Daniel 7 - Sră Goh 2018

Ală bơta gơtơnggŏ Daniel ( 7:1 – 12:13 ) Bơta gơtơnggŏ Daniel dê bơh poan nơm phan poan jơng

¹ Tòm nam dơ̆ sơnròp rài Belsassar, bơtau lơgar Babilôn dê, Daniel bic mang hơđang cơnòng gen gŏ bơta mpau mơ ală bơta gơtơnggŏ tòm dơngoh khai. Khai cih wơl bơta mpau mơ yal wơl ală bơta gơtơnggŏ hơ̆.

² Daniel yal lah: “Tòm bơta gơtơnggŏ tòm trồ mang añ tơnggòr sền mơ gŏ gơs poan đah càl hơđang trồ khồm lơh lơnggac dàlềng dờng.

³ Gơs poan nơm phan poan jơng dờng guh bơh dàlềng, phan do krơi is mơ phan ne.

⁴ Phan poan jơng sơnròp gơlơh be klìu triă, mơ gơs pơnđar be klàng bung. Añ tơnggòr sền jơl tus di tŭ ală pơnđar gơ kong dơrpă jơh, să jan gơkòl yò tơngguh bơh di ù, gơ ơm ntào mơ bàr đah jơng be kòn mơnus, mơ gơ dòp geh nùs nhơm kòn mơnus dê.

⁵ Phan poan jơng dơ̆ bàr gơlơh be jơgơu: dô đah să do jơnhoa rlau mơ đah să ne, gơ kap pe nơm ntìng rpàs dê ală sề tòm bơr gơ dê, mơ gơs cau đơs mơ gơ lah: ‘Ntào tĕ, sa loan oă poac să.’

⁶ Tơnơ̆ mơ hơ̆, añ tơnggòr sền mơ gŏ dô nơm phan poan jơng ndai gơlơh be klìu sơmañ, di ngkòi gơ gơs poan nơm pơnđar be pơnđar sềm. Phan poan jơng hơ̆ gơs poan nơm bồ, mơ geh jào gơnoar at bồ.

⁷ Tơnơ̆ tai añ tơnggòr sền tòm bơta gơtơnggŏ tòm trồ mang; do, gơs dô nơm phan poan jơng dơ̆ poan gơs rùp să gơlơh rngòt rngơt ngan, gơ jàñ bơsak, mơ pràn kơldang ò git lơh. Gơ gơs sề dờng mơ lòs, gơ kap crè, jan bơcah, mơ ai jơng jă tơnlề phan lơi gam wơl. Gơ krơi is mơ pe nơm phan poan jơng neh tus lài, mơ gơ gơs jơt nơm ngke.

⁸ Tòm tŭ añ ơm kơlôi tồ git bơh ală ngke hơ̆, nisơna gơs dô nơm ngke dềt gơhòn bơh digùl ală ngke hơ̆, mơ pe nơm tòm ală ngke lài gơkòl tă tơlik di đap ngke dềt hơ̆. Ngke dềt hơ̆ gơs ală gar mat be gar mat kòn mơnus, mơ dô nơm bơr đơs ală jơnau tràl sơrbil.”

Bơta cahrña di đap Bơtau neh gơs bơh rài yau

⁹ “Añ tơnggòr sền jơl tus di tŭ ală sơbàn neh ơn, mơ gơs Bơtau Yau Òr nggui hơđang sơbàn Kơnràñ dê. Ào Kơnràñ bò be piar, mơ sŏ di bồ Kơnràñ bò be sơnò belàt dê. Sơbàn Kơnràñ dê la ală lơmpiat ồs, mơ ală kong rơndeh la ồs hơng.

¹⁰ Di đap Kơnràñ gơs dô nơm hiòng ồs gơhòr lìu làm jơh, rbô rbô cau duh broă Kơnràñ, mơ tơlak tơmàn ntào di đap Kơnràñ. Tŭ jơ cahrña neh tus, mơ ală sră neh pò tơlik.

¹¹ Añ wèt mat sền tài bơh kơno ntas ală jơnau tràl sơrbil mơ ngke dềt hơ̆ neh đơs. Añ tơnggòr sền jơl tus di tŭ phan poan jơng kong tơnchơt, să jan gơ kong tơnroh mơ chu pơrguc jơh tòm ồs.

¹² Ai ală phan poan jơng gam wơl, neh kòl tă jơh gơnoar, mơya bơta kis bol gơ dê geh lòi kis jŏ tòm dô pah tơngai mơ dô tŭ tơngai tai.

¹³ Tòm bơta gơtơnggŏ tòm trồ mang, Añ kung gŏ dô Bơtau gơs rùp să be Kòn mơnus tus digùl ală puk mhwal hơđang trồ. Kơnràñ guh tus hơ Bơtau Yau Òr, mơ geh tơlik mat di đap Bơtau hơ̆.

