Đơs Chò 2 - Sră Goh 2018

¹ Añ la bơkào phồng Sarôn dê, bơkào gun thòng dê.

² Be bơkào gun digùl ală rlau lò, Cau kòñ gơboh añ ơm digùl ală cau ơruh.

³ Be tòm chi sa plai digùl ală chi tòm brê, behơ̆ sơl cau kòñ gơboh añ ơm digùl ală cau pơnu, Añ chò nùs ơm nggui tòm mƀur khai dê; plai khai bơkah lơngồt tòm lơmpiat añ in.

⁴ Khai cèng añ tus tòm hìu yò sa dờng, Bơta lơh nền lài khai wèt hơ añ hơ̆ la bơta kòñ gơboh.

⁵ Yò đo añ mơ ƀañ plai ño; bơtơl pràn añ in mơ ală plai chi; bơh añ kòp jê bơta kòñ gơboh.

⁶ Tê kiau khai gòl hơđơm bồ añ, ai tê ma khai koar di añ.

⁷ Ơ ală kòn ùr Jerusalem, añ jà bơklơn bol ai, bơh ală keh hala jùn ƀlàng sre, bañ pơrlai bơta kòñ gơboh añ jơl tus di tŭ gơ neh rcang sir.

⁸ Hơ̆ la jơnau đơs cau kòñ gơboh añ jê! Ne, khai tus, sơnđoh gan ală mơnơm, sơrlèt gan ală dòr.

⁹ Cau kòñ gơboh añ tòm toh be dô nơm keh hala dô nơm jùn dam. Ne, khai ntào bơh ngkòi dơrñang hìu bol he, sền gan di mpồng dềt, sền gan di pơnggàr mpồng.

¹⁰ Cau kòñ gơboh añ tòmbơhbơr mơ añ lah: “Ơ cau gơboh añ, cau hàng mơnĕ añ jê, guh tĕ mơ tus.

¹¹ Mơ ne, kơnhai mrềt neh rlau, mìu neh jơh rlau rau;

¹² Ală bơkào gơlì tòm ù; tŭ đơs chò neh tus rềp, mơ sap sềm ntòp hui neh kơno làm tòm ƀòn lơgar;

¹³ Chi ƀal neh gơlik plai sơnròp gơ dê, mơ che ño neh gơlik bơkào ƀô bơlhu ngan. Ơ cau kòñ gơboh añ, cau hàng mơnĕ añ jê, guh tĕ mơ tus!

¹⁴ Ơ sềm ntòp añ, tòm pơnai lŭ, di tiah cìr mơnơm jơnhoa, ai tĕ añ in sền muh mat ai, ai añ in iat jơnau đơs ai; bơh jơnau đơs ai dê la bơkah lơngồt, muh mat ai dê gơboh gơbài ngan.

¹⁵ Kup tĕ bol he in ală kòn pì, ală kòn pì dềt phà tơnlề suơn ño; bơh suơn ño bol he dê gơlik bơkào.”

¹⁶ Cau kòñ gơboh añ gơrê bal mơ añ, mơ añ gơrê bal mơ khai; khai ê mpồl he digùl ƀlàng bơkào gun,

¹⁷ Jơl tus di tŭ rìng àng drim, mơ mƀur bơta klam jơngo roh thit. Ơ cau kòñ gơboh añ, rê wơl tĕ! Be dô nơm keh hala dô nơm jùn dra hơđang cìr mơnơm Bether.