OBADAÏAH 1 - KA BAIBL

Ka jingpynhiar kyrdan ïa ki Edom

¹ Ka jingithuhpaw u Obadaïah. Kumne u ong U Trai U Blei shaphang ka Edom: “Ngi la ïohsngew ka jingbna na U Trai, bad ïa u nonglam-ktien la phah hapdeng ki jaid bynriew, u da ong, ‘To ïeng phi, bad to ngin ïaïeng ïaleh thma ïa ka.’

² Ha khmih, nga la pynlong kaba rit ïa me hapdeng ki jaid bynriew: la ibeiñ eh ïa me.

³ Ka jingsarong ka dohnud jong me ka la shukor ïa me, A me uba shong ha ki jingpdang ki mawsiang, uba ka jaka shong jong me ka hajrong; uba ong ha la ka dohnud, ‘Uei u ban pynhiar ïa nga haduh ka khyndew?’

⁴ La me kiew sha jrong kum ka pukni, bad la me buh la ka skum hapdeng ki khlur, ngan pynhiar ïa me nangta,” ong U Trai.

⁵ “Lada ki nongtuh ki la wan ha me, lane ki nonglute mynmiet (katno la pynduh ïa me!) kin ym da tuh haduh ba kin da biang? Lada ki nongkheit soh Waiñ ki la wan ha me, kin ym da pynsah khyndiat ki soh khyrdong?

⁶ Katno la ïit noh ïa ki jong u Iso! katno la wad noh ïa ki jingkynshew ba la buhrieh jong u!

⁷ Ki briew baroh kiba na kata ka jingïateh lok jong me ki la leit on lynti ïa me, jin haduh ka pud: kita ki briew kiba ïasuk bad me ki la shukor ïa me, bad ki la jop ïa me; kita kiba la bam ïa u kpu jong me, ki la buh ka jingriam hapoh jong me: ym don ka jingsngewthuh satia ha u.

⁸ “Hato ha kata ka sngi,” ong U Trai, “ngan ym pynduh noh na Edom ïa ki riewstad, bad ïa ka jingshemphang na u lum u Iso?

⁹ Bad ki rangbah bakhlaiñ jong me, ko Teman, kin kyiuh noh, khnang ban pynduh noh ïa uwei uwei baroh na u lum u Iso da ka jingpynïap.

¹⁰ “Namar kata ka jingleh-jubor ba la leh ha u para jong me u Jakob, ka jinglehrain kan tap ïa me, bad yn pynduh noh ïa me junom.

¹¹ Ha kata ka sngi ba me la ïeng shiliang, ha ka sngi ba ki nongwei ki la rah noh ïa ka spah jong u, bad ki nongwei ki la rung shapoh ki khyrdop jong u, bad ki la khalai ïa ka Jerusalem, ma me keiñ, me la long kum uwei na kita.

¹² Hynrei, wat khmih ma me ïa kata ka sngi u para jong me, ha ka sngi ka jingjynjar jong u, bad wat leh kmen halor ki khun u Judah ha ka sngi ka jingpynjot jong ki; lymne wat kren sarong ha ka sngi ka jingshipa.

¹³ Wat rung shapoh ka khyrdop u paidbah jong nga ha ka sngi ka jingjynjar jong ki; bad wat khmih ïa ka jingshitom jong ki ha ka sngi ka jingjynjar jong ki, lymne wat buh ïa la ki kti ha ka spah jong ki ha ka sngi ka jingjynjar jong ki.

¹⁴ Bad wat ïeng ha kaba ïashem ki lad, ïa ka ban pom noh ïa kita kiba na u kiba phet ïap; bad wat aiti noh ïa kita kiba na u kiba sah ha kata ka sngi ka jingshipa.

¹⁵ “Naba ka sngi U Trai ka la jan ha ki jaid bynriew baroh: kumba me la leh, ïa kata yn leh ïa me; ka bainong jong me kan phai pat halor ka khlieh jong me hi.

¹⁶ Naba kumba phi la dih halor u lum bakyntang jong nga, kumta ki jaid bynriew baroh kin dih borabor, shisha, kin ïadih, bad kin nguid krak, bad kin long kumba kim shym la long.

Ka jingkyntiew pat ïa ki Israel

¹⁷ “Hynrei, ha u lum Seïon kin don kita kiba lait im, bad un long u bakyntang; bad ka ïing u Jakob kan ïoh ïa la ki jingïoh kynti.

¹⁸ Bad ka ïing u Jakob kan long ka ding, bad ka ïing u Joseph ka thylliej ding, bad ka ïing u Iso kan long 'langïap, te kin ing hapdeng jong ki, bad kin bam duh ïa ki: bad yn ym pynsah ïano ïano ha ka ïing u Iso; naba U Trai u la kren ïa ka.

¹⁹ Te kita kiba na ka ri shathie kin ïoh ïa u lum u Iso; bad kita kiba na ka ri them ïa ki Philistia: bad kin ïoh ïa ka ri Ephraim, bad ïa ka ri Samaria: bad u Benjamin ïa ka Gilead.

²⁰ Bad ka jingpynwir jong une u paid ki khun Israel kin ïoh ïa ka jong ki Kanaan, jin haduh Sarephat; bad ka jingpynwir ka Jerusalem, kaba ha Sepharad, kin ïoh ïa ki nongbah ka ri shathie.

²¹ Bad ki nongpynim kin wan kiew halor u lum Seïon ban bishar ïa u lum u Iso; te ka hima kan long ka jong U Trai.”