MARKOS 7 - KA BAIBL

Ka rukom pateng la pateng ki tymmen basan

¹ Ynda kumta, ki Pharisi ki la ïawan lang ha u, bad kiba na ki nongthoh, kiba la wan na Jerusalem.

² Haba ki la ïohi te ïa kiba na ki synran jong u, ba ki bam ja da ki kti bymkhuid (kata, khlem da thet satia), ki la pynrem.

³ (Naba ki Pharisi bad ki Jiw baroh, lymda ki ïoh thet bha ïa la ki kti, kim bam satia, ki da bat skhem ïa ka rukom pateng la pateng ki tymmen basan.

⁴ Haba ki wan ruh na ïew, lymda ki ïoh sum, kim bam satia. Bad bun kiwei kiwei pat ruh don, ïa kiba ki la pdiang ban bat skhem, kum ki jingsait ki khuri, bad ki luta, bad ki pliang, bad ki palong ruh).

⁵ Namar kata, kita ki Pharisi bad kita ki nongthoh ki la kylli ïa u, “Balei ba ki synran jong me kim ïaid kat kum ka rukom pateng la pateng ki tymmen basan, hynrei, ki bam ja da ki kti kiba khlem thet?”

⁶ U la ïathuh te ha ki, “Ka dei kaba u Isaïah u la ïathuhlypa shaphang jong phi kiba arsap, kumba la thoh: “ ‘Kine ki briew ki burom ïa nga da la ki rmiang shyntur, hynrei, ka dohnud jong ki te ka jngai na nga:

⁷ hynrei, ki mane thala ïa nga, haba ki hikai kum ki jinghikai ïa ki hukum jong ki briew’:

⁸ “Naba haba phi iehnoh ïa ka hukum U Blei, phi bat skhem ïa ka rukom pateng la pateng ki briew, kum ki jingsait ki luta bad ki khuri: bad ïa bun kiei kiei ruh kiwei pat kum kine phi leh.”

⁹ U la ong ruh ha ki, “Phi kyntait la biang keiñ ïa ka hukum U Blei, ba phin ïoh sumar ïa ka rukom pateng la pateng jong phi;

¹⁰ naba u Moses u la ong, ‘Burom ïa la u kpa bad ïa la ka kmie’; bad, ‘Jar uba krenbeiñ ïa u kpa lane ïa ka kmie, un ïap da shisha’;

¹¹ hynrei, phi ong, ‘Lada u briew un ong ïa la u kpa lane ïa la ka kmie, Kaei kaei ruh ïa kaba men myntoi na nga ka long “Korban” (kata long, “ka jingainguh”), un lait;’

¹² phim shah shuh te ïa u ban leh ei ei ruh em ïa u kpa jong u, lane ïa ka kmie jong u;

¹³ phi da pynduh ïa ka ktien U Blei da ka rukom pateng la pateng jong phi, ïa kaba phi hikai: bad shibun kiei kiei ruh kum kine phi leh.”

Kaei kaba pyntngit ïa u briew

¹⁴ Te haba u la khot ha u ïa uta u paidbah baroh, u la ong ruh ha ki, “To sngap ïa nga phi baroh, to sngewthuh ruh:

¹⁵ ym don ei ei ruh shabar u briew, kaba leit hapoh jong u, ba lah ban pyntngit ïa u: hynrei, kiei kiei ruh kiba mih noh na u briew, kita keiñ, ki long kiba pyntngit ïa u briew:

¹⁶ lada uno uno ruh u don ki shkor ban sngew, to un sngew.”

¹⁷ Te haba u la leit hapoh ïing na uta u paidbah, ki synran jong u ki la kylli ïa u shaphang kata ka pharshi.

¹⁸ U ong te ha ki, “Phi ruh phi long kumta ki bym sngewthuh? Phim shemphang, ba baroh kaba shabar kaba leit shapoh u briew, kam lah ban pyntngit ïa u?

¹⁹ naba kam leit shapoh ka dohnud jong u, hynrei, sha ka kpoh, bad ka mih noh na ka, sharud”: ba ki khuid ki jingbam baroh keiñ.

²⁰ U la ong ruh, “Kata kaba mih noh na u briew, kata keiñ, ka pyntngit ïa u briew:

²¹ naba na shapoh, na ka dohnud ki briew, ki mih noh ki jingmut bymman, kiba klim, kiba ïakai kynthei, kiba pynïap,

²² kiba tuh, kiba kurup, kiba pynsniew, kaba arsap, kaba nuti, kaba khwan lalot, kaba khmih sniew, kaba krenbeiñ, kaba sngewkhraw, bad kaba leh bieit:

²³ kine kiei kiei baroh ki bymman ki mih noh na shapoh, bad ki pyntngit ïa u briew.”

Ka jingngeit ka nong Kanaan

²⁴ Haba u la ïeng, u la leit noh nangta ruh sha ki phang ka Tyros bad ka Sidon; bad haba u la leit hapoh ka ïing, um kwah ïano ïano ruh ban tip, hynrei, um lah ban long ha kaba rieh.

²⁵ Naba don ka kynthei, kaba ka khun rit jong ka, ka don mynsiem bymkhuid, haba ka la ïohsngew shaphang jong u, ka la wan bad ka la dem ha ki kjat jong u.

²⁶ Kata ka kynthei te ka la long ka Grik, ka kynja Syrophinisa, bad ka la kyrpad ïa u, ba un beh noh ïa uta u ksuid na ka khun jong ka.

²⁷ Hynrei, U Jisu u la ong ha ka, “Ai ban pynkdang shuwa ïa ki khun; naba ym dei ban shim ïa ka jingbam jong ki khun, bad ban bred ha ki ksew.”

²⁸ Hynrei, ka la ïathuh bad ka la ong ha u, “Shisha, ko Trai, wat kita ki ksew hapoh ka miej ki bam na kiba lwet jong ki khun.”

²⁹ U la ong te ha ka, “Namar kane ka jingong, to khie leit noh; uta u ksuid u la mih noh na ka khun jong pha.”

³⁰ Te ka la leit noh sha la ïing, bad ka la shem ïa la ka khun ba la pynthiah ïa ka ha ka jingthiah, bad ba la mih noh uta u ksuid.

U Jisu u pynkhiah ïa u bakyllut bad bathlun

³¹ Te ynda U la leit noh pat na ki phang ka Tyros bad ka Sidon, U la wan poi sha ka duriaw Galilaïa, napdeng ki phang Dekapolis.

³² Bad ki wallam ha U ïa u bakyllut bad bakren thlun; ki kyrpad ruh ïa U ba un buh ïa la ka kti ha u.

³³ Te haba U la shim noh ïa u kyrpang weibriew na uta u paidbah, U la buh ïa la ki shynriah'ti ha ki shkor jong u, bad haba U la lah biah, U la ktah ïa u thylliej jong u;

³⁴ bad haba U la khmied sha bneng, U la ud, bad U ong ïa u, “Ephphatha,” kata ban ong, “To long ba la plie”.

³⁵ Te kumne kumne ruh, la plie noh ïa ki shkor jong u, bad la lait ka jingteh u thylliej jong u, bad u la nang kren beit.

³⁶ U la hukum te ïa ki, ba kin ym ïathuh hano hano ruh, hynrei, katba U la nang adong ïa ki, katta ki la nang ïa-pynbna kham tam pynban.

³⁷ Te ki la sngewkyndit bym lah ong shuh, ki da ong, “Ka bha baroh kat kaba U la leh; naba U pynlong ïa ki bakyllut ban sngew, bad ïa ki bymnangkren ban kren.”