Đơs Chò 8 - Sră Goh 2018

¹ Ô! Kơp kòñ mê la bi añ jê, cau neh pô toh mè añ jê! Dilah añ tìp mê đah bơdìh, ngan añ rơp cum mê, ò gơs cau lơi geh sền òsơp di añ.

² Añ rơp lam mê mut tòm hìu mè añ; tềng hơ̆ mê rơp bơto sồr añ; añ rơp ai mê in ñô tơrnòm ƀô bơlhu, dà lơngồt plai lừu añ.

³ Tê kiau khai rơp ơn hơđơm bồ añ, ai tê ma khai koar di añ.

⁴ Ơ ală kòn ùr Jerusalem, añ jà bơklơn bol ai, bañ chồl bơtrut hala pơrlai bơta kòñ gơboh añ jê, jơl tus di tŭ gơ neh rcang sir.

⁵ Cau ùr do la ñcau, bơh ƀlàng bràs mơ guh, sơnđìng să di cau kòñ gơboh khai dê taih? Añ neh pơrlai mê di hơđơm chi sơrmoan, Tềng hơ̆ mè kong bòl glar nàng tơnggơs mê, tềng hơ̆ cau neh deh mê kong bòl glar.

⁶ Ơn tĕ añ be dô nơm ƀang kì di nùs mê, be dô nơm ƀang kì hơđang tơwòr tê mê; Bơh bơta kòñ gơboh pràn be bơta chơt, nùs ƀoah pơrñat iơh bơsak be lơgar làng ƀồc; Bơta duh gơ dê la bơta duh ồs dê, ngan dô nơm lơmpiat ồs Yàng Jehôwa dê.

⁷ Dà oă ò rgơi tơnchơt bơta kòñ gơboh, ală hiòng ò rgơi pơrdô tơnkram gơ; Dilah cau lơi cèng jơh phan mơna hìu he dê, nàng blơi bơta kòñ gơboh, ngan cau rơp sền òsơp khai ò git nđò.

⁸ Bol hi gơs dô nă cau oh ùr dềt, òhềt but toh. Pal lơh ñchi lơi oh ùr bol he in, tòm tŭ cau dan bau mơ khai taih?

⁹ Dilah khai la dô nơm dơrñang, bol hi rơp bơt bơtào cồng bồ gơlang mơ priă hơđang khai; Dilah khai la dô nơm mpồng, bol he rơp pơng kơ̆ wơl mơ mpàn chi ƀô bơlhu.

¹⁰ Añ la dô nơm dơrñang, bàr đah toh añ be ală cồng gơlang; Tŭ hơ̆ añ ơm di đap mat khai be cau neh geh lơngap lơngai.

¹¹ Salômôn gơs dô nơm suơn ño tòm Baal Hamon: Khai jào suơn hơ̆ cau in sền gàr, kòp nă cau hơ̆ pal cèng jào dô rbô pet priă bơh cồng nha gơ dê.

¹² Suơn ño di đap mat añ la suơn ño añ jê. Ơ Salômôn, dô rbô pet priă rơp gơrê bal mơ ồng, ai bàr rhiang gơrê bal mơ ală cau sền gàr plai đo.

¹³ Ơ cau ơm tòm suơn, ală bơyô neh ơn tồr iat sap ai dê! Dan ai añ in kơno sap khai!

¹⁴ Ơ cau kòñ gơboh añ, tus tĕ mhar, be dô nơm keh hala be dô nơm jùn kòn ơm hơđang ală mơnơm ƀô bơlhu.