RUTH 1 - ASIO THSAMLAI C.L. Bible (BSI)

Elimelek naiuso Apa Tsamkhaiu Moab ai Khuji

¹ Israel hai nokpao monoikün khako piamkü, goumchi nai naiusile tsak noiküla. Nung taoko Efrat hai khaiunia tsak Elimelek ta niankü Yihuda nai Betlehem noksong ko kihkü noiküla.

² Apa tsammongnyiu Naomi naiuso ngüne thso melothso nime Malon si Kelon ne hakü Moab goumchi nai atao letletkü thaiutha akih au khu. Ngüso nungai kihkü noi taoko,

³ Naomi ko apa thso ne taiukü Elimelek ean, küta nung thso nime nou

⁴ ngüne tsammongnyiu theao thaiutha Moab nyiuhai lou; nyiuhai tsak nian nou Orpa naiuso amao tsak nian nou Ruth. Pon che thatso phiai

⁵ Malon naiuso Kelon ne lüko eankü loto tsammongpo lüko naiuso thsohai lüko eankü Naomi pemsa poian.

Naomi naiuso Ruth Betlehem ai Laokü Shiji

⁶ Atao intso noikütün phiai Naomiüh Apaou nou apa khaiuniaso be-eiuyam meikü yamhetsün tsangkü ouk kiu-iu ta lula, nungtiphe apa, naiuso apa thsone tsammong- nyiu nouso Moab leankü khuau khemlo.

⁷ Ngüso Yihuda nai laokü yashiao aikü tsalo, lüko yamko tsakei tao

⁸ apaüh ngüne tü ngiom, “Aje laokü khukü aje nyiusoko tsamai lünoian. Asamüh eanso tü naiuso ngü tü atsüojinyang kiukü kankeitsünli, Apaou nou asam tü tsüojinyang- kiukü lükankei.

⁹ Aje nemthso hau loüh tsamsigoh yangshikü tsam- mongpo eploshiao lümeikü Apaou nou yam lüsopkiu.” Nungtiphe Naomiüh ngüne ko pungeao ngüne tü son nou chep.

¹⁰ Lüko ngüne shapao yachu küta apa tü ngiom, “Tsüde! je niko hakü akhaiuniaso dongai khuha-e.”

¹¹ Naomiüh thalakü ngiom, “Jülene, aje titilünou laokü khuau noin.” “Aje tiauta ngüko hakü khuao aiuji? Aje thaiutha tsamsigoh yangshiao ngo melothso chetkiushi-e ta ajeüh yangjiso?

¹² Tsamai laokü lükhu, tititenai ngo loüh tsamsigoh yangshiao thatü sonaniu. Tsüdekü- nai ngo loüh methso chetshiao molaowankü thekü, lüso tsamsigoh yangküta melothso chetshi lüko,

¹³ ngüso mosungkün lektso ajeüh taiuao shio-e süne? Nungüh amao ajantsoko tsamsigoh yangtsün ainou lolaokü wanao shio-e süne? Tsüde, jülene, nung chhisiya ashioao tsüde ta ajeüh ngeji. Nung thaiutha ko aje ko naito, ngo bao ayangelat noin, tiautenai Apaou pha ngü thako loksananiu.”

¹⁴ Loüh ngüne shapao yachu. Nungai Orpaüh apa tsammongpo nyiu tü athon punge ao thaiutha son nai chep, küta tsamai laokü khuwan; lüko Ruth to apa tü piplutkü noiküla.

¹⁵ Nungtiphe Naomiüh apa tü ngiom, “Ruth, anuo, apa khaiuniaso naiuso apa goa dongai laokü khuwaniu. Apa ko hakü atsamai laokü lükhuwan.”

¹⁶ Lüko Ruthüh thalakü ngiom, “Ni leankü khuau ngü tü lasang! Ngo niko aikü khuha-e. Ni tilüsongai khu-e, ngo nungai khu-e, ni tilüsongai kih-e, ngo nungai kiha-e. Akhaiuniaso jü khaiuniaso noi-e, naiuso a Goa, jü Goa noi-e.

¹⁷ Ni tiai eane, ngo lüko nungko eane, naiuso nungai ngo khanane. Ni ainou ngo e nou tsüdekü amao aküo tsangkü janeao naito Apaou nou jü chiai atsaoting angja nou akiu!”

¹⁸ Tilai Naomiüh Ruth apako aikü khuau kongkü thaloutsün ep, apaüh titso tsüngioshi.

¹⁹ Ngüso Betlehem ai moshisaokün lektso tsülaokü khu. Tilai ngüneüh Betlehem shisaom, noksong nai noitsün khaiunia apem ngemkü kamshin, naiuso nungai noitsünso lekkatkü ngiom, “Nung atsüoting Naomi so?”

²⁰ Apaüh thalakü ngiom, “Ngü tü Naomi ta lajon,” lüko ngü tü “Mara, ta ajon, tiautenai Apemshiotsün Goa nou jü aa khosakkü kankei.

²¹ Tilai ngo nung ainou tsalokü khu, ngo alum tsükhemkü noiküla, lüko Apaou nou ngü phakeng laokü nia- lokü shi-ishin. Apaou, nou jüthako chhitsün naiuso Apemshiotsün nou ngü hau angja kiutsün epkü tiauta asamüh ngü tü Naomi ta jonji?”

²² Nungti Naomi naiuso apa thso nou tsammongnyiu Moab nyiuhai nou Ruth apako hakü laokü shin. Ngüso Betlehem ai shisao nai jinyak be-eiuyam tao noiküla.