Cau Bơto 8 - Sră Goh 2018

Pal dòn duh cau bơtau mơ hừh nùs

¹ Ñcau ndròm be cau jak chài taih? Ñcau git yal tơlik jơnau gơtha dô nơm phan taih? Bơta jak chài pơnđàng sòl muh mat cau, mơ tòmgơl muh mat kràñ cê.

² Añ tơngkah lah: Prap gàr tĕ gơnoar sồr cau bơtau dê, tài bơh jơnau srat să mơ Yàng Tom Trồ mê dê.

³ Bañ rngòt rngơt mơ lik lòt bơh di đap cau bơtau; bañ lơh òbat tòm tŭ gơs bơta ò niam nùs bơtau, bơh bơtau lơh bơta lơi bơtau niam nùs.

⁴ Bơh jơnau đơs cau bơtau dê gơs gơnoar ngan; mơ ñcau khin đơs mơ khai lah: “Ñchi mê lơh taih?”

⁵ Cau lơi lơh jat gơnoar sồr bơtau gen ò tìp bơta iơh lơi, mơ nùs cau jak chài git tŭ tơngai mơ git gùng dà.

⁶ Bơh jơh ală bơta lơi gơlik tus gơs tŭ tơngai mơ gùng dà gơ dê, bulah bơta bòl glar kòn mơnus klơn kơnjơ̆ hơđang bol khai.

⁷ Ngan behơ̆, bol khai ò git ñchi bơta rơp gơlik tus; ñcau rgơi yal lài bol khai in ală broă rơp gơlik tus taih?

⁸ Ò gơs cau lơi gơs gơnoar hơđang nhơm tă nàng prap gơ wơl kung ò gơs gơnoar hơđang ngai chơt; ò gơs cau lơi pleh klàs bơh bơta tòmlơh hơ̆; bơta iơh bơsak ò dong klàs ală cau lơh jat gơ.

⁹ Añ neh sền sơwì gŏ ală bơta hơ̆; añ ơn nùs kơlôi sơnơng bơh ală broă lơh hơđơm mattơngai. Tòm tŭ dô nă cau gơs gơnoar hơđang cau ndai mơ lơh jê sồt cau hơ̆.

Gùng dà Yàng Tom Trồ dê ò rgơi git wă

¹⁰ Gen añ neh gŏ ală cau iơh bơsak chơt mơ geh tơp, bol khai òs mut mơ lik bơh tiah sàng goh, mơ jòng ro tòm ƀòn dờng la tiah bol khai neh lơh ală bơta behơ̆. Hơ̆ kung la dô bơta roh lơm.

¹¹ Tài bơh ò lơh nền glài tòmdră mo mơ ală broă iơh, gen tàng nùs kòn mơnus jak lơh bơta iơh.

¹² Bulah cau glài lơh iơh dô rhiang dơ̆ gam geh kis jŏ; bulah behơ̆, añ git lah cau duh rngòt di đap Yàng Tom Trồ, lồi dut rơp geh lơngai, tài bơh bol khai ntào tòm bơta duh rngòt di đap Yàng Tom Trồ.

¹³ Mơya cau iơh bơsak rơp ò geh lơngai; kung rơp ò geh kis jŏ, bơh rài kis kung be mƀur; tài bơh khai ò ntào tòm bơta duh rngòt di đap Yàng Tom Trồ.

¹⁴ Gơs dô bơta roh lơm hơđang ù, hơ̆ la gơs ală cau song ring kong tơm jat be broă lơh cau iơh dê, mơ gơs ală cau iơh geh tơm wơl jat broă lơh cau song ring dê. Añ đơs lah hơ̆ kung la dô bơta roh lơm.

¹⁵ Behơ̆ añ tòmbơyai bơh bơta hòn chò, bơh ò gơs bơta lơi niam rlau kòn mơnus in ơm hơđơm mattơngai la sa, hùc, mơ lơh să tòm bol khai in hòn chò; bơh ală bơta hơ̆ rơp lòt bal mơ bơta bòl glar tòm ală ngai tòm rài kis mơ Yàng Tom Trồ ai bol khai in hơđơm mattơngai.

¹⁶ Tòm tŭ añ ơn nùs nàng bơtê git bơta jak chài, nàng sền ală broă neh lơh hơđang plai ù, gen añ gŏ gơs cau mat ò geh bic jơh mang mơ ngai,

¹⁷ gen añ kung gŏ jơh ală broă lơh Yàng Tom Trồ dê, mơ ò gơs dô nă cau lơi rgơi jòi bàn ală bơta gơlik gơs hơđơm mattơngai, bulah bol khai kong bòl glar kàr lơi nàng jòi, kung ò rgơi jòi geh; mơ bulah cau jak chài dan nàng git, bol khai kung ò rgơi jòi bàn.