DANIEL 1 - ASIO THSAMLAI C.L. Bible (BSI)

DANIEL NAIUSO APA HAISO NGIOLAT ( 1:1—6:28 ) Nebukadnezar ün Mikhem Tsamai Oum Khaiunia Nouso

¹ Yihudahai nokpao Jehoiakim nokshing pon süme nouko nai, Babilon hai nokpao Nebukadnezarüh Yirusalem kom naiuso noknio nou lemlouwan.

² Apaou nou apa hau nokpao Jehoiakim thalouwan-i naiuso amkham jengtsaiu ajantso kanlükhunan-i. Apaüh akhothio nai noitsün khaiunia ajantso apako nialou küta Babilon nai apa goa so amkham tsamai nialoukü khu, naiuso athaloutsün jengtsaiu nouso amkham tsam jengtsaiu taiutsün tsampai nouso ai thiowan.

³ Nokpao nou apa khemko asong khaiunia Asefenez tü, Israel hai akhothiotsünso ongko nokpao naiuso asong kau ainou oum khaiunia ajantso chosanau ngiokhem kiu.

⁴ Ngüso to athapau pühe meikü, ilatsün sunkü, a-nge amon meikü noikü, liukü ngelaau shiotsün, naiuso pem nai tsaosilao tsüsunkü, nungti ngüsoüh nokpao ün mikhem tsam nai saiukü oumkü yathsüoau shiokü theau noin. Nungko ngüso tü Asefenezüh Babilonhai ngio weau naiuso satau tsandeau noiküla.

⁵ Ajekhaiu pungkü ngüso hau nokpao mikhem tsam nai noitsün mepemhoi nousoüh heshiutsün chihsikhiam wekülu kiuau noin ta nokpao nou lüko ngiokhem kiu. Ngüso hau nungti pon süme tsande küta nokpao khako ngüso hanau noin.

⁶ Achosantsün mongko ngüso Daniel, Hanania, Mishael, naiuso Azaria so noiküla, nungso chikü Yihuda kau ainou noiküla.

⁷ Asonghoi nousoüh ngüso hau nian ayan nungti likium: Daniel tü Belteshazzar, Hanania tü Shadrak, Mishael tü Mishak naiuso Azaria tü Abednago ta jon.

⁸ Lüko Danielüh nokpao ün mikhem tsam ainou theng eheshiu chihsikhiam hetsün tsangkü amkham yamko meshen tsülongei au yanglou, nungtiphe apaüh Asefenez tü apa hachu au sangh,

⁹ naiuso Goa nou Daniel khako Asefenez hau atsüojinyang hanau yangsani.

¹⁰ Asefenez nung nokpao lun hatphe, apaüh Daniel tü ngiom, “Ni ti he-e naiuso shiu-e, nung thaiutha nokpao nou thatlouwaniu, naiuso nungko ni amao pühe nouso tsüthayapkü epsan naito, apaüh ngü loatkü wane.”

¹¹ Nungtiphe Daniel, apa naiuso apa haiso süme khako ehü Asefenezüh taiukiutsün dongai khukü ngiom,

¹² “Sam tü ajekhaiu chenyi athelu, sam hau eheau thsamsang naiuso ashiu au khiamsang akiu.

¹³ Nungthanko nokpao ün mikhem tsam nai chih hetsün oum nouso ko sam tü welu-ekü athap, naiuso sam athap au titi noin nungtü ngamkü ni ngio ajanthat akiu.”

¹⁴ Ngüso hau ajekhaiu chenyi thelu-iau apa mongchiosan.

¹⁵ Tilai atao nou thonkü shin, nokpao chihsikhiam heshiutsünso chikü nouko naito ngüso bao onmei naiuso kongjeng noiküla.

¹⁶ Nungtiphe nungko yaküto ehü nou ngüso hau nokpao ün chihsikhiam liko thsamsang tsülaokü he-iau kium.

¹⁷ Goa nou nung pühe püle nouso hau ange amon nou kium. Nungko hakü apaüh Daniel hau atsangshei naiuso meamean lothatkü tsangshei kiuau montsün kium.

¹⁸ Nokpao nou thattaiutsün pon süme athon nai, Asefanezüh nung pühe püle nouso chikü Nebukadnezzar dongai nialoukü khu.

¹⁹ Nokpao nou ngüso chikü ko chite, nai Daniel, Hanania, Mishael, naiuso Azaria soüh amaohai chiai apa thsüokü monglingi. Nungtiphe ngüso nung nokpao ün mikhem tsam nai mepemhoi iula.

²⁰ Nokpao nou ti ngiosang sanglünou, nung khaiunia püle nousoüh apa, nokshing athum nouko aküo chitetsün tsüdekünai alonga shantsünso chiai che jam nou phopkü ngüsoüh ngekü noiküla.

²¹ Persiahai nokpao Sairusüh Babilon mokomkün lektso Daniel, nokpao ün mikhem tsam nai noi.