Tiito 1 - INDAGANO INYA:YA

Okuke:sya

¹ Anye Paulo, omugaya wa Nyamuanga na intumwa ya Yesu Kristo, kurwo kwikirisya kwa basorwa ba Nyamuanga, bamenye ebye cimari binu bi:ire oburenge:resi.

² Mu kwiikanya kwo buanga bwa kajanende, bunu Nyamuanga aragire anu amagoro ga kajanende gacari kubao, ka niwe atakutura kubebeya.

³ Nawe e:resisye omusango gwae mu mwanya gwae mu busimusi bunu nabi:kisi:bwe anye, rwa kutyo Nyamuanga Omukisya weswe aragiriye.

⁴ Ku Tito, omwana wani kata mu kwikirisya kweswe bo:ne. Ecigongo no murembe bibega kwawe, binu ebiso:ka ku Nyamuanga Rata na ku Kristo Yesu Mukisya weswe.

Ebya bakaruka ba ikanisa

⁵ Kwonakorere ninkusiga mu Kerete, ukorereki ucumega binu byasigariye, utega abakaruka mu misi jo:ne, rwanye kutyo nakuragiriye.

⁶ Omu:nu wo:ne akaba atariko esoro, omurume wo mugasi umwi, ari na ba:na banu abe:kirisya, banu batakubu:rwa ati ni bamagwemagwe amwi banyato:roba.

⁷ Okuba omukaruka kumwiire kuba atariko esoro, okuba ni mubi:ki wa Nyamuanga. Abe mu:nu atari mukome:e, atari we:sungu, atari mukorwa, atari mubumi, atakurigira mabona.

⁸ Nawe abega mukumi wa bagenyi, unu kenda ebire:si, unu ke:baririra, no murenge:resi, no mweru, na mwirindi.

⁹ Abe unu karumya omusango mwiikanyibwa rwa kutyo e:igisibwe, korereki aturega okukomeresya mu kwiigisya kunu kwimire, no kubaiga aba jimamba.

Ebya be:igisya bo rurimi

¹⁰ Okuba bario ba:fu banyato:roba, banu aba:ika ebya kutyo era, banu ababebeya, mwabo ba:fu ni bo rutendo.

¹¹ Abo be:ire okusibwa eminwa, okuba abo nibo abafumbika misi mikobe, nibe:igisya binu bitabe:ire, kurwa mabona go burigerige.

¹² Omuragi umwi webwe abe:ne a:ikire ati, Abakerete ababeya kusiku, ni ntyanyi mbi:bi na baru:ru barenga.

¹³ Okwaika okwo ni kwa cimari. Nikwo urakoraga nubagonya no bururu, korereki barenge:rere mu kwikirisya.

¹⁴ Basige kutegeresya sumo je Ciyaudi ne biragiro bya ba:nu banu abafutatira ebye cimari.

¹⁵ Ku banu be:rere, byone ni byeru, nawe citario ci:nu ce:ru ku bajabi na banyate:kirisya. Okwiganirisya kwebwe ne mitima jebwe jijabiae.

¹⁶ Aba:ika ati, cimenyere Nyamuanga, nawe abamwiga:na mu bikorwa byebwe. Abo abafururusya, ni banyatongwa, ka bate:ire mu bikorwa byone ebyo bwana.