Daniel 6 - Sră Goh 2018

Daniel tòm wàng klìu triă

¹ Bơtau Darius niam nùs pồ bơtào dô rhiang bàr jơt nă cau kwang at bồ kơnhwàl lơgar nàng at bồ jơh ală kơnhwàl tòm lơgar.

² Hơđang bol khai gơs pe nă cau kwang đơng lơgar, mơ dô nă tòm pe nă cau hơ̆ la Daniel. Ală cau kwang at bồ kơnhwàl lơgar pal yal broă bol khai dê mơ pe nă cau kwang đơng lơgar hơ̆, tồ bơtau in ò kong bơta roh gơcoh lơi.

³ Mơ tai, Daniel la jak chài lin rlau mơ bàr nă cau kwang đơng lơgar, mơ jơh ală cau kwang at bồ kơnhwàl lơgar ne, tài bơh gơs Hwềng jak chài àng loh ơm tòm khai, gen cau bơtau kòñ pồ bơtào khai at bồ jơh lơgar.

⁴ Behơ̆ bàr nă cau kwang đơng lơgar bal mơ ală cau kwang at bồ kơnhwàl lơgar ne jòi kai yă Daniel bơh broă at bồ lơgar; mơya bol khai ò rgơi jòi bàn dô bơta tìs lơi di khai, tài bơh khai la cau di pal dòn kơnòm, ò sa kwì sa kwà, mơ ò tŭ lơi lơh tìs.

⁵ Behơ̆ ală cau hơ̆ đơs bal lah: “Bol he ò rgơi jòi bàn dô nơm bơta lơi nàng yă Daniel dilah bol he ò jòi tòm ală bơta gơrê bal mơ bơta boh lam Yàng Tom Trồ khai dê.”

⁶ Ală cau kwang at bồ kơnhwàl lơgar hơ̆ lòt tus di đap bơtau mơ đơs lah: “Ơ bơtau Darius, dan bơtau in kis sùm!

⁷ Jơh ală cau kwang đơng lơgar, ală cau kwang at bồ kơnhwàl lơgar, ală cau kwang bơyai broă bal mơ ală cau kwang ndai gơs dô nùs bal dan bơtau tơlik jơnau sồr bơkơ̆u kràñ cê tòm pe jơt ngai, dilah cau lơi hòi dan di yàng lơi ndai, hala di cau lơi ndai rlau mơ cau bơtau, gen cau hơ̆ rơp pal kong sơrbì tòm wàng klìu triă.

⁸ Behơ̆ tŭ do, Ơ bơtau, ai tĕ jơnau bơkơ̆u hơ̆ mơ kĭ mat bơtau tòm hơ̆ tồ gơ ò rgơi tòmgơl, jat be bơta boh lam kràñ cê cau Medi mơ cau Persia dê, bơta hơ̆ ò rgơi tơnroh.”

⁹ Behơ̆, bơtau Darius kĭ mat tòm sră jơnau bơkơ̆u hơ̆.

Daniel tòm wàng klìu triă

¹⁰ Bulah Daniel neh kơno la jơnau bơkơ̆u hơ̆ cau bơtau neh lơh tềl sơnđan mat rau, khai kư̆ gam rê hơ hìu khai, tềng hơ̆ gơs ală mpồng dềt tòm ơdŭ jơnhoa hơđang, Daniel òs pò ală mpồng dềt wèt hơ đah Jerusalem, mơ cùn gơltang dô ngai pe dơ̆ hòi dan, mơ jòng ro Yàng Tom Trồ jat be khai neh òs lơh bơh lài.

¹¹ Tŭ hơ̆, ală cau bơtào kai gơrmơ̆i ne, gŏ Daniel ơm hòi dan mơ rac dan bơta nđàc di đap Yàng Tom Trồ.

¹² Gen bol khai lòt tus hơ bơtau mơ lùp bơh jơnau bơkơ̆u bơtau dê, mơ lah: “Ơ bơtau, bơtau ò di neh lơh tềl sơnđan mat tòm sră cih jơnau bơkơ̆u la tòm pe jơt ngai, dilah cau lơi hòi dan di yàng lơi ndai hala di cau lơi ndai rlau mơ bơtau, gen cau hơ̆ rơp pal kong sơrbì tòm wàng klìu triă ò ơ?” Bơtau ho lah: “Bơta hơ̆ la ngan, jat be bơta boh lam cau Medi mơ cau Persia dê gen ò rgơi tòmgơl.”

¹³ Bol khai ho wơl mơ bơtau lah: “Daniel la dô nă cau kòl kup cèng pơrdô bơh Juda, khai ò gơs nùs ki ngàm di bơtau dô êt lơi; Ơ bơtau, bulah tus di jơnau bơkơ̆u mơ bơtau neh lơh tềl sơnđan mat kung behơ̆ sơl; mơya khai kư̆ hòi dan kòp ngai pe dơ̆.”