¹⁴ Kơnràñ geh Bơtau Yau Òr jào gơnoar, bơta gơklŏ mơ gơnoar at bồ lơgar tồ jơh ală làng bol, ală lơgar, mơ ală jơnau đơs pal duh khoai Kơnràñ. Gơnoar at bồ Kơnràñ dê kơ̆ nền gam sùm sùm, gơnoar hơ̆ ò tŭ lơi lồi jơh, mơ lơgar Kơnràñ at bồ ò gơs tŭ lơi gơkòl tơnroh.”

Jơnau yal tơnggit ală bơta tơnggŏ

¹⁵ “Añ, Daniel, ơm ò suk mơ gơs hwềng nùs rngòt rngơt bơh ală bơta gơtơnggŏ hơ̆ tòm dơngoh añ.

¹⁶ Gen añ lòt tus rềp mơ dô nă tòm ală cau ntào tềng hơ̆ mơ lùp khai bơh jơnau gơtha ală bơta do dê. Khai yal tơlik añ in jơnau gơtha ală bơta hơ̆ mơ đơs lah:

¹⁷ ‘Poan nơm phan poan jơng dờng la poan nơm lơgar poan nă cau bơtau dê rơp bơtào tơngguh hơđang ù.

¹⁸ Mơya ală cau sàng goh Bơtau Hơđang Rlau Jơh dê rơp dòp geh lơgar mơ sơmbat kơ̆ lơgar hơ̆ jơl tus sùm sùm ò lồi.’

¹⁹ Gen añ kòñ git jơnau gơtha song ngan bơh phan poan jơng dơ̆ poan la phan poan jơng krơi is mơ jơh ală phan poan jơng ne, jàñ bơsak ngan, sề mơ lòs, nđias mơ kòng, jak crè sa, jan bơcah, mơ jă tơnlề phan lơi gam wơl tòm tiah mpàng jơng gơ dê.

²⁰ Añ kung kòñ git jơnau gơtha bơh jơt nơm ngke di bồ gơ, mơ bơh dô nơm ngke ndai gơhòn lik tơnơ̆, mơ di đap ngke hơ̆ pe nơm ngke ne neh gơkòl tă tơlik, ngke hơ̆ gơs ală mat mơ bơr đơs ală jơnau tràl sơrbil, mơ gơ pràn kơldang rlau mơ ală ngke ndai.

²¹ Añ sền gŏ ngke hơ̆ tòmlơh mơ ală cau sàng goh, mơ gơ geh pha,

²² jơl tus di tŭ Bơtau Yau Òr tus cahrña mơ dong tò ală cau sàng goh Bơtau Hơđang Rlau Jơh dê, hơ̆ la tŭ tơngai bol khai dòp geh lơgar.

²³ Behơ̆, khai yal tơlik añ in be tơnơ̆ do: ‘Phan poan jơng dơ̆ poan la lơgar dơ̆ poan hơđang ù, gơ krơi is mơ jơh ală lơgar ndai, gơ rơp sa loan jơh ală lơgar tòm ù, jan bơcah mơ jă tơnlề jơh.

²⁴ Jơt nơm ngke la jơt nă cau bơtau rơp bơtào tơngguh bơh dê lơgar hơ̆: mơ tơnơ̆ mơ bol khai gơs dô nă cau bơtau bơtào tơngguh, krơi is mơ ală bơtau lài, mơ khai rơp tuh tơlup pe bơtau.

²⁵ Cau bơtau hơ̆ rơp đơs ală jơnau tòmdră mơ Bơtau Hơđang Rlau Jơh, rồn bơklơn ală cau sàng goh Kơnràñ dê, mơ lơh nền tòmgơl sră kòp tơngai mơ bơta boh lam; ală cau sàng goh rơp kòl phi tòm tê khai tòm dô tơngai, ală tơngai mơ nggùl tơngai.

²⁶ Mơya bơta cahrña rơp tus, gơnap gơnoar khai dê rơp kòl tă tơlik mơ kong tơnroh tơnrui jơh hir.

²⁷ Gen gơnoar bơtau, gơnoar at bồ, mơ bơta dờng ryŭ ală lơgar dê ơm hơđơm jơh trồ do rơp geh ai ală cau sàng goh la làng bol Bơtau Hơđang Rlau Jơh dê. Lơgar bol khai dê rơp la lơgar gam sùm sùm, mơ jơh ală cau at bồ rơp duh broă mơ dòn bơr bol khai.’

²⁸ Behơ̆, do la lồi dut jơnau hơ̆. Añ, Daniel, ală bơta kơlôi sơnơng añ jê lơh añ in dơrcul rngòt ngan. Muh mat añ gơtòmgơl, mơya añ prap kah ală bơta hơ̆ tòm nùs añ.”