Ejra 3 - Sră Goh 2018

Bơtào wơl bơta duh khoai

¹ Tòm tŭ tus kơnhai poh mơ làng bol Israel neh ơm nền tòm ală ƀòn, bol khai pơjum bal tòm Jerusalem.

² Gen Jesua kòn klau Jôjadak bal mơ ală cau gơnoar ơn phan duh khoai khai dê mơ Jerubabel kòn klau Sealthiel mơ ală oh mi khai dê lik nàng bơt cơnòng duh khoai Yàng Tom Trồ Israel dê, nàng ơn phan duh khoai chu pơrguc hơđang hơ̆, jat be neh cih tòm bơta boh lam Môise cau Yàng Tom Trồ dê.

³ Bol khai ơn cơnòng duh khoai hơđang mơnàng gơ dê, tài bơh bol khai rngòt di ală làng bol ơm gùt dar, mơ ơn ală phan ơn duh khoai chu pơrguc hơđang hơ̆ Yàng Jehôwa in, tòm àng drim mơ tòm mho.

⁴ Bol khai prap gàr ngai pơjum sa ngai wèr Sàl Ing, jat be bơta neh cih mơ ơn ală phan ơn duh khoai chu pơrguc jat khà pal ơn kòp ngai be neh geh lơh nền.

⁵ Tơnơ̆ mơ hơ̆, bol khai ơn ală phan ơn duh khoai chu pơrguc jat be òs, ală phan ơn duh khoai ngai wèr kơnhai dùl lik mơ ală phan ơn tòm jơh ală ngai wèr sàng goh neh lơh nền Yàng Jehôwa dê, bal mơ ală phan ơn duh khoai kòp nă cau jat nùs kòñ ơn Yàng Jehôwa in.

⁶ Bơh ngai dùl kơnhai dơ̆ poh, bol khai rơp sơntòm ơn phan ơn duh khoai chu pơrguc Yàng Jehôwa in. Mơya mơnàng hìu duh khoai Yàng Jehôwa dê òhềt geh bơt.

⁷ Gen bol khai ai jền priă ală cau chài bơt lŭ mơ ală cau chài lơh chi, mơ ai ală phan sa phan ñô, mơ mơñà làng bol Sidôn mơ Tirơ in nàng bol khai jat gùng dàlềng mơ cèng nho rề bơh Liban tus hơ Jôppa, jat gơnoar Sirus bơtau Persia neh ai bol khai in.

Bơt bơtào wơl hìu duh khoai

⁸ Tòm kơnhai dơ̆ bàr tơnơ̆ mơ tŭ bol khai tus hơ hìu duh khoai Yàng Tom Trồ dê tòm Jerusalem, tòm nam dơ̆ bàr gen Jerubabel kòn klau Sealthiel, mơ Jesua kòn klau Jôjadak, neh sơntòm bơt, bal mơ ală cau gam wơl tòm làng bol bol khai dê, ală cau gơnoar ơn phan duh khoai, ală cau Lebi bal mơ jơh ală cau neh rê wơl hơ Jerusalem bơh di tiah neh gơkòl kup cèng. Bol khai pồ bơtào ală cau Lebi gơs bàr jơt nam mơ rlau, tòm broă sền gàr tòm broă bơt bơtào hìu Yàng Jehôwa dê.

⁹ Jesua, ală kòn klau khai mơ ală oh mi khai dê, Katmiel mơ ală kòn klau khai, Binnui mơ Hôdabiah, bal mơ ală kòn klau Henadat mơ ală kòn klau mơ ală oh mi bol khai dê la ală cau Lebi dô bă bal at bồ ală cau lơh broă bơt hìu Yàng Tom Trồ dê.

¹⁰ Tòm tŭ ală cau chài bơt mơnàng hìu duh khoai Yàng Jehôwa dê, gen ală cau gơnoar ơn phan duh khoai soh ồi ào jrùh mơ ntào di tiah bol khai dê, mơ at kơlwòk, mơ ală cau Lebi ală kòn klau Asap tur cing mơ jòng ro Yàng Jehôwa jat be bơta lơh nền bơh Dabit bơtau Israel dê;

¹¹ Bol khai đơs chò tòmho bal jòng ro mơ ưnngài Yàng Jehôwa lah: “Bơh Kơnràñ la niam, bơta kòñ gơboh kơ̆ dơn Kơnràñ dê gam sùm sùm gơwèt mơ Israel.” Mơ jơh làng bol tòmho wơl mơ jơnau driau dờng jòng ro Yàng Jehôwa; tài bơh mơnàng hìu Yàng Jehôwa dê neh bơt bơtào.

¹² Mơya oă cau gơnoar ơn phan duh khoai, ală cau Lebi mơ ală cau at bồ ală hìu nhă, ală cau kra la ală cau neh gŏ hìu duh khoai yau, neh geh bơt hơđang mơnàng gơ dê; bol khai ñìm nggà dờng tòm tŭ bol khai neh gŏ hìu do, bulah behơ̆ oă jơnau driau dờng bơh bơta hòn chò ngan,

¹³ Gen tàng ò gơs cau lơi rgơi cah is digùl jơnau hòn chò mơ jơnau ñìm rac, tài bơh làng bol driau dờng nggồr nggàc, mơ cau kơno jơnau ntas hơ̆ ngài ngan.