¹⁴ Tòm tŭ bơtau kơno ală jơnau hơ̆ gen khai dơrcul ngan; bơtau lơh nền tòm nùs nàng dong tă Daniel, mơya jơl tus di tŭ mattơngai mut, khai pơnđơl jơh pràn kung òhềt jòi bàn gùng lơi tồ dong klàs Daniel.

¹⁵ Ală cau bơtào kai gơrmơ̆i sò tơm di Daniel tus wơl hơ bơtau mơ đơs lah: “Ơ bơtau, dan git lah jat bơta boh lam cau Medi mơ cau Persia dê, hơ̆ la ò gơs jơnau bơkơ̆u hala bơta lơh nền lơi mơ bơtau neh bơtào mơ rgơi tòmgơl.”

¹⁶ Gen bơtau sồr cèng Daniel tus, mơ sơrbì khai tòm wàng klìu triă. Bơtau đơs mơ Daniel lah: “Dan Yàng Tom Trồ mê dê, la bơtau mê jơh nùs dòn song duh broă, rơp dong tă mê.”

¹⁷ Cau cèng dô nơm pơnai lŭ kơrdơl di mpồng wàng, mơ cau bơtau tap ƀang kì bơtau dê, bal mơ ƀang kì ală cau kwang dờng tai sơl tồ ò gơs bơta lơi tòmgơl bơh Daniel.

¹⁸ Gen bơtau rê wơl hơ gơlang khai dê mơ ơt sa mang àng, cau ò cèng phan sa bơtau in, kung ò ai mpồl cau in lơh chò hòp tus di đap bơtau, mơ bơtau ò lơhă bic.

¹⁹ Gen bơtau guh gòñ, tŭ rìng àng, sơrbac sơrbang lòt tus hơ wàng klìu triă.

²⁰ Tòm tŭ bơtau tus rềp di wàng klìu, khai ai sap moat jrùng ngan mơ hòi Daniel lah: “Ơ Daniel, cau duh broă Yàng Tom Trồ gam kis sùm sùm dê, Yàng Tom Trồ mơ mê òs duh broă sùm rgơi dong tă mê bơh di klìu triă sơl?”

²¹ Tŭ hơ̆, Daniel đơs mơ bơtau lah: “Ơ bơtau, dan bơtau in kis sùm!

²² Yàng Tom Trồ añ jê neh sồr cau gơnrơh Kơnràñ dê lềt bơr ală klìu triă, gen tàng bol gơ ò lơh iơh di añ dô êt lơi, tài bơh Kơnràñ neh gŏ añ ò gơs glài lơi di đap Kơnràñ. Ơ bơtau, gơwèt mơ bơtau kung behơ̆ sơl, añ ò lơh dô bơta tìs lơi ò.”

²³ Gen bơtau hòn chò ngan, mơ sồr cèng tơngguh Daniel bơh di wàng klìu. Behơ̆, Daniel geh cèng tơngguh bơh di wàng, mơ cau ò gŏ dô nơm tềl sồt lơi di khai, tài bơh khai neh dòn kơnòm di Yàng Tom Trồ khai dê.

²⁴ Jat jơnau sồr bơtau dê gen cau cèng tus ală cau neh yă Daniel, mơ sơrbì bol khai bal mơ bau kòn bol khai dê tòm wàng klìu triă. Tòm tŭ bol khai òhềt dùh tus di kơnàng wàng dê, gen ală klìu triă neh brồ kap mơ crè ntìng jơh tơl nă.

²⁵ Gen bơtau Darius cih sră pơyoa jơh ală làng bol, ală lơgar mơ ală jơnau đơs in tòm làm bă tiah lah: “Dan bơta lơngap lơngai bol mê dê geh gơbơtơl oă tai.

²⁶ Añ ai jơnau sồr lah tòm làm jơh lơgar añ, jơh tơl nă cau pal rơm să rngòt di đap Yàng Tom Trồ Daniel dê. Kơnràñ la Yàng Tom Trồ gam kis sùm sùm mơ gam gơs sùm sùm. Lơgar Kơnràñ dê ò gơs tŭ lơi roh, mơ gơnoar at bồ Kơnràñ dê ò gơs tŭ lơi lồi.

²⁷ Kơnràñ dong tă mơ dong klàs, lơh ală tềl is bơta krơi hơđang trồ mơ tòm ù, Kơnràñ neh dong tă Daniel bơh di gơnoar pràn ală klìu triă dê.”

²⁸ Behơ̆ Daniel kư̆ geh bơtoah bơtoài sùm tòm rài at bồ bơtau Darius mơ bơtau Sirus la cau Persia.