Đơs Chò 5 - Sră Goh 2018

¹ Ơ oh ùr añ, bau ùr pa añ jê, añ neh mut tòm suơn añ rau! Añ neh pic tơrgòm cài trŭ mơ chi ƀô bơlhu añ jê, Añ sa sìng lơwe mơ dà lơwe añ jê, añ ñô tơrnòm mơ dà toh añ jê. Ơ ală cau bơyô, sa tĕ; ơ ală cau bơyô đềt mềr, ñô bơñul tĕ bơta kòñ gơboh!

² Añ bic, mơya nùs añ gam kah rngal. Iat! Cau kòñ gơboh añ teh mpồng lah: “Pò tĕ mpồng añ in! Ơ oh ùr añ jê, cau kòñ gơboh añ jê, sềm ntòp añ jê, cau niam wil tơl añ jê! Bơh bồ añ sùh mơ dà tŭ, ală cap sŏ añ sùh bơh tơioh dà trồ mang dê.”

³ Añ neh hồ ào bơdìh rau, mbe rgơi soh wơl? Añ neh rào jơng rau, mbe rgơi lơh ƀơ̆ wơl?

⁴ Cau kòñ gơboh añ tơmut tê tòm trồm kai mpồng, nùs tồr añ rngoh rngac bơh khai.

⁵ Gen añ guh nàng pò mpồng cau kòñ gơboh añ in; tê añ ñhat cài trŭ, mơ ală ràs tê añ gơhòr cài trŭ hơđang plai at mpồng dê.

⁶ Añ guh nàng pò mpồng cau kòñ gơboh añ in, mơya cau kòñ gơboh añ jê neh wơlke lòt rau. Tòm tŭ khai đơs nùs añ gơplơ̆. Añ jòi khai, mơya ò bàn; añ hòi khai mơya khai ò ho wơl.

⁷ Ală cau ling kơp gàr gùt dar ƀòn tìp añ, bol khai pù lơh añ, mơ lơh añ in jê sồt; ală cau ling kơp gàr dơrñang ƀòn dờng tă ào jrùh añ jê.

⁸ Ơ ală kòn ùr Jerusalem, añ rac dan mơ bol ai, dilah bol ai bàn cau kòñ gơboh añ jê, yal tĕ mơ khai lah: añ gơs kòp jê bơh bơta kòñ gơboh.

⁹ Ơ cau hàng mơnĕ rlau jơh tòm ală cau ùr, Ñchi cau kòñ gơboh ai dê gơs rlau mơ cau kòñ gơboh ndai? Ñchi cau kòñ gơboh ai dê gơs rlau mơ cau kòñ gơboh ndai taih? Mơ ai jà bơklơn bol hi kàr hơ̆ taih?

¹⁰ Cau kòñ gơboh añ bò mơ dum, khà dùl tòm jơt rbô nă cau.

¹¹ Bồ khai mơ màh goh ngan, sŏ khai rkồn be ryà dà, mơ jù be kơnđà.

¹² Mat khai be sềm ntòp rềp croh dà, um tòm dà toh, geh rơndap ring bal.

¹³ Tơrmồ khai be àr bơkào ƀô bơlhu, gơlik ƀô bơlhu bềng lìu; sơndồi khai gơlơh be bơkào gun; ngồm ñhat cài trŭ.

¹⁴ Tơwòr tê khai be dô ding màh ƀềp lŭ màng rmit: să jan khai ò gơkrơi be bla mòn niam geh ƀềp mơ lŭ màng tơlir trồ.

¹⁵ Bàr nơm jơng khai be jrong lŭ bơkào bò, ơn hơđang jơng mơ màh ngan; rùp să khai ò gơkrơi be mơnơm Liban, niam mơnĕ be chi pơnàng.

¹⁶ Bơr khai lơngồt bơkah; jơh ală bơta gơs tòm khai di pal kòñ gơboh ngan. Ơ ală kòn ùr Jerusalem, cau kòñ gơboh añ behơ̆, cau bơyô gơboh añ la behơ̆!