Daniel 11 - Sră Goh 2018

Bơta tòmlơh digùl ală bơtau đah đang mơ đah đơm

¹ Ai pơnah mơ añ, tòm nam sơnròp rài bơtau Darius, cau Medi, añ tus nàng dong kòl khai mơ bơtơl pràn Mikael in.

² Tŭ do, añ rơp yal mê in git jơnau song: Pe nă cau bơtau tai rơp guh tòm Persia, mơ bơtau dơ̆ poan la pas sơm rlau jơh. Tòm tŭ khai neh gơlik gơs pràn kơldang kơnòm di phan mơna pas gơs khai dê, gen khai chồl bơtrut jơh ală cau tòmdră mơ lơgar Grek.

³ Gen rơp gơs dô nă cau bơtau gơs gơnoar pràn bơtào tơngguh, ai gơnoar dờng at bồ mơ lơh ală bơta jat nùs khai kòñ.

⁴ Tòm tŭ cau bơtau hơ̆ neh bơtào tơngguh gen lơgar khai dê gơkòl cah is jat poan đah càl hơđang trồ, mơya ò geh lòi pơrdòn kòn sau khai in, kung ò di gơs gơnoar pràn be neh gơs bơh lài; tài bơh lơgar khai dê rơp kòl dus bơh ryas mơ jào phi cau ndai in la cau bơdìh bơh jơi bơtiàn bơtau dê.

⁵ Bơtau đah đơm rơp geh pràn kơldang; mơya dô nă tòm ală cau kwang dờng at bồ ling khai dê rơp geh pràn kơldang rlau mơ khai, mơ rơp ai gơnoar pràn dờng nàng at bồ lơgar khai dê.

⁶ Tơnơ̆ mơ dô êt nam ală bơtau hơ̆ rơp lơh gơs dô bă bal. Kòn ùr bơtau đah đơm rơp lòt tus hơ bơtau đah đang nàng lơh gơtòmsòr bal, mơya gơnoar pràn kòn ùr bơtau dê ò ơm jŏ jòng, khai mơ gơnoar pràn khai dê kung ò gam tai. Tòm ală ngai hơ̆, kòn ùr bơtau bal mơ ală cau neh lòt tus bal mơ khai, kòn khai neh deh, bal mơ ală cau neh dong kòl khai, jơh tơl nă rơp kòl sang lòi.

⁷ Dô nă tòm hìu nhă kòn ùr bơtau dê rơp bơtào tơngguh nàng tơrbŏ sơbàn khai. Khai lam mpồl ling tus tòmlơh mơ bơtau đah đang mơ geh pha.

⁸ Tòm tŭ rê wơl, khai kung cèng tus tòm lơgar Ejiptơ ală rùp duh khoai kas màng bal mơ ală phan ngui mơ màh mơ priă tai sơl. Tòm dô êt nam, khai dơh wơl ò brồ lơh bơtau đah đang.

⁹ Gen bơtau đah đang rơp lòt tòmlơh mơ bơtau đah đơm, mơya khai pal rê wơl hơ lơgar tòm khai dê.

¹⁰ Ală kòn klau bơtau đah đang rcang tòmlơh, bol khai pơjum dô mpồl ling gal ngan, lòt gan kung be dà kŏ ò gơs cau lơi rgơi kơryan gùng, mơ tòmlơh tus di theng ling bơtau đah đơm dê.

¹¹ Tŭ hơ̆ bơtau đah đơm gơjrañ ngan mơ lam dô mpồl ling dờng ngan lik lòt tòmlơh mơ bơtau đah đang, mơ mpồl ling bơtau đah đang pal kong alah.

¹² Tòm tŭ neh lơh gơprah mpồl ling đah đang rau gen bơtau đah đơm gơlik pơnhừ să. Khai rơp tơnchơt tơlak tơmàn cau mơya khai ò geh pha jŏ jòng.

¹³ Bơtau đah đang rơp pơjum dô mpồl ling gal rlau mơ lài tai, mơ tòm dô êt nam tơnơ̆, khai rơp tus bal mơ dô mpồl ling dờng mơ oă ngan phan tòmlơh.

¹⁴ Tòm tŭ hơ̆ gơs oă cau rơp bơtào tơngguh tòmdră mơ bơtau đah đơm. Ală cau iơh bơsak tòm làng bol mê dê rơp sòdră tồ gơlik di ngan be bơta gơtơnggŏ, mơya bol khai rơp kòl roh gơcoh.

¹⁵ Gen bơtau đah đang rơp tus gơrwàng gùt dar mơ tòmpìt geh dô nơm theng ling kơ̆ cê. Mpồl ling đah đơm ò tơl pràn nàng ntào jai, bulah mpồl ling jak rlau jơh bol khai dê kung ò tơl pràn nàng tòmdră.

