SALM 1 - KA BAIBL

Ka jingsuk kaba shisha

¹ Suk uta u briew u bymïaid ha ka jingïasylla ki bymman, lymne u bymïeng ha ka lynti ki nongpop, lymne u bymshong ha ka jingshong kiba rkhiebeiñ.

² Hynrei, uba ka jingsngewbha jong u ka ha ka hukum U Trai; bad ha ka hukum jong u, u pyrkhat synñia sngi.

³ Te un long kum u dieng ba la thung harud ki wah um, uba sei la u soh ha la ka aïom; uba ka sla jong u ruh kam tlor noh; bad kaei kaei ruh kaba u leh kan man bha.

⁴ Ki bymman kim long kumta; hynrei, ki long kum u stait uba ju rong noh ka lyer.

⁵ Namar kata, ki bymman kin ym ïeng ha kata ka jingbishar, lymne ki nongpop ha ka jingïaseng ki bahok.

⁶ Naba U Trai u ithuh ïa ka lynti ki bahok: hynrei, ka lynti ki bymman kan duh noh.