Đơs Chò 3 - Sră Goh 2018

¹ Tòm trồ mang hơđang cơnòng bic añ jê, añ jòi cau mơ nùs añ kòñ gơboh, añ jòi khai mơya ò bàn. Añ hòi mơya khai ò ho wơl.

² Añ đơs: Añ rơp guh mo tŭ do, lòt gùt dar ƀòn dờng, lòt tòm ală gùng mơ ală hìu dờng nàng jòi cau mơ nùs añ kòñ gơboh. Añ jòi khai mơya ò bàn.

³ Ală cau ling kơp gàr gùt dar ƀòn dờng neh tìp añ. Añ lùp lah: Bol mê neh gŏ cau mơ nùs añ kòñ gơboh sơl?

⁴ Añ pa lòt sơrlèt bơh bol khai dô ơthoa, tòm tŭ añ tìp cau mơ nùs añ kòñ gơboh; gen koar kơ̆ di khai, ò lòi khai in lòt, jơl tus di tŭ añ lam khai mut tòm hìu mè añ jê, mut tòm ơdŭ mè neh bun añ.

⁵ Ơ ală kòn ùr Jerusalem, añ bơklơn bol ai ho tĕ mơ añ, bơh ală keh hala jùn ƀlàng sre, bañ lơh dơrcul mơ pơrlai bơta kòñ gơboh, Jơl tus di tŭ gơ neh rcang sir.

⁶ Cau ne la ñcau, tus bơh tòm ƀlàng ngềt ngơt, be jrong ñhŭ, ƀô bơlhu cài trŭ mơ kơlhô, bal mơ ală kơmbuh chi ƀô bơlhu cau kă bro dê taih?

⁷ Ne, la rda tùng Salômôn dê, gùt dar gơ gơs prau jơt nă cau pràn kơldang tòm mpồl cau pràn kơldang Israel dê.

⁸ Jơh ală at đào mơ jak tòmlơh; cau lơi kung gơs đào di bơnô he, tài bơh bơta tus òm tòm trồ mang.

⁹ Bơtau Salômôn neh lơh să tòm khai in dô nơm rda tùng mơ chi bơh Liban,

¹⁰ Khai lơh ală jrong gơ mơ priă, tiah sơnđìng ngkòi mơ màh, tiah nggui mơ phan gơs dà gur, ai digùl lă mơ bơta kòñ gơboh ală kòn ùr Jerusalem dê.

¹¹ Ơ ală kòn ùr Siôn, lik lòt tĕ sền bơtau Salômôn, sơgơn bơtau mơ mè khai neh tơndau khai in, tòm ngai tòmbau khai, tòm ngai nùs khai hòn chò.