Cau Bơto 12 - Sră Goh 2018

¹ Kah tĕ Bơtau crơng gơs mê dê, tòm ală ngai mê gam kơnòm să lài mơ tŭ ală ngai bòl glar kalke tus, mơ lài mơ tŭ ală sơnam tus rềp, mơ mê rơp đơs lah: “Añ ò niam nùs bơh gơ;”

² Lài mơ tŭ mattơngai mơ bơta àng, mat kơnhai, mơ ală sơmañ klam jơngo, mơ mhwal rê wơl cèng dà mìu;

³ Tòm ngai hơ̆ cau sền gàr hìu rơm să, ală cau pràn kơldang kun but, mơ ală cau ùr piah di mpal ơm dơh wơl tài bơh dô êt cau, mơ ală cau sền gan di mpồng dềt gŏ lu li.

⁴ Tòm tŭ ală mpồng dềt di gah gùng til wơl, mơ sap cau piah òsô tai; cau kah rngal tòm tŭ kơno sềm nrau, mơ sap ală kòn ùr đơs chò mòr lồi nhơm;

⁵ Cau rngòt rngơt tòm tŭ guh hơđang tiah jơnhoa, mơ kìr rngòt tòm tŭ lòt gùng; tŭ hơ̆ chi gus gơlik bơkào, srah nting cơnđòa lòt kơnjơ̆ kơnjut, mơ bơta kơp kòñ ò gam tai; Tài bơh jơh tơl nă cau pal lòt tus hơ hìu gam sùm sùm bol khai dê, ai ală cau ñìm ƀồc lòt gùt dar tòm gùng.

⁶ Lài mơ tŭ che priă tac, mơngàn màh bơcah, lài mơ tŭ yang bơcah di gah croh dà, mơ kong rơndeh pă hơđang tơrlung;

⁷ Mơ kơmbuh ù rê wơl mơ ù kung be bơh sơnròp gơ la ù, mơ hwềng soàn rê wơl mơ Yàng Tom Trồ, la Bơtau neh ai gơ.

⁸ Cau bơto đơs lah: Roh lơm bơta roh lơm dê; jơh ală la roh lơm.

Jơnau crap wơl

⁹ Rlau mơ bơta jak chài neh gơs, cau Bơto kung neh bơto làng bol in bơta git wă, khai neh git kơr sơnoa, mơ bơtê git mơ rơndap oă sèng pơnđik.

¹⁰ Cau bơto neh jơh nùs jòi jat ală sèng pơnring niam mơnĕ; mơ khai neh cih ală jơnau song mơ song ngan.

¹¹ Jơnau đơs cau jak chài dê be dô nơm mơng pù tơmàl; be dô nơm đìn pơng kơ̆ ngan ală jơnau rơndap ală sèng pơnđik dê, neh geh ai gơ bơh dô nă cau ê belàt.

¹² Mơ tai, ơ kòn kơrhia tĕ bơh bơta lơi sơrlèt rlau mơ bơta bơto do, cau cih oă sră ò lồi; mơ cau bơtê oă lơh bòl glar poac să.

¹³ Jơnau crap wơl bơh ală bơta neh gơlik gơs neh geh kơno do: Duh rngòt tĕ Yàng Tom Trồ mơ prap gàr ală bơta sồr lam Kơnràñ dê; hơ̆ la broă tòm wil tơl jơh tơl nă dê.

¹⁴ Bơh Yàng Tom Trồ rơp cèng jơh ală broă lơh nàng cahrña, mơ jơh ală broă ndơp ndơr rlau jơh, bulah niam hala iơh.