Cau Bơto 2 - Sră Goh 2018

Bơta lơngai, hòn chò, pas gơs, mơ jơh ală broă lơh kung la roh lơm

¹ Añ đơs mơ să tòmlah: “Tŭ do tus tĕ, añ rơp lơh dô bơta lòng niam nùs mơ lơh hòn chò să tòm mê in.” Mơya dô dơ̆ tai, bơta hơ̆ kung la roh lơm.

² Añ đơs: “Ñŏ la sơnrang,” mơ bơta lơh chò niam nùs: “Ñchi kwơ taih?”

³ Añ kơlôi tòm nùs lah pal lơh poac să añ jê geh hòn chò bơh alak tơrnòm, mơ dơngoh añ gam tề lam añ mơ bơta jak chài, nùs añ, mơ mbe lơh nàng at kơ̆ di bơta tùl gơla, jơl tus di tŭ añ sền gŏ bơta lơi la niam nàng jơi kòn mơnus in lơh hơđơm trồ do, tòm dô êt ngai tòm rài kis bol khai dê.

⁴ Añ lơh ală broă dờng; añ bơt bơtào ală hìu, tam ală suơn ño să tòm añ in,

⁵ lơh gơs ală suơn mơ suơn bơkào añ in, mơ tam tơl ală chi sa plai tềng hơ̆;

⁶ Añ tò tơnau dà nàng tuh dà dơr brê in, la tiah hòn chi che.

⁷ Añ blơi ală dĭ klau dĭ ùr; mơ kung gơs oă cau duh broă neh deh tòm hìu añ. Añ gơs mpồl kơnrồ mơ belàt oă rlau mơ jơh ală cau lài mơ añ tòm Jerusalem.

⁸ Añ kung tơrgòm prap màh priă, mơ ală phan màng ală cau bơtau dê, mơ ală ƀòn dờng. Añ gơs ală cau đơs chò, cau ùr mơ cau klau, bal mơ bơta hừh nùs tòm poac să mơ oă bau ùr cồng.

⁹ Behơ̆ añ gơlik gơs dờng màng rlau mơ jơh ală cau lài mơ añ tòm Jerusalem; bulah behơ̆, bơta jak chài añ jê kung gam ơm bal mơ añ.

¹⁰ Bơta lơi mat añ hàm kòñ añ ò pleh bơh gơ, kung ò prap gàr nùs añ jê bơh bơta lơi niam nùs añ; bơh nùs añ jòi bơta chò hòp bơh ală broă lơh añ jê; mơ hơ̆ la phan ƀàn añ jê bơh ală broă lơh añ jê.

¹¹ Gen añ sền sơwì ală broă tê añ neh lơh, mơ bơta bòl glar he neh kong nàng lơh; mơ dô dơ̆ tai jơh ală bơta hơ̆ la roh lơm mơ jat dô ròs càl khồm, mơ ò gơs kwơ dô êt lơi hơđơm mattơngai.

Bơta jak chài mơ bơta hòn chò geh ai cau lơi niam nùs Yàng Tom Trồ

¹² Gen añ wơlke nàng sền sơwì bơta jak chài, bơta bơrngơl gơla, mơ bơta sơnrang sơnrồng; bơh cau lơi tus tơnơ̆ cau bơtau rgơi lơh ñchi lơi taih? Mìng lơh bơta neh lơh sir rau.

¹³ Gen añ gŏ bơta jak chài lin rlau mơ bơta bơrngơl gơla, kung be bơta àng lin rlau mơ bơta klam jơngo.

¹⁴ Cau jak chài gơs gar mat tòm bồ bol khai dê, mơya cau tùl gơla cơnđòa lòt tòm bơta klam jơngo. Bulah behơ̆, añ sền gŏ jơh bàr gơs dô rài kis gơlik tus ndròm bal.

¹⁵ Gen añ neh đơs mơ să tòm añ lah: Bơta neh gơlik tus cau gơla in, rơp gơlik tus añ in sơl; gen ñchi bơh tài añ neh gơs bơta jak chài oă ir taih? Mơ añ đơs mơ să tòm añ lah: Bơta hơ̆ kung la dô bơta roh lơm.

¹⁶ Bơh ò gơs cau kah cau jak chài hala cau bơrngơl gơla sùm sùm; sền gŏ bơta hơ̆ tòm ngai rơp tus jơh tơl nă neh gơkòl hŭi jŏ jòng rau. Mbe cau jak chài rgơi chơt kung be ală cau bơrngơl gơla taih?

¹⁷ Behơ̆, añ gơjrañ rài kis, tài bơh ală broă lơh gơs hơđơm mattơngai la jê sồt bòl glar añ in, bơh jơh ală la roh lơm, jat dô ròs càl khồm.

¹⁸ Añ kung gơjrañ ală broă bòl glar añ neh lơh hơđơm mattơngai, bơh ală bơta hơ̆ pal lòi wơl cau tus tơnơ̆ añ in.

¹⁹ Bulah behơ̆, ñcau git lah bol khai rơp gơlik cau jak chài hala bơrngơl gơla? Bulah bol khai rơp gơlik gơs cau tòm at bồ ală broă bòl glar añ neh lơh mơ ngui bơta jak chài añ jê hơđơm mattơngai. Bơta hơ̆ kung la roh lơm.

²⁰ Tài behơ̆ añ gơplơ̆ nùs bơh bơta roh gơn kơnòm bơh ală broă bòl glar añ neh lơh hơđơm mattơngai.

²¹ Tài bơh gơs cau lơh broă bòl glar mơ bơta jak chài, àng loh, mơ chài rgơi pal sang lòi jơh ală bơta cau ndai in la cau ò kong lơh broă bòl glar bơh gơ. Bơta hơ̆ kung la dô bơta roh lơm, mơ dô bơta iơh dờng ngan.

²² Ñchi kòn mơnus geh bơh jơh ală broă lơh bòl glar mơ dơrcul mơ broă bòl glar bol khai dê hơđơm mattơngai taih?

²³ Bơh ală ngai khai mìng la jê sồt, tơngai broă khai gơlik gơs moat jrùng; tian gơs tòm trồ mang nùs khai kung ò geh ơm rlô. Bơta hơ̆ kung la dô bơta roh lơm.

²⁴ Ò gơs bơta lơi niam rlau kòn mơnus in la sa mơ hùc, mơ jòi bơta hòn chò tòm broă lơh bòl glar bol khai dê. Añ sền gŏ bơta hơ̆ kung bơh tê Yàng Tom Trồ mơ tus.

²⁵ Bơh rlau mơ añ ñcau la cau geh ngui sa mơ dòp leng bơta hòn chò taih?

²⁶ Bơh Yàng Tom Trồ ai bơta jak chài, àng loh, mơ bơta chò hòp cau lơi in geh niam nùs Kơnràñ; mơya Kơnràñ ai cau glài in broă lơh mơ tơrgòm prap, mìng ai cau lơi in geh niam nùs Yàng Tom Trồ. Bơta hơ̆ kung la bơta roh lơm, jat dô ròs càl khồm.