ZEPHANIA 1 - ASIO THSAMLAI C.L. Bible (BSI)

¹ Yihudahai nokpao Amon thso Josia taoko Apaou ngiongem Kushi thso nou Zephania hau kiukü noiküla. (Zephania nung Hezekia nokpao thsaosithso, Kushi nung Gedalia thso, Gedalia nung Amaria thso, naiuso Amaria nung Hezekia nokpao thso).

Apaou Mikhem Ajekhaiu

² Apaou nou ngiom, “Goh chiai noitsün alum,

³ khaiuniale, thainian, liu waio nouso, naiuso ngou nouso apem ngo moisemkü lomowane. Ngo tsümeikünso lomowane, ngo khaiuniale tsaktso tsüpoitaiukü lomowane ta Ngo, Apaou, nou ngiowaniu.

⁴ “Ngo Yirusalem hai naiuso Yihuda hai chikü hau angja kiu-e. Nungko Baal amtsün athang nouso saokü ngo moisemkü lomowane, naiuso nung tü yathsüotsün meson nouso lüko sauühtso tsüyang san shi-e.

⁵ Tsamkhaiu ai sungkü, Aje, alei, naiuso kianthsüo nouso tü amkhamau sau sunge ngüso tsaktso tsüpoikü lomowane.

⁶ Loto sauhai jüphiai tsühoilutshikü phoklekü khuwan, naiuso jüdongai shikü ngü tü ngüso yamnia au tsüsang ngo ngüso lomowane.”

⁷ Apaou nou mikhem noikham nai moknoiau ajekhaiu nou shimji, nungtiphe apa khako tsüsingiokü anoi. Apaou nou apa khaiuniaso chaithio kiuau khemji naiuso Yihuda kamheau ehoi nouso tü taokü noin.

⁸ Apaou nou ngioji, “Nung achaoat ajekhaiu nouko nai,” Ngo asonghoi nouso, nokpao ün thsoso, naiuso gohmao hai saisile kankeitsünso chikü hau angja kiu-e.

⁹ Sauhaiüh paisilung tü amkhamtsün saisile kankeiji naiuso ngüso Apaou tsam nou a-aploutsün jengtsaiu nou lomeanau khaiunia nou tü kaukü loatji, nungso chikü hau ngo angja nou kiu-e.

¹⁰ Apaou nou ngioji, “Nungh ajekhaiu ko nai, asamüh Yirusalem nai Ngou Bekhan dongko ashaptsün sangh lula-e. Naiuso noknio nouko athang ayan tsak ai ashaptsün naiuso king nouso ai loithiowantsün sangh asong asamüh lula-e.

¹¹ Tilai nung sangh asong nou asamüh lula-e, noknio asaothon nai kihtsünso asamüh monghenkü lüshap, tiautenai chaile hoi nouso apem eankü noi-e.!

¹² “Nungh taoko nai ngo tson tsak loküta Yirusalem tü yame. Sauhaiüh meshen chija mongtsam lokü naiuso mongsong lokü noiküta ‘Apaou nou amei lüko tsümeikü lüko tilaitso tsüchhiji ta ngüso chija ngiolouji, nung khaiunia nouso hau ngo angja nou kiu-e.’

¹³ Ngüso memei jengtsaiu kamheküta ngüso tsam nouso lotheane. Ngüsoüh lahtsün tsam nai ngüso tilaitso tsükih-e tsüdekünai ngüsoüh thomtaiutsün sainao ainou sainaoshep theng tilaitso tsüshiu-e.”

¹⁴ Apaou ajekhaiu asong nou thatü shimkü noin naiuso khaolaokü shiji! Nungh akhosak ajekhaiu tsak noi-e, tititenai amongnyanting süpaihoi nouso lüko ayangelat nou shape!

¹⁵ Nungh ajekhaiu nou amongmat athsüoting tsak, angja naiuso mong kiakü yangelattsün ajekhaiu, alothetsün ajekhaiu tsak, anyakhem naiuso tsü iwonkün ajekhaiu, anya naiuso thengmia nou semjeikü noitsün ajekhaiu,

¹⁶ ehli jangongmat ngem nou meankü noitsün naiuso süpaihoi nou pejeikü taiutsün noknio nouso naiuso tsamthong atsokting nouso, komhetsün sangh ngem nou meankü noitsün tsak noi-e.

¹⁷ Apaou nou ngioji, “Niopek khaiunia tsak khekkü khaiunia pungkü she-ekeikü hau khaiuniale chikü dongai nung aküothe nouso ngo kankü shi-e. Ngüsoüh ngü thako angei sunhe-iu, naiuso lo ngüso she khiam khekkü tsangi-e, naiuso ngüso e mea nouso goh ai choi-ankü noi-e.”

¹⁸ Apaou nou apa mongmat hantsün ajekhaiu ko nai, ngüso ün chaiou lakkeng naiuso tangkason chikü nou ngüso tsükipsane. Nung goumchi athum nou apa amongmat in tsangkü chethe-ane. Goumchi nai kihtsün pungkü aa nou apaüh alekta lothonan kiu-e.