Ka Shithi U Paul Sha Ki Nong Rom 7 - KA BAIBL

Ka nuksa na ka jinglong shi tnga

¹ Ne phim ju tip, ko ki para, (namar nga kren ha kita kiba tip biang ïa ka hukum) ba kata ka hukum ka don bor halor u briew katba u dang im?

² Namar ka briew kaba don tnga la teh da ka hukum keiñ ïa ka ha uta u tnga katba u dang im; hynrei, lada uta u tnga u ïap noh, ka la lait noh keiñ na kata ka hukum ka jong uta u tnga.

³ Naba kumta te, lada kan ïoh tnga ïa uwei pat u briew, katba dang im uta u tnga jong ka, yn ñiew ïa ka, ka baklim; hynrei, lada uta u tnga u ïap noh, ka long kaba lait noh na kata ka hukum; kumta keiñ, kam long shuh ka baklim la ka la ïoh tnga ïa uwei pat u briew.

⁴ Kumjuh te ma phi, ko ki para jong nga, la pynlong ïap ïa phi ruh ïa kata ka hukum da ka met U Khrist; khnang ba phin ïoh kurim bad uwei pat, bad uta keiñ ïa uba la pynmih pat na ki baïap, ba kumta, ngin ïoh sei soh sha U Blei.

⁵ Namar mynba ngi dang long ha ka doh, kita ki jingkwah brai ki jong ka pop, ïa kiba la pynkynroi da kata ka hukum, ki la ïatrei shait ha ki dkhot met jong ngi ïa ka ban sei soh sha ka jingïap.

⁶ Hynrei, mynta, la pyllait noh ïa ngi na kata ka hukum, naba ngi la lah ïap ïa kata ha kaba la ju bat ïa ngi; ba kumta, ngin ïoh ban shakri ha ka jingthymmai ka mynsiem, bad ym ha ka jinglong barim jong ka dak.

Ka jingïaleh sat kaba shapoh jong ka pop

⁷ Kumno te ngin ïa-ong? Kata ka hukum ka long pop? Em, ym kumta! Hynrei, pynban, ngam shym la ïoh tip ïa ka pop, lymda da ka hukum; namar ngam shym la lah ïoh ithuh ïa ka jingikwah, lymda kata ka hukum ka la ong: “Men ym ikwah.”

⁸ Hynrei, kata ka pop, haba ka la kem daw da kata ka adong, ka la trei pynshait ha nga ïa ka kynja jingikwah baroh: namar khlem ka hukum, ka pop ka long ka baïap.

⁹ Namar, nga, mynno mynno, nga la long uba im khlem ka hukum; hynrei, ynda kata ka adong ka la wan, kata ka pop ka la khih im shait, nga te nga la ïap noh keiñ.

¹⁰ Te kata ka adong ïa kaba la buh khnang ïa ka ban pynim, ïa kata keiñ, nga la shem ba ka long ïa ka ban pynïap.

¹¹ Namar kata ka pop haba ka la ïoh dong, da kata ka adong ka la shukor ïa nga, bad da kata ka la pynïap noh ïa nga.

¹² Kumta te, kata ka hukum ka long ka bakhuid hi keiñ, bad kata ka adong ruh ka bakhuid bad ka bahok bad ka babha de.

¹³ Hato te kane ka babha ka la jia long ka jingïap ïa nga? Em, ym kumta! Hynrei, ka pop keiñ, ba kan ïohpaw ba ka long pop, da kaba trei pynshait ïa ka jingïap ha nga da kata ka babha; ba kumta, kata ka pop da kata ka adong kan da paw kaba pop shikatdei eh.

¹⁴ Namar ngi tip keiñ, ba kata ka hukum ka long kaba kynja mynsiem; hynrei, ma nga, nga long uba kynja doh, ïa uba la die noh keiñ hapoh ka pop.

¹⁵ Namar ïa kata kaba nga leh, ngam shemphang; namar ym ïa kata kaba nga mon, ïa kata nga leh; hynrei, pleng ïa kata kaba nga isih sat, ïa kata keiñ nga leh.

¹⁶ Te lada nga leh ïa kata ïa kaba ngam mon, nga ïakohnguh lem bad kata ka hukum, ba ka, ka long ka babha.

¹⁷ Mynta te, ym dei shuh ma nga uba leh ïa ka, hynrei, kata ka pop kaba shong sah ha nga.

¹⁸ Namar nga tip ba ha nga, kata, ha ka doh jong nga, kam shong sah ei ei ka babha; namar ïa ka ban mon shisha, ka don eh ha nga; hynrei, ïa ka ban leh ïa kata ka babha, kam don.

¹⁹ Namar ïa kata ka babha ïa kaba nga mon, ngam leh; hynrei, pleng ïa kata ka basniew ïa kaba ngam mon, ïa kata keiñ nga leh.

²⁰ Hynrei, lada nga leh ïa kata ïa kaba nga hi ngam mon, ym dei shuh ma nga uba leh ïa kata, hynrei, kata ka pop keiñ kaba shong sah ha nga.

²¹ Nga shem te shaphang ka hukum, ba ha nga uba mon ban leh ïa ka babha, kata ka basniew ka don hi ha khmat.

²² Namar nga sngewtynnad eh keiñ, ha ka hukum ka jong U Blei katba kum uta u briew bashapoh.

²³ Hynrei, nga ïohi ïa kawei pat ka hukum ha ki dkhot met jong nga, kaba ïaleh thma bad kata ka hukum ka jong ka jingmut jong nga, bad kata ka ïalam mraw ruh ïa nga ha kata ka hukum jong ka pop kaba ha kita ki dkhot met jong nga.

²⁴ A nga u briew uba shah lanot khop! uei u ban pyllait noh ïa nga na ka met ka jong kane ka jingïap?

²⁵ Nga ainguh ïa U Blei da U Jisu Khrist uba U Trai jong ngi! Kumta te, ma nga hi keiñ da kata ka jingmut shisha, nga shakri ïa ka hukum U Blei; hynrei, da kata ka doh, ïa ka hukum ka pop.