Ejra 1 - Sră Goh 2018

Bơtau Sirus ai gơnoar làng bol Juda rê wơl hơ Jerusalem

¹ Tòm nam sơnròp rài Sirus bơtau Persia, nàng jơnau Yàng Jehôwa dê kơnòm bơh bơr Jeremi pal gơlik di ngan. Kơnràñ chồl nùs Sirus bơtau Persia, gen tàng khai tơlik dô gơnoar sồr tòm làm jơh lơgar khai dê, mơ kung cih jơnau yal tơnggit lah:

² “Do la jơnau đơs bơtau Sirus lơgar Persia dê: ‘Yàng Jehôwa la Yàng Tom Trồ ală tap trồ dê neh ai añ in jơh ală lơgar tòm plai ù, mơ Kơnràñ neh jào broă añ in nàng bơt dô nơm hìu duh khoai Kơnràñ in tòm Jerusalem lơgar Juda.

³ Dan Yàng Tom Trồ ơm bal mơ bol mê la làng bol Kơnràñ dê. Rê wơl tĕ hơ Jerusalem tòm Juda nàng bơt bơtào wơl hìu duh khoai Jehôwa Yàng Tom Trồ Israel dê, la Yàng Tom Trồ ơm tòm Jerusalem.

⁴ Mơ lòi tĕ jơh làng bol gam wơl tòm tiah lơi bol khai ơm, gen pal dong kòl ai bol khai in priă màh, bơh ală cau ơm bal mơ bol khai, bal mơ ală phan ngui sa mơ ală phan poan jơng, bal mơ ală phan ơn jat nùs bol khai kòñ ơn hìu duh khoai Yàng Tom Trồ in tòm Jerusalem.’”

⁵ Gen ală cau at bồ hìu nhă tòm Juda mơ tòm Benjamin, ală cau gơnoar ơn phan duh khoai mơ ală cau Lebi, jơh tơl nă geh Yàng Tom Trồ chồl nùs rcang sir nàng lòt tus bơt bơtào hìu Yàng Jehôwa dê tòm Jerusalem.

⁶ Jơh ală cau ơm rềp mơ bol khai dong ai bơtơl bol khai in ală phan ngui mơ priă mơ màh, ală phan mơna mơ phan poan jơng, mơ ală phan pà kas màng, bal mơ jơh ală phan ơn jat nùs kòñ.

⁷ Să tòm bơtau Sirus kung cèng tơlik ală phan ngui bơh di hìu duh khoai Yàng Jehôwa dê mơ Nebukatnessar neh tă cèng bơh Jerusalem mơ ơn tòm hìu duh khoai ală yàng khai dê.

⁸ Sirus bơtau Persia sồr Mitredat, cau kwang at bồ đam jàr cèng tus ală phan hơ̆, kòp khà bol gơ mơ jào Sesbajar in la cau kwang at bồ làng bol Juda dê.

⁹ Do la ntum khà ală phan hơ̆ dê: pe jơt nơm mơngàn màh, dô rbô nơm mơngàn priă, bàr jơt sin nơm pềs,

¹⁰ pe jơt nơm mơngàn màh, poan rhiang jơt nơm mơngàn priă dềt, mơ dô rbô nơm phan ngui ndai tai.

¹¹ Tơrgòm ală phan ngui mơ màh mơ priă la pram rbô poan rhiang nơm. Sesbajar cèng bal jơh ală phan do bơh Babilôn, tòm tŭ ală cau neh kong kup rê wơl tus hơ Jerusalem.