Jude 1 - Wa tii vwalla ge jin̰al

Ngay ta zum mage wa sanna

¹ A mbi Jude ge Jak na̰ van, ndu ge tèmel ge Zeso Krist ne me, mbi njaŋe lawayta no ne hon nda ge Dok ge nè Ba too num ya ma. Ne laa wa̰a̰ num ne, doo na ndwa num pagal no ge Zeso Krist pe.

² N̰a Dok ge nè Ba, ne ngay kuwa a̰se mage laa wanna ge na ne ge ḛ ta gḛḛ ceɗeɗ, ne ho̰ ḛ halas me.

Hateya ge maa vin̰a go to ma

³ Na̰ van ge laa wanna ma, mbi kaa ge ene gḛḛ, njaŋe ḛ lawayta no, tyan ḛ pagal gezi ge monna ge nè dee ya ne zì mɔɗwag mbe pagal. Mbi vḭḭ tene no, ne ngaɗ go mbi njaŋe ḛ lawayta mbe, ndwa hon ḛ pool ge mbal twam, mḛḛya ndiŋ ge fare ge ḛ ho fareba num pagal ma zì, ne mbe ge Dok ɓin̰a ne ya ge nda ge ho fareba na ta ma zì, ndwa ɗu kikiɗ.

⁴ Ago, nda a̰me ge sone ge maktub fâ num fare ge zḛḛ ya day go sariya wa̰a̰ num wan ma waɗ ja ge ḛ buwal zì. Àa num mbe ge tɔcwage kaŋ ge harcal ge maa ko zì ma, sok ɗuuli fare ge kwaɗa keeya ge Dok ne pagal se go. Sok kee ano mbe ma no go, àa kuri gezi Zeso Krist, nè Ndu ge zok ge melaw ɗu kikiɗ, kaɗ nè Bagezok me.

⁵ Ajo̰o̰ ḛ kuwa fare ge mbi ɓyare janna ma kuwa kwaɗa hetel puy ɗe, ɓyare mbi gwan dwaɗ ḛ pagal, pe gyana ge Bagezok Dok mo̰o̰ ɓase ge Izrayel ne ma, ge suwa ge Ejypt ne ya de? Guwa̰, pû num ge kuri be hoɗ fareba ma gezi no me.

⁶ Ḛ duwa ge fare cemeya ge malayka a̰me ma way pagal gale: Àa be za̰a̰ tii ge pool ge maa no ge num ma to, ɗaŋɗe, àa suwa sok kàɗɗa ge maa way ge sasag-ga no. Ge ano mbe no pe, Dok fee num no kakaŋ ge zul ge tugul ga̰a̰l ge tṵṵ ɗeɗeg se yà ge ndwa no, da̰a̰re dwam kun sariya ge ga̰a̰l.

⁷ Ḛ duwa ge kaŋ keeya ge nda ge suwal ga̰a̰l Sodom mage Gomor ɓanna ge suwal ga̰a̰l ge num ziya guguwa ma way ma gale. Àa ka̰a̰ ta mbe go ca, ge kaŋ keeya ge batraŋ mage ene sḛ duul ge be na vin̰a go to ma zì. Dṵṵl ge num pagal go ge, ge ol ge ɗiŋ ge din zige mbe, a kaŋ ngayya ne ge nda ta peɗ.

⁸ Nda mbe ge dee ya ḛ buwal zì ma waɗme, num kaŋ keeya ma mbe go ca. Àa kee kin̰a ge ee maa kee kaŋ keeya ge sḛ duul go, ge haɗ maa seŋre ma, ee maa kuri muluk ge Bagezok kee ne maa pagal gezi, ee maa jan fare ge sone kakatag ge kaŋ dolla ge pateya ge pḭḭ zige ma pagal me.

⁹ Koo ga̰a̰l ge malayka ma way Mikayel sḛ puy, sok kee gool ge duul swày ge Moyiz ne pagal ge Ba ge ho̰o̰l go, be jegre ɗiŋ mbo jan ne fare ge sone kakatag to. Ɗaŋɗe, jin̰a guwa go: Ɓyare go Bagezok mḛḛre mo.

¹⁰ Kaɗɗa ge nda mbe ma ɗe, àa jan go fare ge sone kakatag, ge kaŋ ge maa wan num pe to ma pagal. Àa kee fare ge waɗ-ɗa maa pagal zì ma dinna ge kaŋ kogor ma boo go. Sok kee go mbe go, àa gene ta mbo banna zì.

¹¹ Woo ge num way, ago àa kàre go Kayḛ ko pul. Àa n̰aame go n̰aame ge Balam go, sok yan bware pe go. Àa pû gezi ge dape, àa ɗege digi ge ho̰o̰l ge Dok ge mojo̰o̰ Kore ɗege go.

