YOHAN 1 - ASIO THSAMLAI C.L. Bible (BSI)

Ngio Aa

¹ Ayating nai Ngiolu noiküla; naiuso Ngio Goa ko noiküla, naiuso Ngio Goa noiküla.

² Apa ayating nai yakü Goa ko noiküla.

³ Alum apa tsangkü sung; naiuso tilüsong shantaim apa tsühakü titsüo tsüshan.

⁴ Apa da aa noiküla; naiuso aa nou Khaiunia Thso awon noiküla.

⁵ Naiuso awon nou anyakhem nai awonji, lüko anyakhem nou nung tsülunyat.

⁶ Goa ainou hongtsün khaiunia tsak apa nian Yohan shin,

⁷ apa ngiothi tsangkü apemüh monglamao naiuso khaiuniahoi ao awon thaiutha mitha kiuao apa shin.

⁸ Nung khaiunia nou awon tsüde, awon thaiutha mitha kiuao apa shin.

⁹ Nung atsüoting awon noiküla, nungüh apem awoniji apa goumchi ai shikü noiküla.

¹⁰ Apa goumchi ko noiküla, naiuso goumchi nou apa tsangkü sung, lüko goumchi nou apa tsüngesan.

¹¹ Apa meshen khaiunia hoi dongai shin lüko meshen ün nou apa tsülu.

¹² Lüko tititsoüh apa lu, nungti sau haiüh apa nianko monglam, ngüso hao Goa thsoso iulaao apaüh oukong nou kiu;

¹³ Goa thso iulaao saisile tsangkü tsüde, nung goumchi po ainou chettsün nou tsüde, Goa nou apa pem ngüso po noiküla.

¹⁴ Naiuso Ngio nou khaiunia iulan naiuso atsüojin naiuso ngiotsüo nou meankü sam ongko noi. Po nou thsosaan lütsüotsüokü apaüh ti ajinka ep nung ajinka nou samüh ep.

¹⁵ Yohanüh apa thaiutha mitha kiu, naiuso wekü ngiom, “Sau jüphiai shiji apa ngü tü song noin, tititenai apa jü khako noiküla ta sau thaiutha ngü ngiom nung Apa.”

¹⁶ Tititenai apa athapungtsün ainou sam apemüh haoson ep, naiuso ouk khako ouk nou ep.

¹⁷ Tititenai Ngiokhem nou Mosa tsangkü kiu; lüko atsüojin naiuso ngiotsüo nou Yisu Khrista tsangkü shin.

¹⁸ Khaiunia nou Goa laitsüo tsüep, Goa uai noitsün thsosaan sau Goa ko wekü noin apaüh lu sam hao tsangsheikü kiu.

Alimkiutsün Yohan Ngiongem

¹⁹ Tilai Yihuda haiüh Yirusalem ainou Yohan dongai, “Ni sau?” ta apa tü sangao mesonhoi naiuso Levi hoi hong, Yohanüh mitha kiutsün ngio nung:

²⁰ Apaüh thalakü ngiom, “Ngo Messiah tsüde.”

²¹ Ngüsoüh apa tü sang, “Naito ni sau?” “Ni Elija süne?” Apaüh ngiom, “Ngo tsüde.” “Ni Goa E-po süne?” apaüh thala, “Tsüdeka.”

²² Nungtiphe ngüsoüh apa tü sangkü ngiom, “Sam hongtsünso tü samüh thalaao lümeikü ni sauko achite?” “Ni athaiutha ti ngio-e?”

²³ Apaüh ngiom, E-po Isaiaüh ngiotsünli: “Apaou yam lukü lüshan ta liutsa nai vetsün sang nou ngo!”

²⁴ Farisihai tsangkü ngiongem kankü hongtsünsoüh Yohan tü sangkü

²⁵ ngiom, “Ni Khrista tsüde, Elija lüko tsüde, E-po lüko tsüde, naito ni tiao khiamai limkiuji?”

²⁶ Yohanüh ngüso tü thalakü ngiom, “Ngü khiam ai limkiuji, lüko khaiunia tsak sau asamüh tsüngelu,

²⁷ nungti apa jüphiai shiji, sau hokkhut ao sokthamao ngo tsümai, apa asam ongko tsakü noin.”

²⁸ Yohanüh limkiutsün Yordan Haiu etsai noitsün Bethani nai nung thawao.

