NAHUM 1 - KA BAIBL

Ka jingbitar bad ka jingpynhiar kput U Blei

¹ Ka jingkit ka Ninebeh. Ka kitab ka jingithuhpaw u Nahum u nong Elkosh.

² U Trai u long U Blei u bathut shen bad u pynhiar kput; U Trai u pynhiar kput bad uba dap ka jingbitar; U Trai u pynhiar kput halor kiba ïaleh pyrshah ïa u, bad u buh tyngkai ïa ka jingbitar ïa ki nongshun jong u.

³ U Trai u long uba tud ban bitar, bad uba khraw ka bor, bad un ym pynksan ïa u bymman da lei lei: U Trai u don la ka lynti ha ka lyer langthari bad ha ka 'erïong, bad ki lyoh ki long ka 'dewmet ki sla'jat jong u.

⁴ U sneng ïa ka duriaw, bad u pynrngad ïa ka, bad u pynrngad ïa ki wah baroh: ka Bashan ka tyrkhong noh, bad u Karmel, bad u syntiew u Lebanon u tyrkhong noh.

⁵ Ki lum bah ki khynñiuh ha u, bad ki lum rit ki um noh; ïa ka khyndew la pyn-at phyllung ha khmat jong u, ïa ka pyrthei ruh, bad baroh kat kiba shong ha ka.

⁶ Uei uba lah ban ïeng ha khmat ka jingotshla jong u? Bad uei uba lah ban shah ïa ka jingmeh ka jingbitar jong u? Ïa ka jingotshla jong u la theh noh kum ka ding, bad ïa ki mawsiang la pynpait ar liang da u.

⁷ U Trai u long u babha, ka kut baskhem ha ka sngi ka jingjynjar; bad u ithuh ïa kita kiba shaniah ha u.

⁸ Hynrei, da ka jingshlei kaba tyllep un pynkut noh khoit ïa ka jaka jong ka, bad un beh noh ïa la ki nongshun sha ka jingdum.

⁹ Phi pun aïu pyrshah ïa U Trai? U te un pynkut noh khoit: ka jingjynjar kan ym mih ar sien.

¹⁰ Namar la ki long kum ki dieng shiah ba la suhsat, bad kumba la pynwieh ïa ki ha la ka jingdih, yn thang duh noh ïa ki kum u 'lang tyrkhong.

¹¹ Don uwei uba la mih noh na pha, uba pun ïa ka jingsniew pyrshah ïa U Trai, uba pyrkhat ïa ka jingbymman.

¹² Kumne u ong U Trai: “La ki khlaiñ bha, bad ba ki bun ruh kumjuh, kumta hi keiñ, yn pynïap noh ïa ki, u te un ïaid jah noh. La nga la pynjynjar ïa me, ngan ym pynjynjar shuh ïa me.

¹³ Bad mynta ngan pynkheiñ ïa kata ka lyngkor jong u na me, bad ngan bthat ïa ki jingkhum jong me.”

¹⁴ Te U Trai u la hukum shaphang jong me, ba yn ym bet shuh kiba na ka kyrteng jong me: na ka ïing ki blei jong me ngan pynduh noh ïa ki durblei bad ïa ki durblei ba la saiñ; ngan thaw ïa ka jingtep jong me; naba me long uba ibeiñ.

Ka khubor jong ka jingkyllon ka Ninebeh

¹⁵ Ha khmih halor ki lum ïa ki kjat jong uta uba wallam ki jingïathuhkhana babha, uba pynbna ïa ka jingsuk! To rakhe ïa la Ki Jingkhawai Niam, ko Judah, to pyndep ïa la ki jingkular: naba uta u bymman un ym ïaid shuh lyngba ïa me; la pynduh noh khoit ïa u.