Yakub 1 - Wa tii vwalla ge jin̰al

Ngay ta zum mage wa sanna

¹ A mbi Jak, moor ge Dok mage Bagezok Zeso Krist ne, njaŋe lawayta mbe ne hon nda ge ho fareba ge Zeso Krist ta ma peɗ, ge dasare no dinna ge gɔswal go ma, ge pe rusu ge ɗogle ma buwal zì kàɗɗa ge suwa pagal peɗ. Mbi sa̰a̰ ḛ wa.

Wan ta ge yal njoɗɗa ma zì

² Mbi na̰ van ma, sok ge yal ma deɗ-ɗa pe hini-hini ge ḛ pagal, ḛ ke laa saal.

³ Ago, ḛ kuwa kuwa go, kaɗɗa hoɗ fareba ge ḛ ḛ ma mḛḛya pool ndiŋ ge yal njoɗɗa ma zì, àa ge vin̰a ge ee ḛ deɗ-ɗa wan ta deŋel.

⁴ Ɓyare go, ḛ wa̰a̰ ta ɗiŋ deɗ ge wa yà. Kaɗɗa na mbe go, ḛ seŋe nda ge mbyaɗɗa tab ma, ge be fwaɗɗa ma, nda ge a̰me hoɗege num to ma me.

⁵ Kaɗɗa ndu a̰me ɗu ge ḛ buwal zige wan kaŋ ge na mbiya kee ne pe to, ɓyare go ne kaɗe andaŋ ge Dok ta, Dok wa hon ne ne me. Ago, ne sḛ hon nda kaŋ ma peɗ ge tok lwaga. Hon ndu ge kaɗe na kaŋ be tumriya.

⁶ Ɗaŋɗe, ɓyare go ne kaɗe ne ge hoɗ fareba go, na seɗ kaŋ mbe ya seɗ zoo, be ge giɗɗa a̰me ge na dul wa zì. Ago, ndu ge giɗ ge na dul wal zì, a dinna ge sḭ̀ḭl ge mam ga̰a̰l nuwam ne ge sa̰a̰m mbeɗe ne digi, ka gene ne lee gene me-lee gene me go.

⁷ Ndu ge go mbe no, ne kaa ge kuwaya go na mbo seɗ a̰me ge Bagezok ta to.

⁸ Ge dape, a ndu ge eya fare ne, kaɗ ndu ge a̰a̰re no ge kaŋ keeya ge na ne ma zì ne me.

Nda ge pwal mage nda ge a̰se ma fare

⁹ Ɓyare go na̰ van ge a̰se, ne ke laa saal ge Dok mbo hee na pagal ya digi pe.

¹⁰ Na̰ van ge pwal ke laa saal koo Dok guwa̰ ne pagal se. Ge dape, kuwa kuwa go na mbo kale gezi ge sugu wa folla bàŋ go.

¹¹ Ago, sok ge gyala ndaa ya, deɗ se, zaleya ge ne ne looɗe sugu. Sugu wa folla looɗe, kan gezi, kale ge ne ne ban me. Na̰ van ge pwal mbo ban gezi mbe go ca, ge sok yan kaŋ gan ma pe go, ge kaŋ keeya ge na ne ma zì.

Kugiya mage pe heeya

¹² Laa saal kee ndu ge wan tene deŋel ge yal njoɗɗa ma zì. Ge kugiya mbe zì, wan tene ya ɗiŋ mbo halla, poɗɗa ge ne ne mbo kaɗ ndwa ge ɗiŋ ge din, ge Bagezok kee wa tii ge num ge laa wa̰a̰ na ma pe.

¹³ Sok ge pe heeya deɗ-ɗa ge ndu a̰me pagal, ne kaa ge ee fare ge Dok pagal to. A̰me ge ee Dok kee sone to. Ne sḛ hee ndu a̰me pe to me.

¹⁴ Ɗaŋɗe, ndu ge diige seɗ pe heeya, ge dape, a ene ge ne zige zwal nee ne, lase ne me.

¹⁵ Sok ge ndu deɗ-ɗa kee sone ge na duwa num ge na dul wa zì ma, kaɗɗa na zam zḛḛ zḛḛ ge num zì keeya, gaa ee ne mbo swày.

¹⁶ Na̰ van ge laa wanna ma (ge fare mbe no pagal), ne kaa ge ḛ n̰a ta laseya to.

¹⁷ Kaŋ ge nè seɗ num ma peɗ, bobo ge siŋli ma, àa mbo ge pḭḭ zì ya, ge Dok Ba ge kê kaŋ ge zen kɔn̰al ma ta ya. Ne sḛ eya to, mesege to, koo sok a̰me ge daalam ge ne ta go fyalag to me.

¹⁸ Dok ɓyare ne go, nè see ndwa ge fare ge na ne ge fareba ta, ndwa go nè see hormo ge Dok ta waɗe kaŋ dolla gegene ma, ge ne sḛ doo nè ge num buwal zì ma peɗ.

Za̰a̰ fare ge Dok ne, kee tèmel ge ne pagal

¹⁹ Na̰ van ge laa wanna ma, ḛ kuwa fare mbe ma kuwa peɗ. Ɓyare go ndu ge diige ha tene za̰a̰ fare ge Dok ne. Ɗaŋɗe, ne ke dṵṵl sok jan fare go, ge sok kee twam go me.

²⁰ Ago, sok ge ndu duwana seŋe twam, daa gwan deɗ-ɗa kee fare a̰me ge temel ge Dok ndwa se to.

²¹ Kaɗɗa na mbe go, ḛ ɔwabe ta gezi ge kaŋ keeya ge diige ge seŋre ta, ge kaŋ keeya ge diige ge haɗ nda sone ta me. Ḛ ame fare ge Dok zare ne no ge ḛ dul wa ma zì ge pagal gwanna se. A ne sḛ ge mbiya mon ḛ ne.

²² Ne kaa ge ḛ lase ḛ pagal za̰a̰ fare ge Dok ne za̰a̰ bàŋ cuɗ to, ɓyare go ḛ ke tèmel ge ne pagal.

²³ Ago, sok ge ndu a̰me za̰a̰ fare ge Dok ne go, kee tèmel ne pagal to, dḭḭ ge ndu ge ndil na ndwa ge kuturaŋ zì kuwa tene go.

²⁴ Ne sḛ, guwa̰ ge ndi tene go, seŋe tene mboya avun cab, vyale diir ge na ne gezi.

²⁵ Ɗaŋɗe, ndu ge feɗege eeya ge Dok ne ge haɗ nda suli, wan ne pe kwaɗa, mbarge tene ge ne ta, vyale ne to, ɗaŋɗe, ka mboya ge ne pagal, ndu mbe no, Dok mbo kee ne wa tare ge kaŋ keeya ge ne ne ma zì.

²⁶ Kaɗɗa ndu a̰me dwaɗ go na ndu ge kee tèmel ge Dok ne ge fareba ne, ɗaŋɗe, koy na ɗel ge fare janna ma zì to, ne sḛ ge na pagal lase go tene. Tèmel keeya ge ndu mbe ne kaŋ bàŋ ne.

²⁷ Tèmel keeya ge Dok ne ge fareba, ge Dok Ba ndil ne na ndwa zì kwaɗa, a mbaa kḛḛne mage kumu ma ge maa yal njoɗɗa ma zì. A be n̰a tene laseya ge kaŋ ge dunin̰a ne ma pe yà ndwa haɗ tene seŋre to.