Broă 8 - Sră Goh 2018

Sol kup kơryan Hìu Jum Goh

¹ Sol dô nùs bal tòm bơta tơnchơt Etien. Tòm ngai hơ̆, Hìu Jum Goh tòm Jerusalem gơtìp bơta kup kơryan dờng ngan; jơh ală cau dòn Yàng dô nrah nring tòm làm lơgar Jude mơ lơgar Samari, gam mìng ală cau gơnoar bơto dờng lơm.

² Gơs ală cau dòn duh tơp ƀồc Etien mơ ñìm pơt wòl rac ròc ngan di khai.

³ Mơya Sol lơh gơprah gơpring Hìu Jum Goh, mut sò tơm ală hìu, kup ală cau klau cau ùr jàm jơh.

Jơnau Yàng geh bơto yal tòm Samari bơjơu Simôn

⁴ Behơ̆ ală cau neh dô nrah nring hơ̆ lòt bơh tiah do tus hơ tiah ndai, bơto yal jơnau Yàng.

⁵ Philip mù hơ ƀòn dờng Samari mơ bơto yal bơh Bơtau Krist làng bol tềng hơ̆ in.

⁶ Mpồl làng bol kơno Philip bơto mơ gŏ ală tềl krơi khai lơh, gen gơs dô nùs bal wèt tồr iat jơnau khai đơs,

⁷ tài bơh gơs ală hwềng cà ƀơ̆ driau dờng lik bơh di oă cau gơ neh lơh; oă cau gơlte bal mơ cau pă geh sơmbòi.

⁸ Gen tàng tòm ƀòn dờng hơ̆ bềng lìu bơta hòn chò.

⁹ Mơ tai, tòm ƀòn dờng hơ̆ gơs dô nă cau sơnđan la Simôn, bơh lài khai la cau juh proh, dòp is să he la cau dờng màng, lơh làng bol Samari in ai lơh crih crài.

¹⁰ Jơh ală cau, bơh cau kơnòm tus di cau kra, iat jơnau Simôn mơ đơs lah: “Cau do la gơnap gơnoar Yàng Tom Trồ dê, sơnđan la gơnap gơnoar Dờng.”

¹¹ Bol hơ̆ iat jơnau khai, bơh neh jŏ rau khai lơh bol hơ̆ in ai lơh crih crài bơh bơta juh proh khai dê.

¹² Mơya dơ̆ bol hơ̆ neh dòn Philip bơto yal Jơnau Niam lơgar Yàng Tom Trồ dê mơ sơnđan Yàng Jesu Krist dê, gen ală cau klau cau ùr gơs ƀaptem.

¹³ Să tòm Simôn kung dòn sơl, mơ tòm tŭ neh gơs ƀaptem rau, gen ơm tơn bal mơ Philip; khai gŏ ală tềl krơi mơ ală bơta crih crài dờng neh lơh gơs, gen ai lơh crih crài.

¹⁴ Ală cau gơnoar bơto dờng ơm tòm Jerusalem kơno làng bol Samari neh dòp jơnau Yàng Tom Trồ dê, gen sồr Pier mơ Jang lòt tus hơ bol khai.

¹⁵ Bàr nă bol khai neh tus tềng hơ̆ rau gen hòi dan bol hơ̆ in tồ geh dòp Yàng Hwềng Goh,

¹⁶ bơh Yàng Hwềng Goh òhềt mù hơđang dô nă cau lơi tòm ală cau hơ̆, bol khai mìng ai sơnđan Yàng Jesu nàng gơs ƀaptem lơm.

¹⁷ Pier mơ Jang ơn tê hơđang bol khai gen bol khai dòp geh Yàng Hwềng Goh.

¹⁸ Tòm tŭ Simôn gŏ bàr nă cau gơnoar bơto dờng ơn tê gen Yàng Hwềng Goh mù, chòp khai ơn priă mơ đơs lah:

¹⁹ “Dan ai añ in gơnoar hơ̆ nàng añ ơn tê hơđang cau lơi gen cau hơ̆ dòp geh Yàng Hwềng Goh.”

²⁰ Mơya Pier ho lah: “Lòi tĕ priă mê gơ roh rui bal mơ mê, tài bơh mê tồnlah ai jền priă rgơi rwat bơta ai gòi Yàng Tom Trồ dê!

²¹ Mê ò gơs pơnah lơi hala tòmpà bal tòm broă do, tài bơh nùs mê ò song di đap Yàng Tom Trồ.

