Titus 1 - Wa tii vwalla ge jin̰al

Ngay ta zum mage wa sanna

¹ Mbi Pol, mbi ndu ge kee tèmel ge Dok nee ne, mbi kaɗ ndu ge temeya ge Zeso Krist ne me. Dok teme mbi ya ne go, mbi mba nda ge na taa num ma deɗ-ɗa ge vin̰a hoɗ fareba go. Mbi hate num fare ge na ne ge fareba ge mbiya ee num mbo mboya ge jwab, ge vin̰a hoɗ fareba mbe go.

² Mbi kee ano mbe ndwa go, num ee maa jobreya go maa seɗ ndwa ge ɗiŋ ge din ya go. Dok ge kun hày to, zḛḛ ge dunin̰a gale wa ya be dolla, kee wa tii ndwa hoɗ nè ndwa mbe ge ɗiŋ ge din.

³ Sok ge sok ma mbiya go, din̰a ne ya zum no, ge fare ge na ne ta. Ne sḛ Dok Ba ge mon nda, ho mbi na wa no go mbi jin̰a ne ge nda ta.

⁴ Mbi njaŋe lawayta no hon mo Titus, mo dinna ge mbi van ge son ge wuwa ge mbi duul zì go, ge fareba ge nè ge mo ho ne ge Zeso Krist ta pe. Mbi kaɗeya go, Dok ge nè Ba mage Zeso Krist Ba ge mo̰o̰ nè, num ngay kwaɗa keeya ge maa way mo ta, num ee mo kàɗɗa halas me.

Ndu ge mbiya ɗeme tèmel ge ɓase ge Krist ne

⁵ Mbi n̰a mo ge suwa Kreɗ yà ndwa go, mo nuusi tèmel wa ge gaa ma, mo ee nda ga̰a̰l ge ɗeme tèmel ma ge ɓase ge Krist ne ge no ge suwal ga̰a̰l ge diige diŋ, ge wa hoɗɗa ge ambi pagal.

⁶ Ndu ge mo tal ne ndwa ɗeme ɓase ge Krist ne ma, ɓyare go ne kaa ndu ge àa seɗ fare a̰me ge sone ge ne pagal to, ndu ge gwale ɗu, ge ne van ma ho fareba no ge Zeso Krist ta, ge gwan maa pagal no ge maa ba ma pe se, ge mbo mboya ge jwab ma me.

⁷ Ga̰a̰l ge ɗeme ɓase ge Krist ne, a ndu ge dol na ndwa ge tèmel ge Dok ne pagal ne. Ɓyare go ne kaa ndu ge be fare na pagal, ndu ge jegre to, ndu ge laa ol to, ndu ge fere tene to, ndu ge kee gool to, ndu ge aham ge yan bware pe ge na vin̰a go ge.

⁸ Ɗaŋɗe, ne kaa ndu ge kee gɔswal, ndu ge laa wa̰a̰ kee kaŋ ge kwaɗa ma, ndu ge no ge dwaɗɗa ge kwaɗa ma, ndu ge temel, ndu ge harcal, ge wan tene gezi ge ene sḛ duul ne ma ta keeya,

⁹ ge ho̰ na dul wa ge ɓul mɔɗwag ge fare ge mbiya ndu hoɗ fareba ge ne ta, ge nè hate nda ne me. Kaɗɗa na hon tene ya mbe go, mbo seɗ vin̰a ge hate nda ge ɗogle ma fare mbe, ee num seɗ pool ge ne ta me. Go mbe no, mbo kaɗ ndu ge ngay zum waŋ go, nda ge ɓyare vuuɗi fare ma, num fare mbe ma ge maa vin̰a go to.

Nda ge hon hateya ge maa vin̰a go to ma

¹⁰ Ge nda ge gwan maa pagal no ge fare ge fareba ge Krist ne pe se to ma, ge lase nda ge fare janna ge maa way ge mbaa fare to ma, gḛḛ Yahuɗ ge ho fareba no ge Zeso Krist ta ma.

¹¹ Ɓyare go mo n̰a num sok go fyalag ge faaya to. Ago, àa hon hateya ge no ge maa vin̰a go to ma. Ge ano mbe no ta, àa ee nda a̰me ma go gḛḛ iigiya ge maa zok ma diŋ. Àa kee ano mbe no ndwa go maa wa seɗ wa zamma ge ne zì. Ɗaŋɗe, a kaŋ daŋso ne ge num pe.

¹² Ndu a̰me ɗu ge ka kuwa fare ma gḛḛ, ge nda ge Kreɗ ma buwal zì, jin̰a go: Nda ge Kreɗ ma nda ge kaa ge hày pe kunna ma ne, nda ge vagal ma, ge uwal ma me. Àa dinna ge kavaar ge ful zì ge ma go.

¹³ Fare mbe ge ndu mbe jin̰a ne, a fare ge fareba ne. Ge ne pe, ɓyare go mo mḛḛre num ol kekeŋ, ndwa go num guwa̰ ya ge vin̰a hoɗ fareba ge jwab go.

¹⁴ Num ho̰ ta ge sigi isiya ge bàŋ yag ge Yahuɗ ma way ma ta to, ge wa yuwaleya ge nda ge sele gezi ge vin̰a hoɗ fareba go ma way ta to me.

¹⁵ Nè kuwa kuwa go nda ge dul wa no kɔn̰al ma, kaŋ ma peɗ kɔn̰al ge num pe. Ɗaŋɗe, nda ge num dul wa no kɔn̰al to ma, ge ho fareba no ge Krist ta to ma, a̰me ge kɔn̰al ge num pe to. Àa dwaɗ ɗaɗag kee kaŋ ge seŋre ma, sok kee kaŋ mbe ma go, daŋso kee num to.

¹⁶ Àa isi ta go maa nda ge kuwa Dok ma ne, ɗaŋɗe, num kaŋ keeya ma ngay nda go, num nda ge kuwa Dok to ma zane ne. Àa gwan maa pagal ge fare ge Dok ne pe se to, àa kee kaŋ ge Dok laa ɓyare num to ma, àa mbyaɗ kee a̰me ge kwaɗa ɗu to me.