³ Bulah behơ̆, bơtau Sirus, Babilôn dê, tòm nam sơnròp bơta at bồ bơtau Sirus dê, neh tơlik dô jơnau sồr bơh hìu duh khoai Yàng Tom Trồ dê pal geh bơt bơtào wơl.

¹⁴ Rlau mơ hơ̆ tai, màh mơ priă mơ ală phan ngui tòm hìu Yàng Tom Trồ dê, mơ bơtau Nebukatnessar neh tă bơh di hìu duh khoai tòm Jerusalem mơ cèng tus hơ tơmut tòm hìu bơmồng tòm Babilôn; ală phan ngui hơ̆ bơtau lơh mơ màh mơ priă la ală phan ngui gơrê bal mơ hìu Yàng Tom Trồ dê mơ Nebukatnessar neh ai bơh di hìu duh khoai tòm Jerusalem mơ cèng brê hơ hìu duh khoai tòm Babilôn. Gen bơtau Sirus neh jào ală phan hơ̆ dô nă cau in sơnđan la Sesbajar la cau mơ bơtau neh bơtào gơs kwang at bồ,

¹⁵ mơ đơs mơ khai lah: “Tă tĕ ală phan ngui do mơ cèng ơn wơl tòm hìu duh khoai tòm Jerusalem; mơ bơt bơtào wơl tĕ hìu Yàng Tom Trồ hơđang mơnàng yau gơ dê.”

¹⁶ Behơ̆ Sesbajar do neh lòt tus mơ bơt bơtào ală mơnàng hìu Yàng Tom Trồ dê tòm Jerusalem. Bơh ngai hơ̆ tus di tŭ do, cau ơm bơt bơtào hìu hơ̆ mơya òhềt bơt sir.’

¹⁷ Mơ tŭ do, dilah gơ niam nùs bơtau, dan sồr cau jòi sơwì tòm tiah prap ală sră pơàr bơtau dê tòm Babilôn nàng sền dilah ngan la bơtau Sirus neh ai gơnoar sồr cau bơt bơtào wơl hìu Yàng Tom Trồ dê tòm Jerusalem. Dan bơtau pơyoa bol hi in git bơta lơh nền bơtau dê gơwèt hơ broă do.”