Cau Bơto 9 - Sră Goh 2018

Dòp rài kis jat be gơ neh tus

¹ Jơh ală bơta do añ neh ơn tòm nùs mơ lòng sơwì gơ: Mbe cau song ring mơ jak chài, bal mơ broă lơh bol khai dê, ơm tòm tê Yàng Tom Trồ; bulah kòñ gơboh hala bơta gơjrañ, ò gơs dô nă cau lơi git; jơh ală bơta rơp ơm tòm toh mat mơ bol khai la bơta roh lơm.

² Jơh ală bơta gơlik tus rài kis cau in ndròm bal: cau song ring hala cau iơh bơsak, cau lơbơn niam mơ cau iơh, cau goh mơ cau ò goh, cau ơn phan ơn duh khoai hala cau ò ơn, cau niam kung be cau gơs glài, cau srat să kung be cau pleh bơh jơnau srat să.

³ Do la dô bơta iơh gơlik gơs hơđơm mattơngai, hơ̆ la kòp nă cau lơh nền rài kis is ndròm bal, gen tàng nùs kòn mơnus bềng lìu bơta iơh, bơta sơnrang sơnrồng ơm tòm nùs bol khai tòm tŭ gam kis, mơ tơnơ̆ mơ tŭ bol khai rê mơ cau chơt.

⁴ Mơya cau lơi ơm tòm mpồl cau kis, gen gam gơs bơta gơn kơnòm; bơh dô nơm so kis la niam rlau mơ klìu triă chơt.

⁵ Cau kis git he rơp chơt; mơya cau chơt ò git ñchi lơi, bol khai ò gam gơs phan ƀàn lơi tai, mơ tian gơs bơta kirsơnre bơh bol khai neh roh rau.

⁶ Bơta kòñ gơboh bol khai dê, bơta gơjrañ bol khai dê, mơ bơta ƀoah pơrhiat bol khai dê neh roh rui rau; bol khai ò gơs tŭ lơi gam gơs pơnah lơi tòm ală bơta gơlik gơs hơđơm mattơngai.

⁷ Lòt tĕ sa ƀañ mê dê dô bă hòn chò, mơ ñô tơrnòm dô bă hừh nùs; bơh Yàng Tom Trồ dòp ală broă lơh mê dê neh jŏ jòng rau.

⁸ Lòi tĕ ào jrùh mê dê bò sùm, bañ lòi siơ̆u mơñà hơđang bồ mê.

⁹ Hòn chò tĕ rài kis mơ bau ùr mê kòñ gơboh, jơh ală ngai tòm rài roh lơm mê dê, mơ mê neh dòp geh hơđơm mattơngai, tài bơh hơ̆ la pơnah mê dê tòm rài kis do, mơ la bơta mê geh bơh broă lơh mê dê mơ mê neh kong bòl glar hơđơm mattơngai.

¹⁰ Jơh ală broă tê mê jòi nàng lơh, lơh tĕ dô bă jơh pràn mê dê; bơh tòm lơgar làng ƀồc, la tiah mê lòt tus, ò gơs broă lơh, ò gơs kơlôi sơnơng, ò gơs bơta git wă hala bơta jak chài.

Bơta jak chài ò geh lơngai sùm

¹¹ Añ gŏ tai hơđơm mattơngai gơs cau ntoat pơrlòng ò mhar, hala cau pràn kơldang ò geh pha tòm bơta tòmlơh, cau jak chài ò geh piang lă, cau pas gơs ò dòp geh jak chài, mơ cau chài rgơi ò geh nđàc; bơh tŭ tơngai mơ tŭ lơmpah gơlik tus kòp nă cau in.

¹² Mơ tai, ò gơs dô nă cau lơi rgơi git lài tŭ tơngai bơta rung rài dê; be ka yar tòm bơtơng iơh, sềm yar dă, gen jơi kòn mơnus kung gơkòl yar tòm tŭ tơngai bòl glar nisơna tus hơđang bol khai behơ̆ sơl.

¹³ Añ kung neh gŏ bơta pơnyơu bơh jak chài do ơm hơđơm mattơngai, gơlơh be dờng màng añ in.

¹⁴ Gơs dô nơm ƀòn dềt ne gơs dô êt làng bol ơm tòm hơ̆, dô nă cau bơtau dờng tus gơrwàng tòmdră mơ gơ, bơt ală dơrñang dờng jơnhoa tòmdră mơ gơ.

¹⁵ Mơ tai, tòm ƀòn hơ̆ gơs dô nă cau rƀah mơ jak chài, bơh bơta jak chài khai dê mơ dong tă ƀòn hơ̆; mơya ò gơs cau lơi kah wơl cau rƀah hơ̆.

¹⁶ Behơ̆ añ đơs lah: Bơta jak chài niam rlau mơ pràn kơldang; mơya bơta jak chài cau rƀah dê kong sền òsơp, mơ jơnau đơs khai dê cau ò ai tồr iat.

¹⁷ Jơnau đơs lơbơn cau jak chài dê geh cau iat, rlau mơ jơnau driau nggà dô nă cau at bồ digùl ală cau bơrngơl gơla.

¹⁸ Bơta jak chài niam rlau mơ ală phan tòmlơh; mơya dô nơm bơta tìs nrah tơnroh oă bơta niam.