LUKÜH SATTSÜN NGEM AMEI NGIOYA 1 - ASIO THSAMLAI C.L. Bible (BSI)

¹ Atsüojin Theophila: Khaiunia piakü nou, sam ongko ti thawao nung thaiutha, ngüsoüh shio nou lektso ngiopengao kowe.

² Aya ainou sauhaiüh nung ngio chim naiuso chhi nouso ep, sam hau ti chiten nung ngüsoüh sat.

³ Nungtiphe chhi amei nou shioko, ngü ayanai yakü meikü tsüokü velu-iu, nung lingkü satnai athaiutha mei-e ta ngo yang.

⁴ Nungtiphe asam tü tilüsong chim, nung asamüh ngiotsüo saiukü ngeluao thaiutha ngo nung sat.

Alimkiutsün Yohan Chetao Ngiotsün

⁵ Yihudahai Nokpao Herod taoko meson tsak nian nou Zekaria, Abija sahoi ong ainou noiküla. Apa tsammongnyiu nian nou Elizabet lüko meson tsamkhaiu ainou noiküla.

⁶ Apaou nou ngiotaiutsün naiuso ngiokhem chikü nai aphio tsünoikü ngüne Goa khako asio noiküla.

⁷ Ngüne thso tsüha, tititenai Elizabet lon noiküla, naiuso ngüne nemthso akihlaiu laiukü yanankü noiküla.

⁸ Ajekhaiu tsak ko, apaüh amkham tsamai meson chhi haoson loukü noiküla.

⁹ Apaou asiothang nai sungkü thangkoinek jah-ao phongdei nou apa da latha.

¹⁰ Thangkoinek jah-ao taoko khaiuniahoi kamai misao saokü noiküla.

¹¹ Nungai thangkoinek jahtsün chaithiotsün uai Apaou aünhong tsak apa dongai sungkü tsa.

¹² Tilai apaüh nung ep, apa lekkü hatat.

¹³ Lüko hong nou apa tü ngiom, “Lahatsai, Zekaria! tititenai ni kojatsün lula-iu, naiuso atsammongnyiu Elizabetüh ni hao melothso tsak chetkiu-e, naiuso ni apa nian Yohan ta niane.

¹⁴ Ni amongling eppe, naiuso ni mongtsame, naiuso apa chet nou shioko piakü monglinge!

¹⁵ Tititenai Apaou khako apa asong iula-e, naiuso apaüh theng tsüdekünai phop khiam tsüshiu-e; tiautenai apa nyiu thaimong ainou yakü apa Asio Onthso nou miankü noi-e.

¹⁶ Apaüh Israel thsoso piakü ngüso Apaou Goa dongai phokle-i-e.

¹⁷ Po nouso mong thsoso dongai phokle-i-e, naiuso angem tsülukünso asiohoi mongyang nai tsakei-i-e, naiuso Apaou thaiutha khemkü noinso khemluao, apa khako Elija onthso naiuso oukong nai apa khu-e.”

¹⁸ Nungai Zekariaüh hong nou tü ngiom, “Ngo nung titi nge-e? Tititenai ngo petche, naiuso jü tsammongnyiu aakih laiukü khuwaniu.”

¹⁹ Hong nou thalakü apa tü ngiom, “Ngo Gabriel” “Ngo Goa khako tsatsün noin, naiuso ni tü chiteao naiuso adongai nung ngem amei kanao ngo hong.

²⁰ Athaplu, nung shinaptsün ajekhaiu mosaokün lektso ni ngio chiteao tsüshiokü noi-e, tititenai jü ngio sübao atao atsüoting nai shinape nung ta ni atsüo ta tsüyang.”

²¹ Khaiuniahoi nou Zekaria taiukü noiküla, naiuso apa amkham tsamai laiukü noiphe ngüso ngawan.

²² Tilai apa khengai shin, apaüh ngüso ko ngio chiteao tsüshio nungtiphe amkham tsamai apaüh miamian tsak ep ta ngüsoüh ngelan, ngüso tü pha nou ii nou han.

²³ Tilai apa amkham tsamai yathsüotsün atao thonkü shin, apa tsamai khun.

