Daniel 10 - Sră Goh 2018

Bơta sòdră ală lơgar dê mơ gơnap gơnoar hơđang trồ

¹ Tòm nam dơ̆ pe rài bơtau Sirus, lơgar Persia dê, gơs jơnau yal tơlik Daniel in, kung sơnđan la Beltesassar. Jơnau yal tơlik gơ la ngan, mơ gơyal bơh dô bơta sòdră dờng. Daniel git wă jơnau yal hơ̆, dòp mơ git wă jơnau gơtha tòm bơta gơtơnggŏ.

² Tòm tŭ hơ̆, añ, Daniel, añ ơm moat jrùng ñìm rac tòm pe poh.

³ Añ ò sa phan bơkah, poac mơ tơrnòm ò mut tòm bơr añ, mơ añ ò bong mơñà dô êt lơi jơl tus di tŭ pe poh neh rlau.

⁴ Ngai bàr jơt poan kơnhai dơ̆ dùl, añ ơm ntào di gah hiòng dờng Tigris.

⁵ Añ tơnggòr sền, do, gơs dô nă cau soh bài che dơmài, gùt dar but kơt che but mơ màh Upha.

⁶ Să jan khai dê gơcrà àng be lŭ màng, muh mat be puhlèp, mơ gar mat be ồs sơmpòl, tê mơ jơng be kòng tho goh, mơ sap đơs be jơnau mpồl cau oă dê.

⁷ Añ, Daniel, mìng dô nă añ sền bơta gơtơnggŏ hơ̆, ală cau ơm mơ añ ò gŏ bơta gơtơnggŏ hơ̆, mơya bol khai rngòt rơm să ngan, ntoat dô nàng pồn să.

⁸ Behơ̆, añ ơm wơl dô nă mơ gŏ bơta gơtơnggŏ dờng hơ̆: bơta pràn kơldang lik bơh añ, muh mat añ gơlik pàl be poac cau chơt, mơ añ ò gam pràn tai.

⁹ Gen añ kơno jơnau cau hơ̆ đơs, mơ tòm tŭ añ ơm iat khai, añ gơlơh jơngo sup tòm dơngoh mơ bic blup mat tòm ù.

¹⁰ Tŭ hơ̆ gơs dô nơm mpàng tê ƀư di añ, yò tơngguh añ wơl, añ rơm să rngòt ngan, cùn gơltang mơ dră tê di ù.

¹¹ Cau hơ̆ đơs mơ añ lah: “Ơ Daniel, la cau geh kòñ gơboh ngan, ơn tĕ jơh nùs tồr di ală jơnau añ đơs mơ mê. Mơ ntào tĕ, bơh tŭ do añ neh geh sồr lòt tus hơ mê.” Tòm tŭ khai đơs mơ añ ală jơnau hơ̆ gen añ ñă ntào mơ rơm să ngan.

¹² Gen khai đơs pơnjat tai lah: “Ơ Daniel, bañ rngòt, tài bơh di ngai sơnròp mơ mê neh jơh nùs jòi jat nàng git wă, mơ pơndêt să mê di đap Yàng Tom Trồ mê dê, gen ală jơnau mê dê neh geh kơno, mơ añ neh lòt tus nàng ho wơl mê in.

¹³ Mơya bơtau at bồ lơgar Persia neh kơryan añ tòm bàr jơt dùl ngai; gen Mikael la dô nă tòm ală kwang dờng at bồ, neh lòt tus nàng dong kòl añ tài bơh añ kòl kơryan tềng hơ̆ bơh bơtau Persia.

¹⁴ Tŭ do añ lòt tus nàng yal mê in git bơh ală bơta rơp gơlik gơs di làng bol mê dê tòm ală ngai tơnơ̆, bơh bơta gơtơnggŏ do gơwèt hơ tŭ tơngai òhềt tus.”

¹⁵ Tòm tŭ khai đơs mơ añ ală jơnau hơ̆, añ kun mat tòm ù mơ ơm mŏ mŏ.

¹⁶ Gen bơtau gơs rùp să be dô nă cau ƀư di sơndồi añ, mơ añ pò bơr, rơp sơntòm đơs mơ bơtau ơm di đap añ lah: “Ơ Yàng añ jê, añ kơlôi moat jrùng ò git lơh tài bơh bơta gơtơnggŏ do, mơ añ ò gam tai pràn kơldang.

¹⁷ Ơ Yàng añ jê, mbe añ, dĭ gơna Yàng dê, rgơi đơs mơ Yàng taih? Bơh tòm añ ò gam tai pràn kơldang dô êt lơi, mơ añ kung ò jai tă nhơm tai sơl!”

¹⁸ Gen bơtau gơs rùp să be dô nă cau ƀư tai di añ mơ ai añ in pràn kơldang.

¹⁹ Bơtau hơ̆ đơs mơ añ lah: “Ơ cau geh kòñ gơboh ngan, bañ rngòt, ơm tĕ lơngai. Pràn kơldang mơ khin cha tĕ!” Tòm tŭ Bơtau hơ̆ đơs mơ añ gen añ gơs wơl pràn kơldang mơ đơs lah: “Ơ Yàng añ jê, dan đơs tĕ, bơh Yàng neh ai añ in gơs pràn kơldang.”

²⁰ Gen cau hơ̆ đơs mơ añ lah: “Mê git ñchi bơh tài añ lòt tus hơ mê taih? Tŭ do añ pal rê wơl nàng tòmlơh mơ bơtau at bồ lơgar Persia, mơ tŭ añ lòt tus hơ khai, ne, bơtau Grek rơp tus.

²¹ Mơya añ rơp yal mê in git ală bơta geh cih tòm Sră Jơnau Song. Ò gơs cau lơi dong añ nàng tòmdră mơ bol khai, gơs mìng Mikael la kwang dờng at bồ bol mê dê lơm.”