Đơs Chò 6 - Sră Goh 2018

¹ Ơ cau hàng mơnĕ rlau jơh tòm ală cau ùr, cau kòñ gơboh ai dê ntềng đah taih? Cau kòñ gơboh ai dê lòt đah lơi taih? Bol hi rơp lòt bal mơ ai nàng jòi khai.

² Cau kòñ gơboh añ lòt tus tòm suơn khai dê, tòm tiah tam bơkào ƀô, nàng ai mpồl sa ñhơt tòm suơn, mơ pic bơkào gun.

³ Añ gơrê bal mơ cau kòñ gơboh añ, mơ cau kòñ gơboh añ gơrê bal mơ añ; Khai ê mpồl khai digùl bơkào gun.

⁴ Ơ cau kòñ gơboh añ jê, ai hàng mơnĕ be Tirjah, mơnĕ mơnài be Jerusalem, bìr rngòt be mpồl ling pò bồng bi.

⁵ Wèt tĕ mat ai di bơh añ, bơh gơtơnkram nùs añ. Sŏ ai be dô mpồl be, mù bơh cìr mơnơm Galaat;

⁶ Sề ai be mpồl belàt me, guh bơh tiah pa um dà; jơh ală bol gơ be kòn deh bàr, ò gơs dô nơm lơi ơm is.

⁷ Tơrmồ ai be nggùl nai plai lừu dum pơrhê bơh ngkòi chèo cang mat.

⁸ Gơs prau jơt nă bau ùr bơtau, phàm jơt nă bau ùr cồng cau bơtau, mơ oă ngan cau ùr duh broă;

⁹ Sềm ntòp añ, cau wil tơl añ jê, mìng dô nă lơm, kòn kòñ gơboh mè ai dê. La cau neh deh ai. Ală cau ơruh gŏ khai, mơ sơnđan khai la cau geh lơngai. Ală bau ùr bơtau mơ ală bau ùr cồng cau bơtau kung jòng ro khai.

¹⁰ Cau ùr do la ñcau taih, tơlik mat be trồ rìng àng, hàng mơnĕ be mat kơnhai, àng gơcrà be mattơngai, bìr rngòt be dô mpồl ling pò bồng bi?

¹¹ Añ lòt tus tòm suơn plai gus, nàng sền ală ntê bơnung sơmbut tòm thòng. Nàng sền suơn ño neh cat nha pa, plai lừu neh gơs bơkào hala òhềt.

¹² Lài mơ tŭ añ git đal, cau kòñ gơboh añ jê tơnhào añ hơđang rơndeh di gah cau dờng ryŭ añ jê.

¹³ Ơ Sulammit rê wơl tĕ, rê wơl tĕ! Pal rê wơl tĕ, rê wơl tồ bol hi in sền gŏ ai. Ñchi bơh tài bol mê kòñ sền gŏ Sulammit, be gŏ bơta tòmya cau Mahanaim dê taih?