Cau Bơto 10 - Sră Goh 2018

Ală bơta kơlôi sơwì ndai

¹ Dô nơm rhài chơt lơh ƀô ồm mơñà ƀô bơlhu cau chài crài gơ, kung behơ̆ sơl dô êt bơrngơl lơh ƀơ̆ sơnđan cau jak chài ryŭ ryơm.

² Plai nùs cau jak chài ơm đah ma; ai plai nùs cau bơrngơl ơm đah kiau.

³ Bulah tòm tŭ lòt gùng cau bơrngơl siơ̆u bơta git wă; mơ sơnio kòp nă cau in git bol khai la ală cau bơrngơl.

⁴ Dilah cau at bồ gơhào gơjrañ mơ mê gen bañ lik bơh tiah ơm mê dê; bơh bơta ring ngềt kơryan bơta tìs tòm glài dờng.

⁵ Gơs dô bơta iơh rmơh mơ añ neh gŏ hơđơm mattơngai, be dô bơta gơtup tìs tus bơh cau at bồ:

⁶ hơ̆ la cau tùl gơla geh ơn tòm broă dờng jơnhoa, ai cau pas gen nggui tòm tiah liah.

⁷ Añ neh gŏ cau dĭ gơna hào hơđang ơseh, ai cau kwang dờng lòt jơng be cau dĭ gơna.

⁸ Cau lơi tò trồm rơp gơdùh tềng hơ̆, ai cau phà tơrlah dơrñang rơp kong bơs kap.

⁹ Cau lơi pơrlă lŭ bơh di tiah gơ dê, rơp kong jê sồt bơh gơ; cau blah lòng digơlan pal kong sơbơng roh bơh gơ.

¹⁰ Dilah sùng luh mơ cau ò tồl wơl, gen pal kong roh oă pràn, mơya bơta jak chài dong cau geh cồng nha.

¹¹ Dilah bơs kap lài mơ tŭ lơh tơlhơu, gen cau bơjơu lơh ò kwơ dô êt lơi.

¹² Jơnau đơs bơh bơr cau jak chài gơs bơta nđàc jat tơnơ̆; mơya sơndồi cau tùl gơla chu pơrguc wơl khai.

¹³ Jơnau đơs bơr bol khai dê, rơp sơntòm mơ bơta bơrngơl gơla, mơ jơnau lồi dut bol khai dê la sơnrang sơnrồng iơh bơsak.

¹⁴ Cau tùl gơla jak đơs oă jơnau; ò gơs cau lơi git ñchi rơp gơlik tus; mơ ñcau rơp yal tơlik cau lơi in bơta rơp gơlik tus tơnơ̆ taih?

¹⁵ Broă lơh bòl glar cau bơrngơl gơla lơh bòl glar bol khai in, bơh bol khai ò tŭ lơi git gùng lòt tus hơ ƀòn dờng.

¹⁶ Dồn sa mê in, ơ lơgar tòm tŭ cau bơtau mê dê gam kơnòm dềt, mơ ală cau kwang at bồ ñô sa tòm tŭ àng drim!

¹⁷ Ơ lơgar, lơngai mê in tòm tŭ cau bơtau la dô nă cau dờng màng, mơ ală cau kwang dờng at bồ mê sa di di jơ, nàng geh pràn, mơ ò di nàng bơñul lơmbè!

¹⁸ Tài bơh tê lơh alah gen rkàng hìu tơrlơm; bơh tê òbat nyà gen hìu ñhat.

¹⁹ Cau yò sào dờng nàng ñŏ; alak tơrnòm lơh rài kis in chò hòp; gơs jền priă gen geh ală bơta pal càng.

²⁰ Bañ srat rma cau bơtau, bulah tòm bơta kơlôi sơnơng mê dê. Bañ srat rma cau pas gơs; bulah tòm cơnòng bic mê dê; bơh sềm tòm pah gòi rơp cèng jơnau đơs mê, mơ jơi gơs pơnđar rơp yal wơl bơta gơlik gơs hơ̆.