Đơs Chò 7 - Sră Goh 2018

¹ Ơ kòn ùr bơtau, jơng ai jă khŏ, niam mơnĕ ò git nđò! Bơnô ai be lŭ kràng màng, phan niam rlau jơh bơh tê cau chài mòn.

² Klŏ ai be dô nơm mơngàn wil, ò tŭ lơi siơ̆u tơrnòm bơkah. Kơndul ai be dô gơnru kòi mi, gơs bơkào gun rơndap gùt dar.

³ Bàr nơm toh ai be dô yô kòn keh deh bàr.

⁴ Ngko ai be dô nơm gơlang mơ bla. Mat ai ò gơkrơi be ală tơnau tòm Hesbôn, ơm rềp di mpồng Batrabim; muh ai be dô nơm theng Liban dê, sền wèt hơ đah Damas.

⁵ Bồ hơđang să be mơnơm Karmel, mơ sŏ ai rah be dà gur; Dô nă cau bơtau gơkòl sŏ ai dê kơt rềt.

⁶ Ơ cau kòñ gơboh añ, ai niam nùs ngan, niam nùs ò git nđò, lơh cau in hòn chò hừh hơh!

⁷ Rùp să ai tòm toh be chi lơ-u, đơng di ală nha gơ; Dan bàr đah toh ai gơlơh be tơrkum plai lơ-u.

⁸ Añ đơs lah: Añ rơp hào hơđang chi lơ-u do, đơng di ală ntê gơ; Dan bàr đah toh ai dê be tơrkum plai ño, ƀô nhơm ai be plai klac.

⁹ Mơ bơr ai dê be tơrnòm bơkah. Hòr lik ƀuơn soh bơh sơndồi mơ sề.

¹⁰ Añ gơrê bal mơ cau kòñ gơboh añ, bơta kơp kòñ khai gơwèt mơ añ.

¹¹ Ơ cau kòñ gơboh añ, tus tĕ, bol he rơp lik lòt tòm ƀlàng sre, ơm mang tòm ƀòn dềt.

¹² Bol he rơp kah rngal bơh drim lòt tus hơ suơn ño, nàng lòng sền ño neh cat nha, bơkào neh gơlì, plai lừu neh gơlik bơkào sơl: Tềng hơ̆ añ rơp yal tơlik bơta kòñ gơboh bi in.

¹³ Plai sơrmoan tơlik ƀô gơ dê; mơ di mpồng bol he dê gơs ală plai bơkah pa mơ yau; Ơ cau kòñ gơboh añ jê, añ neh prap lòi plai hơ̆ bi in!