Goa Onnemok Thso

²⁹ Nungthan nyap nai apa dongai Yisu shitsün epkü Yohanüh ngiom, sauüh “goumchi angei kankü khuji, Goa Onnemok Thso nungai noin!

³⁰ Jüphiai khaiunia tsak shiji sau ngü tü song noin, tititenai apa ngü mochetkü aita noiküla, ta sau thaiutha ngü ngiom nung Apa!

³¹ Ngü apa tsünge; lüko apa Israel khako achiai sungiao thaiutha, ngü khiam ai limkiukü shin.”

³² Yohanüh mitha kiukü ngiom; “Asio Onthso mükhamli aün ainou saokü ngü epiu, naiuso nung apa da noi.

³³ Ngü apa tsünge, lüko sauüh khiam ai limao ngo hong, apaüh ngü tü ngiom, ‘Sau da Onthso saokü naiuso noikü eppe, apaüh Asio Onthso nai limkiuji.’

³⁴ “Nung Goa Thso ta ngü epiu, naiuso mitha kiu-iu.”

Yisu Sahoi Ayating Nouso

³⁵ Loüh nungthan nyap nai Yohan meshen sahoi nime ko tsakü noikü;

³⁶ Yisu shitsün epnai apaüh ngiom, “Goa Onnemok Thso nungai noin!”

³⁷ Sahoi nime nou apaüh ngiotsün lula, küta Yisu phiai hoilut.

³⁸ Nai Yisuüh kha phoklekü apa phiai hoiluttsün epkü ngüso tü ngiom, “Asamüh ti yamji?” Ngüsoüh apa tü ngiom, “Rabi!” athat nou “Atsandetsün ni tai noiji?”

³⁹ Apaüh ngüso tü ngiom, “Ashi, küta athaplu,” Nungtiphe ngüso shi naiuso apa tai noiküla nung ep; naiuso nungai ngüso apa ko noi; (nung taoko püle baji thatso noiküla.)

⁴⁰ Yohanüh chitetsün luküta Yisu phiai hoiluttsün nime ongko tsak to Simon Peter nio Andria noiküla.

⁴¹ Apaüh aya nai apa dei Simon epkü apa tü ngiom, “Samüh Mesia (athat nou Khrista) epiu.”

⁴² Apaüh apa Yisu dongai nialukü shin. Yisuüh apa lukü ngiom, “Ni Yona thso Simon, Anian Kefa (nung Peter) ta jone.” “Athat nou lung tsak.”

Yisuüh Philip Naiuso Nathanel Jonji

⁴³ Nungthan nyi nai Yisu Galil ai khuao aiukü noiküla. Apaüh Philip epküta ngiom, “Jüphiai ahoilut!”

⁴⁴ (Lo Philip lüko Andria naiuso Peter nok hai Betsaida ainou noiküla.)

⁴⁵ Philipüh Nathanel epkü apa tü ngiom, “Yosep thso Nazaret hai Yisu sau thaiutha Mosaüh Ngiokhem nai naiuso Goa E-po nousoüh sat, samüh apa epiu.”

⁴⁶ Nathanelüh apa tü ngiom, “Nazaret ainou tso amei sungao shio-e süne?” Philipüh apa tü ngiom, “Shiküta athaplu.”

⁴⁷ Yisuüh Nathanel apa dongai shitsün epkü apa thaiutha ngiom, “Laple tsüsünkü nou atsüoting Israel hai tsak nungai noin!”

⁴⁸ Nathanelüh apa tü sang, “Ni titi thekü ngü ngen?” Yisuüh thalakü apa tü ngiom, “Philipüh ni mojonkünai ni latpaikhemai noi nai ngo ni ep.”

⁴⁹ Nathanelüh apatü thalakü ngiom, “Atsandetsün, Ni Goa Thso! ni Israel hai Nokpao!”

⁵⁰ Yisuüh ngiom, “Ngo ni latpai khemai epta ngo ni tü ngio nailu ni monglamji süne? Nungtü songkü chhi nou ni eppe!”

⁵¹ Naiuso Apaüh apa tü ngiom, “Atsüoting ngo ni tü ngioko; Aün sopkü Goa honghoi Khaiunia Thso chiai sung naiuso saotsün asamüh eppe.”