Daalam 1 - Wa tii vwalla ge jin̰al

¹ Ano a kaŋ ge ɗimil zì ge din̰a ya zum, ge Dok ho̰ Zeso Krist vin̰a, ndwa tyan na nda ge tèmel ma pagal gezi ma ne, ge kaŋ ge gaa guwa mbo keeya ma pe. Go mbe no, Krist teme na malayka ya ngay na ndu ge tèmel Yohana num no.

² Ne sḛ Yohana ngay nda no go, kaŋ ge na kuwa num ma mɔɗwag, num fare ge Dok ne ma ne fareba, num sayda ge Zeso Krist ne ma ne me.

³ Ndu ge isi maktub ge Dok ne mbe mage num ge za̰a̰ fare janna mbe ge ndage no ge Dok wa zì ma, àa ka mboya ge num pagal ma ge laa saal. Ago, sok ge kaŋ mbe ma deɗ-ɗa keeya gaa guwa.

Wa sanna ge ɓase ge Krist ne ge pe ɓỳala ma ta

⁴ A mbi Yohana teme lawayta ne, hon ɓase ge Krist ne ge pe ɓỳala, ge no ge suwa ge Azi ne go ma. N̰a Dok ge dee no ya din, ge no ɗiŋ mà, ge mbo no ya mage na on̰om ge ɓỳala, ge no ne hòol muluk ndwa se ma, num ngay kwaɗa keeya ge maa way ge ḛ ta, num ee ḛ kàɗɗa halas ge ta me.

⁵ N̰a num mbo ge Zeso Krist ta ya waɗme, Ba ge sayda ge fareba, ne ge n̰a wa to, van ge zḛḛge ge ta̰a̰ ge nda ge swày ma buwal zì, ga̰a̰l ge no gan ga̰a̰l ge suwa pagal go ge ma pagal digi. Ne laa wa̰a̰ nè wan, zû nè ge nè sone ma zì no, ge swàm ge na ne.

⁶ Seŋe nè ya nda ge kee muluk ge na dagre ma, nda ge kee tuwaleya ge na ba Dok ne ma. Pateya mage pool ne ne ma ne, zaman mage zaman ma. Amin!

⁷ Ḛ kuwa gale, Krist mbo mbo ya ge pḭḭ ma zì. Ndu ge diige mbo kuwa ne, koo num ge tṵṵ ne ma. Rusu ge suwa pagal ma peɗ, àa mbo fyal fiyaso ge yaga. Mbo kee mbe go, Amin!

⁸ Bagezok Dok ge no ya din, ge no ɗiŋ mà, ge mbo dee mbo ya, ne ge pool waɗe-waɗe kaŋ ma pagal peɗ jan go: Mbi Alfa, mbi kaɗ Omega.

Yohana ndwa tin̰a kuwa Krist

⁹ A mbi Yohana ge ḛ na̰ van, ḛ kon ge tèmel, ge za̰a̰ yal no ge ḛ dagre ge muluk ge ɗu zì, ge wa̰a̰ tene deŋel no go, ge ɓanna ge nè ɓa̰a̰ dagre ge Zeso Krist pe ne. Mbi kaa daŋay ge til ge àa tol ne Paɗmos zì, ge fare ge Dok ne ge mbi oy pe, ge sayda ge mbi kee Zeso pagal pe me.

¹⁰ A dwam ge Bagezok nee ne, On̰om ge Dok ne mbô ya hee mbi, mbi za̰a̰ ka̰a̰l a̰me ge ndaal ge mbi guwa̰, ge mojo̰o̰ burji vin go,

¹¹ jan mbi go: Njaŋe kaŋ ge mo kuwa num mbe ma no, ge maktub zì, teme ne mbo hon ɓase ge Krist ne ge pe ɓỳala ma, ndwa go: Ge Efez, ge Smirn, ge Pergam, ge Tyatir, ge Sardes, ge Filadelfi mage Lawdise diŋ-ge ma.

¹² Mbi seŋe tene se ndwa ndil ndu mbe ge jan mbi fare, mbi kale kuwa kaŋ ge ee lampe pe ge àa ɗeere num ge dinar ma ɓỳala gaw.

¹³ Mbi kuwa ndu a̰me ɗu, dinna ge Van ge Ndu ne go, mḛḛya ge kaŋ ee lampe pe mbe ma tuwal zì me. Ka̰a̰ ba̰a̰ ga̰a̰l, kaɗ ge hoo dinar vwalla ge na tuwal go me.

¹⁴ Ne pagal susu kaa saal taɗag dinna ge tame saal susu go, ge kakḭḭli sa̰a̰m go me. Ne ndwa pul ka ɗaabeya ge ol wa swala go.

¹⁵ Ne ko ma kaa ge fool kàal ge àa gale ɗeere ne jin̰al go, ne ka̰a̰l ka ngoreya dinna ge sḭ̀ḭl ge mam ga̰a̰l nuwam ma way ma go.

¹⁶ Kaɗ ge gùwa̰ ma ɓỳala ge na tok matoson zì, kasagar ge ɗel zi, wa zɔbal cḛḛɗ ka ndage ge ne wa zì ya. Ne ndwa kaɗ dinna ge gyala ge mḛḛ pɔgwa deɗ se njinjil go.

¹⁷ Sok ge mbi kuwa Krist, mbi deɗ ge ne ndwa se ge mojo̰o̰ ndu ge suu suu go. Sok mbe go, ee na tok matoson ge mbi ta, jan mbi go: Chiya voo to! Mbi zḛḛ, mbi gwan kaɗ ge guwa̰ ge dwab yà me.

¹⁸ Mbi ndu ge wa̰a̰ ndwa no mbi tok go ne, mbi suu no. Ḛ kuwa gale, ge sego mbi ge ndwa ɗiŋ, zaman mage zaman ma go. Mbi ge lakle ge swày mage sok kàɗɗa ge nda ge swày ma way ge mbi tok go.

¹⁹ Njaŋe kaŋ ge mo kuwa num mbe ma no ɗaŋ, kaŋ ge kee no ge sego ma, ge mbo no ge num guwa̰ ya ma me.

²⁰ Kaɗɗa ge gùwa̰ ge ɓỳala ge mo kuwa num ge mbi tok matoson zì mage kaŋ ee lampe pe ge dinar ge ɓỳala mbe ma me ɗe, num pe wanna no: Gùwa̰ ge ɓỳala ma malayka ge ɓỳala ge koy ɓase ge Krist ne ge pe ɓỳala ma ne, kaŋ ee lampe pe ge ɓỳala ma me ɗe, àa ɓase ge Krist ne ge pe ɓỳala mbe ma ne me.