¹² Nda mbe ge waɗ ja ḛ buwal zì ma seŋe ḛ baan zamma ya kaŋ daŋso. Àa dwaɗ ge ta ɗeŋew, àa ka an̰n̰a sok njoɗ kaŋ ge bandal mage zam kaŋ zam ge be wan ta me. Àa dḭḭ sḭḭ ge pḭḭ ge be mam ma, ge sa̰a̰m in num lee gene me-lee gene me ma go. Àa kaɗ ge ɔwara ge waɗ somo̰ zum-ma be ndwa tolla ma go, sok ge àa ndage digi ge maa tòo ma ɗereɗ go, àa suu yà suu ge ndwa fafa.

¹³ Àa ngay kaŋ keeya ge maa way ge daŋso mbe ma kɔn̰al go, ge mojo̰o̰ sḭ̀ḭl ge mam ga̰a̰l nuwam ne ndaa hore ya wa kal digi go. Àa ge mojo̰o̰ gùwa̰ ge chiya batraŋ ma go. Tṵṵ ge ɗeɗeg sok kàɗɗa ge num way ge ndwa ge ɗiŋ ge din, ge Dok ee ge num pe ne.

¹⁴ Enok, doŋ pe ge ɓỳala ne ge nè baŋ Adam ta ya, jin̰a ka̰a̰l ge nda ge zwagre Dok wa ma way ge zḛḛ ya day ge num pagal no go: Ḛ za̰a̰ gale, Bagezok mbo mbo ya dagre ge na malayka ge harcal ma, bub mage bub ma,

¹⁵ ndwa ee num kun sariya ge nda pagal peɗ. Àa mbo ee nda ge kee sone ma kuwa maa kaŋ keeya ge maa kê ge sone mage fare janna ge num mbe ge tɔcwage kaŋ ge harcal maa ko se ma way, sok jan fare ɔswar ma go ge ne pagal ma me.

¹⁶ Àa nda ge fare a̰me huri num to ma ne, àa kaɗ ge sun ta dwam ma zì mɔɗwag. Àa mbo ge laa ɓyareya ge maa way ma pagal. Num wa ɗebce fare janna ge kwaɗa ma, lase nda go num vḭḭ maa pe.

Hon ta pool

¹⁷ Na̰ van ge laa wanna ma, kaɗɗa ge ḛ ɗe, ḛ duwa ge fare janna ge nda ge temeya ge nè Bagezok Zeso Krist ne ma jin̰a ḛ num ge zḛḛ ya day ma.

¹⁸ Àa ka jan ḛ go: Ge dwam pe aaya ma go, nda ge coɗ sok ma mbo ka mbo mboya ge sone, ge fare ge maa dul wa ma ngay maa ma pagal, sok sen fare ge Dok ne go.

¹⁹ Na! Àa num mbe ma ɗaŋ, àa num gene caɗeya ya ne ge nda ge Krist ne ma buwal zì. Àa mbo mboya ge sḛ duul pagal go ge, àa be On̰om ge Harcal ge maa zì.

²⁰ Ɗaŋɗe, ḛ sḛ ma ge ḛ pagal, na̰ van ge laa wanna ma, ḛ ho̰ ta pool zam-ma zḛḛ ge fare ge ḛ fareba hoɗɗa ge harcal doo no ge ne pagal go zì. On̰om ge Harcal ho̰ ḛ pool ge kee kaɗeya ɗaɗag me.

²¹ Ḛ wan ta ge laa wanna ge Dok ne zì, sok da̰a̰reya go nè Bagezok Zeso Krist hon nè ndwa ge ɗiŋ ge din, ge kuwa a̰se ge na ne pe.

²² Nda ge no ge tumriya maa dul wa zì ma, ḛ kuwa num a̰se me,

²³ àa mbo go ol, ḛ mo̰o̰ num. Ge ɗogle ma me ɗe, ḛ kuwa num a̰se, ḛ in̰a ta nde ge num ta. Koo num ba̰a̰ kanna ma, ḛ ee ḛ tok num ta to ge dape àa haɗ num ya seŋre ge maa kaŋ keeya ge sḛ duul ne ma.

²⁴ Nè kee mersi hon Dok ge mbiya cage ḛ go ḛ dee sone zì to, ge wa ee ḛ deɗ-ɗa be fwaɗɗa, ge na ndwa se, ge pateya ge na ne zì, ge laa saal fafan̰.

²⁵ Ne Dok ɗu, Ba ge mo̰o̰ nè ge nè Bagezok Zeso Krist ta. Pateya, ga̰a̰l ge waɗe-waɗe, pool ge ɓaŋlaŋ, pool ge kee muluk ne ne ma ne, ge pe dolla ya day ɗiŋ mà no, ge ndwa ɗiŋ ge din me. Amin.