¹⁶ Mơya cau bơtau đah đang hơ̆ rơp brồ lơh jat nùs khai kòñ, ò gơs cau lơi rgơi ntào tòmdră mơ khai. Khai rơp ntào tòm tiah gơklŏ khai dê mơ gơs gơnoar hơđang làm jơh.

¹⁷ Khai rơp lơh nền ai jơh pràn lơgar khai dê mơ khai rơp lơh bơta gơtòmsòr bal mơ bơtau đah đơm. Khai rơp ai kòn ùr khai dê tòmbau mơ bơtau đah đơm nàng dong khai tòmpìt lơgar đah đơm, mơya kung ò cèng cồng nha lơi bơtau in sơl.

¹⁸ Tơnơ̆ hơ̆, khai wèt hơ bồt pơlào rò gah dàlềng mơ tòmpìt oă tiah. Mơya dô nă cau kwang at bồ ling rơp pơndut bơta pơnhừ să khai dê, mơ lơh bơta pơnhừ să bơtau dê tòmdră wơl mơ bơtau.

¹⁹ Tơnơ̆ mơ hơ̆, khai rơp wèt mat rê wơl hơ ală tiah kơp gàr lơgar tòm khai dê, mơya khai rơp gơplơ̆, ò geh jòi bàn tai.

²⁰ Cau bơtau pơrdòn sơbàn khai dê rơp sồr dô nă cau kwang dar dia nàng dong bơtào kơ̆ bơta pas ryŭ lơgar khai dê, mơya tòm dô êt jŏ khai rơp kong tơnroh, ò di tài bơh bơta gơjrañ kơuềng hala bơta tòmlơh lơi.

²¹ Cau rơp tơrbŏ sơbàn hơ̆ la dô nă cau lac lèo, khai ò geh pồ bơtào gơnoar at bồ. Khai rơp tòmpìt ai lơgar tòm tŭ làng bol ò rcang lài, khai ngui kai gơrmơ̆i lac lèo nàng geh lơgar.

²² Ală mpồl ling rơp kong pơs jơh mơ bơcah lề lac di đap khai, mơ bơtau bơtào bơta ho bal kung behơ̆ sơl.

²³ Tơnơ̆ mơ tŭ khai neh bơtào bơta ho bal gen khai ò lơh jat, kơnòm di bơta blac pơrlồm khai geh gơnoar pràn ngan bulah bơh sơnròp khai mìng la dô mpồl dềt.

²⁴ Nisơna khai tòmpìt ai ală tiah niam rlau jơh tòm lơgar, mơ khai rơp lơh gơs bơta mơ ồng pàng mơ mè bèp khai dê òhềt tŭ lơi lơh. Khai ai ală phan neh tòmpìt geh tòm tŭ tòmlơh, bal mơ phan mơna nàng tòmpà mơ ală cau jat khai. Khai bơtào kai gơrmơ̆i mơ tơnroh ală tiah kơp gàr, mơya mìng tòm dô tŭ tơngai lơm.

²⁵ Tơnơ̆ hơ̆, khai jơh nùs bơtào tơngguh gơnoar pràn khai dê, lơh nền lam dô mpồl ling dờng tòmlơh mơ bơtau đah đơm. Bơtau đah đơm rơp lòt tòmlơh bal mơ dô mpồl ling dờng mơ pràn kơldang ngan; mơya khai ò geh pha tài bơh gơs cau bơtào kai gơrmơ̆i tòmsò mơ khai.

²⁶ Ală cau sa bal di cơnòng bơtau dê kòñ tơnroh khai, mpồl ling khai dê rơp kong alah, mơ oă cau kong sreh tơnchơt tòm bơta tòmlơh.

²⁷ Bàr bơtau hơ̆ gơs nùs mìng kòñ lơh iơh di gơp, bulah nggui bal di cơnòng nàng bơyai ơm gơtòmsòr bal, mơya đơs blac mơ gơp, mơ bơta hơ̆ ò gơlik cồng nha tài bơh òhềt tus bơta lồi dut tŭ tơngai neh lơh nền.

²⁸ Bơtau đah đang rơp rê wơl hơ lơgar tòm khai dê bal mơ phan mơna oă ngan; nùs khai kòñ tòmsò mơ bơta ho bal sàng goh. Khai rơp lơh jat nùs kòñ hơ̆ khai dê, mơ rơp rê wơl hơ lơgar khai dê.

²⁹ Tus di tŭ tơngai neh lơh nền, khai rơp lòt tai tòmlơh mơ lơgar đah đơm, mơya dơ̆ tơnơ̆ do ò ndròm bal be dơ̆ lài.

³⁰ Tài bơh ală ơhò bơh Kittim rơp tus tòmsò mơ khai, gen tàng khai kơlôi rngòt mơ rê wơl. Tòm gùng rê wơl, khai rơp gơhào gơjrañ tòmsò mơ bơta ho bal sàng goh. Khai rơp rê wơl mơ yal tơlik bơta nđàc gơwèt hơ ală cau sang lòi bơta ho bal sàng goh.