²⁴ Nung ajekhaiu yanküta apa tsammongnyiu Elizabet pem tsükengkü iulan.

²⁵ “Lo aphiteng nai Apaou nou ngü ta hachu-iu,” “khaiunia ongko ngo amiam noitsün apaüh kankü khu-iu” ta apaüh ngiom.

Yisu Chetau Thaiutha Nge-itsün

²⁶ Lo alei luok nouko Goa ainou aünhong Gabriel Galil ai nok tsak nian nou Nazaret ai hong.

²⁷ David kau nai khaiunia tsak nian nou Yosepüh emkü noitsün asangting meso tsak nian nou Mari dongai Gabriel hong.

²⁸ Apaüh Mari dongai khukü ngiom, “Ni ko aalu lünoi! Apaou niko noin, naiuso ni thatü oukkiu-iu!”

²⁹ Lüko nung ngiotsün thaiutha apa monghenkü shi-an, naiuso mongai nung ti-in salam ngio ta ngawan.

³⁰ Hong nou apa tü ngiom, “Lahat, Mari! Tititenai Goa ainou ni atsüojin epiu.

³¹ Naiuso athaplu, ni meshen methso noithang tsükengkü iula-e, naiuso melothso tsak chete, naiuso ni apa nian Yisu ta nian-e.

³² Apa asong noi-e, naiuso apa tü asongting ün Thso ta jone. Apaou Goa nou apa po David nokpao noikham apa hao kiu-e.

³³ Yakob kau khako apa asaita nokpao-e, naiuso apa nokshing athontsüyange!”

³⁴ Mariüh aünhong nou tü ngiom, “Ngo asangting tsak. Nung titi shio-e?”

³⁵ Hong nou thalakü apa tü ngiom, “Asio Onthso akhako shi-e, naiuso Asongting oukong nou ni lajei-e. Nungtiphe achettao noitsün methso tü Goa Thso ta jone.

³⁶ Atsammong Elizabet lüyangsan. Apa sonthe noilüko, pemtsükengkü iula-iu; naiuso sau tü lon ta jon, apa lo nou pemtsükengkü alei luok noin.

³⁷ Tititenai Goa ainou ngio shitsün titso tsüshinapkü tsünoi-e.”

³⁸ Mariüh ngiom, “Ngo Apaou yathsüotsün noin,” “nung ni ngiotsünli ngü da lünoi-i.” Nungai hong nou apa ainou punge.

Mariüh Elizabet Sailutsün

³⁹ Mariüh nung taoko tsaloukü king goumchi Yihuda nok tsakai khaolaokü khu;

⁴⁰ naiuso Zekaria tsamai napkü Elizabet tü salam ngio ngiom.

⁴¹ Tilai Elizabetüh Mari salam ngio lula, apa thaimongai methso nou hamkei. Elizabet Asio Onthso nou mian.

⁴² Apaüh sang asong nou vekü ngiom, “Nyiuhai ongko ni thaiumei, naiuso athaimongai noitsün nio thaiumei!

⁴³ Apaou nyiu ngo tü shisailutsün nung chhi asong, ngo da tiau shinape?

⁴⁴ Tititenai athaplu, ni ngiotsün salam ngio jü noukhan ai napnai jü thaimongai methso nou amongling nou hamkei.

⁴⁵ Sauüh atsüo ta monglam, apa thaiumei, tititenai Apaou nou apa tü ti thalou nung shinape.”

Mariüh Nianlomtsün Jih

⁴⁶ Mariüh ngiom, “Jmongpemüh Apaou nian lomji;

⁴⁷ Jü onthso ngo Aasantsün Goa tü thatü mongtsamiu.

⁴⁸ Tititenai apaüh meshen yathsüotsün mongmei nou tü lu-iu! Tititenai athaplu lo taoko yakü vetao apem nou ngü thaiumei ta jone.

⁴⁹ Tititenai ashiotsün nou jü thaiutha chhi asong chhi-iu; naiuso apa nian asio noin.

⁵⁰ Apa atsüojin apa lon hattsünso khako vetao pungkü noi-e.

