PHILIPPI 3 - KA BAIBL

Ka hok kaba da shisha

¹ Ha kaba wai noh, ko parabangeit jong nga, to phin kmen noh ha U Trai. Ban thoh ïa kita kijuh ha phi, kam long shisha kaba shitom ïa nga, hynrei, ïa phi ka long kaba pynskhem.

² To kiar noh na kita ki ksew, to kiar noh na kita ki nongleh basniew, to kiar noh na kata kaba otsher.

³ Namar ngi keiñ, ngi long kata ka jingotsher, kiba mane da U Mynsiem U Blei, bad kiba leh kmen ha U Khrist Jisu, bad ki bymshaniah ha ka doh.

⁴ La nga hi, nga lah ban ïoh daw ban shaniah wat ha ka doh. Lada uno uno uwei pat u mut ban shaniah ha ka doh, ma nga uba kham tam;

⁵ ba la otsher ïa nga ha ka baphra sngi, na ka kynja Israel, na ka jaid Benjamin, u Hebru na ki Hebru; shaphang ka hukum, u Pharisi;

⁶ shaphang ka jingshitrhem, uba behbeiñ ïa ka balang; shaphang ka hok kaba na ka hukum, uba khlem jingrem.

⁷ Hynrei, kita kiei kiei kiba la long ki jingmyntoi ïa nga, ïa kine nga la ñiew ka jingduh na ka bynta U Khrist.

⁸ Ho-oid, shisha keiñ, bad nga ñiew ïa kiei kiei baroh ba ki long ka jingduh na ka bynta ka jingbha kor tam jong ka jingtip ïa U Khrist Jisu uba U Trai jong nga; na ka bynta jong u, nga la duh noh ïa kiei kiei baroh, bad nga ñiew synrum ïa ki, khnang ba ngan ïoh ïa U Khrist,

⁹ bad ba yn shem ïa nga ha u, u bymdon ka hok ka jong nga hi, kata keiñ kaba na ka hukum, hynrei, kata kaba da ka jingngeit ha U Khrist, ka hok kaba na U Blei da ka jingngeit:

¹⁰ ba ngan ïoh ithuh ïa u, bad ïa ka bor ka jingmihpat jong u, bad ïa ka jingïasyllok ki jingshah jong u, haba la pynsyriem ïa nga ha ka jingïap jong u;

¹¹ lada kumno kumno ngan ïoh kot sha kata ka jingmihpat na ki baïap.

To beh sha pyrshah ka dak

¹² Ym ba nga la ïoh pdiang lypa, lane ba la pynjanai lypa ïa nga: hynrei, nga beh shaphrang keiñ, ba kumta, ngan ïoh bat ïa kata na ka bynta kaba la bat ïa nga ruh da U Khrist Jisu.

¹³ Ko parabangeit, nga ngam ñiew ïa lade uba la lah bat: hynrei, ïa kane kawei nga leh, da kaba klet noh ïa kita kiei kiei kiba shadien, bad da kaba kner noh sha kiei kiei kiba sha khmat,

¹⁴ nga beh sha pyrshah ka dak ban ïoh ïa ka jingïathong kaba ka jingkhot shaneng ka jong U Blei ha U Khrist Jisu.

¹⁵ Namar kata, kat kiba long kiba janai, to ngin ïamut brai ïa kane; te lada ha kaei kaei phi ïamut da kumwei, ïa kane ruh U Blei un pynpaw ha phi.

¹⁶ Hynrei, kat sha kaba ngi la lah ïoh kot, to ngin ïaïaid da kajuh ka rukom.

¹⁷ Ko parabangeit, to long phi kiba ïapyrthuh bud ïa nga, bad to khmih thuh ïa kita kiba ïaid kumta kat kumba phi ïoh ïa ngi kum ka rukom.

¹⁸ Namar shibun ki ïaid, shaphang kiba nga ju ïathuh ha phi, bad mynta ruh, nga ïathuh da kaba ïam keiñ, ba ki long ki nongshun jong ka diengphna U Khrist:

¹⁹ kiba ka bakut jong ki, long ka jingjot, kiba u blei jong ki, long ka kpoh, bad ka burom jong ki, long ha ka jinglehrain jong ki, kiba ïaimut brai ïa kiei kiei ruh kiba ha ka khyndew.

²⁰ Namar kata ka jinglong trai-shnong jong ngi ka long ha bneng; nangta ruh ngi ïa-ap khmih lynti ïa U Nongpynim, U Jisu Khrist uba U Trai:

²¹ u ban thaw thymmai ïa ka met ka jinglong rangli jong ngi, ïa ka ban pynlong ïa ka shidur bad ka met ka burom jong u, katba kum kata ka jingpyntrei da kaba u lah ruh wat ban pyndem ïa kiei kiei baroh ha lade.