Cau Bơto 3 - Sră Goh 2018

Yàng Tom Trồ lơh nền tŭ tơngai ală jơi phan in

¹ Bơh bơta lơi kung gơs kơnhai sơnam; mơ gơs dô tŭ lơh nền ală broă ơm tòm tiah trồ.

² Gơs tŭ deh, mơ gơs tŭ chơt; gơs tŭ tam, gơs tŭ dus phan neh tam;

³ Gơs tŭ tơnchơt, mơ gơs tŭ sơmbòi; gơs tŭ phà tơrlah, mơ gơs tŭ bơt bơtào;

⁴ Gơs tŭ ñìm, mơ gơs tŭ ñŏ; gơs tŭ rac ròc, mơ gơs tŭ tòmya;

⁵ Gơs tŭ sơrbì lŭ, mơ gơs tŭ tơrgòm lŭ wơl; gơs tŭ kơnđơt kơnđu, mơ gơs tŭ sang lòi;

⁶ Gơs tŭ jòi bàn, mơ gơs tŭ roh; Gơs tŭ prap gàr mơ gơs tŭ sang sơrbì;

⁷ Gơs tŭ crè, mơ gơs tŭ jing wơl; gơs tŭ ơm mŏ mŏ, gơs tŭ đơs;

⁸ Gơs tŭ kòñ gơboh, mơ gơs tŭ gơjrañ; gơs tŭ kơlìn gơtoă, mơ gơs tŭ ring lơngai.

⁹ Ñchi gơs kwơ cau lơh broă bòl glar bol khai dê taih?

¹⁰ Añ neh gŏ broă lơh mơ Yàng Tom Trồ ai kòn mơnus in jơh tơl nă giga nàng lơh.

¹¹ Bơh Kơnràñ neh lơh gơs jơh ală bơta tòm toh di tŭ gơ dê. Mơ bơh hơ̆ Kơnràñ neh ơn bơta jak chài tòm tŭ neh rlau mơ tŭ rơp tus tòm dơngoh kòn mơnus; bulah behơ̆, bol khai ò rgơi jòi bàn ală broă Yàng Tom Trồ neh lơh bơh sơnròp jơl tus lồi dut.

¹² Behơ̆, añ git lah ò gơs bơta lơi niam rlau kòn mơnus in la chò hòp mơ hòn chò jơl jơh rài kis bol khai dê.

¹³ Mơ rlau mơ hơ̆ tai la Yàng Tom Trồ ai gòi jơh ală cau lơi in pal sa, hùc, mơ dòp ală bơta lơh niam nùs tòm jơh broă lơh bòl glar bol khai dê.

¹⁴ Añ git lah kòp nơm broă Yàng Tom Trồ neh lơh gơs gen gam gơs sùm sùm; ò gơs bơta lơi rgơi ƀơ̆ ƀơl gơ in, hala kung ò gơs bơta lơi rgơi pơndut bơh gơ; Yàng Tom Trồ lơh bơta hơ̆, nàng lơh jơh kòn mơnus ntào duh rngòt di đap Kơnràñ.

¹⁵ Bơta lơi neh gơs, neh gơs bơh yau rau, bơta lơi rơp gơlik tus, neh gơlik tus jŏ jòng rau: Yàng Tom Trồ kư̆ lơh wơl ală broă neh gơlik bơh yau.

Bơta cahrña mơ ngai rơp tus gơrê hơ Yàng Tom Trồ

¹⁶ Añ gam gŏ hơđơm mattơngai, hơ̆ la tòm tiah cahrña gơs bơta iơh bơsak, mơ tòm tiah at bơta song ring gơs bơta ò song ring.

¹⁷ Gen añ đơs tòm nùs lah: “Yàng Tom Trồ rơp cahrña cau song ring mơ cau iơh bơsak; bơh gơs bơta lơh nền tŭ tơngai kòp broă mơ kòp bơta in.”

¹⁸ Añ đơs wơl tòm nùs lah: Sền tĕ di jơi kòn mơnus Yàng Tom Trồ lòng bol khai, mơ sơnio bol khai in git lah bol khai ò rlau mơ jơi phan poan jơng.

¹⁹ Bơh rài kis jơi kòn mơnus dê mbe lơi, gen rài kis jơi phan poan jơng kung behơ̆ sơl; bơta chơt jơi do dê kung be bơta chơt jơi ne dê. Bol khai gơs nhơm tă ndròm bal, jơi kòn mơnus ò rlau mơ jơi phan poan jơng, bơh jơh ală la roh lơm.

²⁰ Jơh ală gen gơrê bal dô bă tiah; jơh ală la bơh kơmbuh ù mơ gơlik gơs gen jơh ală rơp rê wơl hơ kơmbuh ù tai.

²¹ Ñcau rgơi git hwềng soàn jơi kòn mơnus geh cèng guh hơđang, hala hwềng jơi phan poan jơng mù hơđơm ù taih?

²² Behơ̆ gen, añ gŏ ò gơs bơta lơi niam rlau jơi kòn mơnus in la chò hòp tòm broă lơh he dê; hơ̆ la pơnah broă tòm bol khai dê; bơh ñcau rơp cèng bol khai rê wơl nàng sền gŏ bơta rơp gơlik tus tơnơ̆ he taih?