⁵¹ Apaüh meshen pha nou meshen oukong han. Amekoi ayang nouso apaüh tsüthawao-i-e.

⁵² Apaüh nokpao thsoso ngüso nokpao noikham ainou teni-iu. Naiuso amongmei khaiunia nouso tensaniu.

⁵³ Anaiutsünso apaüh jengtsaiu amei nou tsamkiu-iu, naiuso memei nouso apaüh phakeng honganiu.

⁵⁴ Apaüh sam paosiposo tü thaloutsün tsülean naiuso apa tsamki Israel tü hachuao shin

⁵⁵ Apaüh Abraham naiuso apa thsaosithso apem tü asaita atsüojin hanao yangsaniu!”

⁵⁶ Naiuso Mari apako alei süme thatso noiküta apa tsamai laokü khu.

Alimkiutsün Yohan Chettsün

⁵⁷ Lo Elizabet methso chetao atao saokü shin, naiuso apaüh melothso tsak chet.

⁵⁸ Apa phaohai si tsammonghaiüh apa tü Apaou nou atsüojin asong hantsün lula, naiuso ngüsoüh apa ko monglingat.

⁵⁹ Tilai methso nou anoujet tsak ngoi, ngüsoüh methso nou tipanao shin, naiuso ngüsoüh apa meshen po nianli, Zekaria ta nianao aiu.

⁶⁰ Lüko apa nyiuüh thalakü ngiom, “Tsüde! apa nian Yohan ta niane.”

⁶¹ Ngüsoüh apa tü ngiom, “Atsammong ongko nung nian niankü sau tsünoi!”

⁶² Apaüh apa sau tü nianao aiuji ta ngüsoüh apa po tü ii nou han.

⁶³ Asattao lungkhio nou saokü apaüh sat, “Apa nian Yohan.” Nungai ngüso apem nou ngawan!

⁶⁴ Nungailu apa son sop kiukü apa lei sokhtham naiuso apaüh Goa nian lomkü ngio chiten.

⁶⁵ Ngüso lemkü noinso chikü hatkü iulan, naiuso Yihuda kingnok chikü ai nung ngio chitetsün chikü nok miankü penglükhun.

⁶⁶ Nung lutsün apem nou meshen mongai yangkü ngiom, “Naito nung methso nou ti the-e?” Tititenai Apaou oukong pha nou apa da noiküla.

Zekaria Khapiam Ngio

⁶⁷ Yohan po Zekaria Asio Onthso nou miankü chitekü ngiom,

⁶⁸ “Israel Goa Apaou lomkü lünoi! Tititenai apaüh meshenhoi sailuao shin, naiuso ngüso thaiutha aasan nou shan.

⁶⁹ Apaüh meshen tsamki David thsaosithso ainou sam hau akipsantsün tsak kiu-iu.

⁷⁰ Apa asio e-po nouso tsangkü peta thaloukü noin.

⁷¹ Apaüh sam eh nouso naiuso sam tü chinyantsünso oukong ainou kipsane ta thalouküla.

⁷² Apaüh sam paosipo hao atsüojin hane, naiuso apa asio ngiokhem yangsane.

^73-74 Sam paosipo Abraham tü thaloutaiutsünli sam eh nouso oukong ainou kipsane, naiuso apa tü ahat tsünoikü yathsüo-e.

⁷⁵ Nungaito sam akihlaiu thathonkü apa khako asio naiuso ngiotsüo noi-e.

⁷⁶ “Loüh jü thso ni tü Asongting E-po ta jone.”

⁷⁷ Meshenhoi hao ngüso angei wankiutsün tsangkü aasan ngetsün kiu-e,

⁷⁸ Sam Goa atsüojin nou Akheng ainou ajekhaiu ayan sungtsün nou sam sailu-e.

⁷⁹ Anyakhem naiuso e ahsu ai moknoitsün chiai awoniao thaiutha Aalu yam ainou sam hok niaao, ni Apaou khako apa yam khemluao khu-e.”

⁸⁰ Methso nou onthso nai naiuso nyih nai oukongkü songjikan. Israel tü apa hantsün ajekhaiu mosaokün chikü apa singtso goh nai kih.