PHILIPPI 4 - KA BAIBL

Ki jingsneng kyntu

¹ Namar kata, ko parabangeit ba-ieit jong nga bad ïa kiba la kynmaw hir hir, ka jingkmen bad ka pansngiat jong nga, kumta to ïeng skhem ha U Trai, ko hep ba-ieit jong nga.

² Nga kyrpad ïa ka Ïuodia, bad nga kyrpad ïa ka Suntukhi, ban ïalong kajuh ka jingmut ha U Trai.

³ Ho-oid, nga kyrpad ïa me ruh, ko para baïakit lyngkor lem basngur, to men ïarap ïa kine ki kynthei, naba ki la ïatrei lem bad nga ha ka gospel, bad u Klemen ruh, bad kita ki para baïatrei lem jong nga, kiba ki kyrteng jong ki, ki don ha ka kitab ka jingim.

⁴ To phin ïakmen noh ha U Trai ha la ka sngi; te nga ong pat, “To ïakmen.”

⁵ To ai ba ka jingïaishah jong phi kan paw ha ki briew baroh. U Trai u la jan.

⁶ Wat khuslai ïa kaei kaei ruh; hynrei, ha kaei kaei baroh da ka jingduwai bad ka jingkyrpad lem bad ka jingainguh, to phin pyntip ïa ki jingpan jong phi sha U Blei.

⁷ Te kata ka jingsuk U Blei, kaba palat ïa ka jingshemphang baroh, kan ri jai jai keiñ ïa ki dohnud jong phi bad ïa ki jingmut jong phi ha U Khrist Jisu.

⁸ Ha kaba wai noh, ko parabangeit, kiei kiei kiba shisha, kiei kiei kiba donburom, kiei kiei ki bahok, kiei kiei ki bakhuid, kiei kiei kiba itynnad, kiei kiei kiba dei ïaroh; lada don kano kano ka jingbha, bad lada don kano kano ka jingïaroh, to phin ïapyrkhat ïa kine kiei kiei ruh.

⁹ Ïa kiei kiei kiba phi la nang bad phi la pdiang, bad phi la ïohsngew bad phi la ïohi ha nga, to phin leh ïa kine; te U Blei ka jingsuk un sa long lem bad phi.

U Paul u pynpaw ka jingsngewnguh

¹⁰ Hynrei, nga kmen ha U Trai shibun eh, ba ynda mynta phi la pynthymmai pat ïa la ka jingmut na ka bynta jong nga; ha kaba phi la ju pyrkhat shisha, hynrei, phim shym ïoh lad.

¹¹ Ym ba nga ong shaphang ka jingsngewkyrduh; namar nga la nang, ha kano kano ka jinglong ba nga long, ha kata hi ban sngewhun.

¹² Nga tip kumno ban pynpoh, bad nga tip kumno ban sngewdap kyrhai: ha kaei kaei bad ha kiei kiei baroh nga la nang ïa kata ka buit ban sngewkdang ruh bad ban sngewthngan, ban sngewdap bad ban sngewkyrduh.

¹³ Nga lah ban leh ïa kiei kiei baroh ha uta uba pynshaitbor ïa nga.

¹⁴ La kumta ruh, phi la leh bha ba phi la don ka jingïasyllok bad ka jingshahshitom jong nga.

¹⁵ Te phi hi ruh phi tip, ko nong Philipi, ba ha kaba sdang ka gospel, mynba nga la leit noh na Makedonia, ba ym don ka balang kaba la don ka jingïasyllok bad nga shaphang kaba ai bad kaba pdiang, hynrei, tang ma phi hi.

¹⁶ Naba wat ha Thessaloni phi la ïaphah lem shi wat ar wat haba nga kyrduh.

¹⁷ Ym ba nga wad khnang ïa ka jingai; hynrei, nga wad khnang ïa u soh uba roi byllien sha ka jingkheiñ jong phi.

¹⁸ Hynrei, nga don kiei kiei baroh, bad nga dap kyrhai; la pyndap ïa nga, haba la ïoh pdiang na u Epaphroditos ïa kiei kiei na phi, ïa ka jingiw baiwbih, ïa ka jingkñia ba pdiang hun, ba pynsngewbha eh ïa U Blei keiñ.

¹⁹ Te U Blei jong nga un pyndap ïa ka jingkyrduh jong phi baroh katba kum kata ka jingkynrei spah jong u ha ka burom ha U Khrist Jisu.

²⁰ Te ha U Blei bad U Kpa jong ngi long ka burom ha la ka rta: Amen.

Ki jingkhublei

²¹ To ai khublei ïa uwei pa uwei na ki riewkhuid ha U Khrist Jisu. Ki parabangeit kiba don lem bad nga ki ïakhublei ïa phi.

²² Baroh ki riewkhuid ki ïakhublei ïa phi, kham tam kita kiba na ka ïing u Kaisar.

²³ Ka jingaiei U Jisu Khrist uba U Trai kan long lem bad ka mynsiem jong phi: Amen.