²² Behơ̆ gơjrañ sang glài tĕ bơh bơta iơh bơsak mê dê, mơ hòi dan mơ Yàng, tồ bơta kơlôi nùs mê dê hơ̆ digơlan geh toh mê in.

²³ Bơh añ gŏ mê gam ơm tòm plai mat bơtang mơ tòm sreng bơta tồi glài iơh bơsak dê.”

²⁴ Simôn ho lah: “Dan ală ồng hòi dan mơ Yàng añ in ƀà, tồ añ ò gơkòl tòm bơta ală ồng neh đơs hơ̆.”

²⁵ Tơnơ̆ mơ tŭ neh lơh cơng mơ yal jơnau Yàng dê, Pier mơ Jang rê wơl hơ Jerusalem, rê ndang bơto yal jơnau niam ndang tòm oă ƀòn cau Samari dê.

Cau kwang kơndời Ethiôpi dòn Yàng

²⁶ Tŭ hơ̆, gơs dô nă cau gơnrơh Yàng dê đơs mơ Philip lah: “Ntào tĕ lòt hơ đah đơm, tòm gùng bơh Jerusalem mù hơ Gaja. Gùng hơ̆ ngềt ngơt ngan.”

²⁷ Khai ñă mơ lòt. Ne, gơs dô nă cau kwang kơndời Ethiôpi, gơs gơnoar dờng duh broă Kandas, la bơtau ùr lơgar Ethiôpi, at bồ jơh ală đam jàr mò dê, khai neh lòt tus hơ Jerusalem nàng duh khoai Yàng.

²⁸ Tòm tŭ rê wơl, khai nggui hơđang rơndeh mơ sền sră cau gơnoar hwơr Esai.

²⁹ Yàng Hwềng đơs mơ Philip lah: “Tus tĕ rềp mơ lòt jat rơndeh hơ̆.”

³⁰ Philip ntoat tus, kơno khai sền tòm sră cau gơnoar hwơr Esai, gen đơs lah: “Ồng git wă jơnau ồng sền hơ̆ sơl?”

³¹ Khai ho lah: “Dilah ò gơs cau lơi sơnio añ in, gen mbe añ rgơi git wă taih?” Khai jà Philip hào rơndeh nggui bal mơ khai.

³² Tap Sră Goh khai sền la be do: “Khai neh kòl cau lam be belàt lòt tus di tiah cau lơh poac, Be belàt kòn kloat di đap cau siat sơnò, Khai kung ò tŭ lơi pò bơr.

³³ Tòm tŭ Khai kong dơñŏ tơnhial, gen bơta song ring neh kòl tă tòmpìt rau. Ñcau rgơi đơs bơh jơi bơtiàn khai dê taih? Bơh bơta kis Khai dê neh kòl tă tơlik bơh di ù rau.”

³⁴ Cau kwang kơndời hơ̆ đơs mơ Philip lah: “Añ dan lùp ồng, cau gơnoar hwơr neh đơs bơta hơ̆ nàng sơnio bơh ñcau taih? Bơh să tòm khai dê, hala bơh cau lơi ndai taih?”

³⁵ Behơ̆ Philip pò bơr rơp sơntòm bơh tap Sră Goh hơ̆ mơ bơto yal Jơnau Niam bơh Yàng Jesu khai in.

³⁶ Tòm tŭ bàr nă bol khai lòt rò gùng, tus di tiah gơs dà, gen cau kwang kơndời hơ̆ đơs lah: “Do gơs dà do, gơs bơta lơi kơryan añ gơs ƀaptem sơl?” [

³⁷ Philip đơs lah: Dilah ồng jơh nùs dòn gen di. Cau kwang kơndời ho lah: Añ dòn Yàng Jesu Krist la Kòn Yàng Tom Trồ dê.]

³⁸ Khai sồr dơh wơl rơndeh, lồc behơ̆ bàr nă bol khai mù tòm dà, gen Philip lơh ƀaptem khai in.

³⁹ Tòm tŭ bol khai guh bơh dà, gen Hwềng Yàng dê cèng Philip lòt thit; cau kwang kơndời hơ̆ ò gŏ tai khai, mơ kư̆ hòn chò lòt gùng.

⁴⁰ Ai Philip gen cau gŏ ơm tòm Ajôtus; tòm gùng lòt tus hơ Sesare, khai bơto yal Jơnau Niam tòm làm jơh ală ƀòn dờng mơ khai neh lòt gan.