³¹ Mpồl ling khai sồr rơp lơh ƀơ̆ ƀơl tiah sàng goh mơ ƀòn dờng kơp gàr; ò ai ơn phan ơn chu kòp ngai, mơ bơtào bơta ngkòr ngkàc la bơta lơh gơlik gơs bơta tơnroh gơprah gơpring.

³² Khai ngui jơnau rơmhòc nàng ơniai ală cau sang lòi bơta ho bal; mơya làng bol git Yàng Tom Trồ rơp tòmdră mơ khai dô bă pràn kơldang.

³³ Ală cau jak chài tòm làng bol rơp bơto sồr oă cau: bulah tòm dô pah ngai bol khai rơp kong sreh tơnchơt, kong chu tòm ồs, mơ kong cau tòmpìt ai jơh phan mơna.

³⁴ Tòm tŭ bol khai kong behơ̆, bol khai rơp geh dong kòl dô êt: mơ oă cau rơp lơh gơs dô bă bal mơ bol khai dô bă ma blac.

³⁵ Tòm ală cau jak chài rơp gơs dô êt cau tìs nrah bơh hơ̆ tồ bol khai in geh lòng tiar, geh lơh gơs sàng goh mơ rào goh tơngai lồi dut in, tài bơh pal ơm gơn jơl tus di tơngai lơh nền.

Cau bơtau yò tơngguh is să khai

³⁶ Cau bơtau đah đang rơp lơh jat nùs kòñ khai dê; khai rơp pơnhừ să mơ yò tơngguh să khai jòng hơđang rlau mơ jơh ală yàng, mơ đơs ală jơnau tràl sơrbil ngan tòmsò mơ Yàng Tom Trồ ală yàng dê. Khai rơp geh bơtoah bơtoài jơl tus di tŭ bơta gơjrañ dờng Yàng dê geh bềng tơl, tài bơh bơta neh lơh nền pal gơlik gơs di ngan.

³⁷ Khai rơp sền òsơp di ală yàng ồng pàng khai dê, di yàng mơ ală cau ùr kòñ gơboh, mơ sền òsơp di jơh ală yàng tài bơh khai bơtào is să khai dờng rlau jơh mơ ală yàng hơ̆.

³⁸ Khai ò dòn duh ală yàng hơ̆, mìng dòn duh yàng ală ƀòn dờng kơp gàr dê; khai rơp ai màh, priă, lŭ màng, mơ ală phan ơn kas màng nàng dòn duh yàng mơ ồng pàng khai ò git.

³⁹ Khai rơp kơnòm di dô nă yàng crih mat dong kòl nàng tòmlơh mơ ală theng kơ̆ cê rlau jơh, mơ khai rơp yò tơngguh jòng màng cau lơi in dòn duh khai. Khai pồ bơtào bol hơ̆ gơs kwang at bồ hơđang oă làng bol, mơ tòmpà ù tiah bol khai in lơh gơs phan ƀàn.

Tŭ tơngai lồi dut

⁴⁰ Tus di tŭ tơngai lồi dut, bơtau đah đơm rơp tòmlơh mơ bơtau đah đang. Bơtau đah đang cèng rơndeh tòmlơh, ling hào ơseh, mơ ơhò tòmlơh, brồ lơh bơtau đah đơm kung be càl rbut dờng. Khai rơp tòmpìt ai oă lơgar, lòt gan tơnroh bol gơ kung be dà kŏ.

⁴¹ Khai kung rơp tòmpìt ai lơgar hàng mơnĕ, mơ oă lơgar rơp kòl tơnroh, mơya Edôm, Môap, mơ ală cau at bồ làng bol Ammôn rơp lik klàs bơh di tê khai.

⁴² Khai rơp pò ơnàng gơnoar pràn khai dê hơđang oă lơgar, mơ lơgar Ejiptơ rơp ò geh lik klàs.

⁴³ Khai rơp gơlik gơs cau at bồ ală phan màng, mơ màh, priă bal mơ jơh ală phan màng Ejiptơ dê. Làng bol Libi mơ làng bol Ethiôpi rơp dòn duh khai.

⁴⁴ Mơya ală jơnau yal tus bơh đah mattơngai lik mơ đah mattơngai mut rơp lơh khai in dơrcul; khai rơp gơhào gơjrañ ngan mơ lik lòt nàng lơh gơprah mơ tơnroh ală gơnoar pràn lơi tòmdră mơ khai.

⁴⁵ Khai rơp bơtào ală hìu sàl cau bơtau tòm digùl dàlềng mơ mơnơm sàng goh hàng mơnĕ. Mơya bơta lồi dut khai dê rơp tus, mơ ò gơs cau lơi rơp dong kòl khai.