MARKOS 16 - KA BAIBL

Ka jingmihpat U Jisu

¹ Ynda la lah ka Sabbaton, te ka Mari ka nong Magdala, bad ka Mari ka kmie u Jakob, bad ka Salomi, ki la thied ïa ki jingiwbih, ba kin ïoh wan ban pynsleh ïa U.

² Te dang step eh ha ka sngi nyngkong jong ka taïew, ki la ïawan sha kata ka jingtep, hamar kaba mih ka sngi.

³ Ki la ïakren paralok hi te, “Uei u ban pyntyllun noh ïa u maw ïa ngi na ka jingkhang ka jingtep?”

⁴ (Te haba ki la jngoh, ki la ïohi ba la lah pyntyllun noh ïa uta u maw); naba u la long uba khraw eh.

⁵ Haba ki la bsut te ha kata ka jingtep, ki la ïohi ïa u samla uba shong sha kamon, uba la kup ïa ka jaiñ lieh kaba jynsur; ki la sheptieng ruh.

⁶ U te u la ong ha ki, “Wat sheptieng; phi wad ïa U Jisu uba na Nasaret, ïa uba la sahnarphna? U la mihpat, um don hangne: ha khmih ka jaka ha kaba ki la ïabuh ïa U.

⁷ Hynrei, khie leit ïathuh ha ki synran jong U, bad ha u Petros, ba U leit sha shuwa jong phi sha Galilaïa; hangta phin ïohi ïa U, kumba U la ong ha phi.”

⁸ Haba ki la mih noh te, ki la phet noh na kata ka jingtep, namar kaba sngewphieng bad kaba sngewkyndit ki la ngat ha ki; hynrei, kim shym la ïathuh ei ei ruh hano hano ruh naba ki la sheptieng.

U Jisu u mihpaw ha ka Mari ka nong Magdala

⁹ Haba U la mihpat te mynstep eh ha ka sngi nyngkong jong ka taïew, U la paw nyngkong ha ka Mari ka nong Magdala, na kaba U la lah beh noh ïa ki hynñiew ki ksuid.

¹⁰ Ka te ka la leit ïathuh ha kita kiba la ju don lem bad U, katba ki dang ïasngewsih bad ïaïam.

¹¹ Ki te haba ki la ïohsngew ba U dang im, bad ba la lah ïohi ruh ïa U da ka, kim ngeit.

U Jisu u mihpaw ha ki ar ngut ki synran

¹² Hadien kata, U la paw ha kawei pat ka dur ha ki ar ngut na ki katba ki ïa-ïaid ha la ka lynti sha ka ri bri.

¹³ Ki ruh ki la leit noh bad ki la ïathuh ha kita kiba dang sah, hynrei, ïa ki ruh, kim ngeit.

U Jisu u phah ïa ki khatwei ngut ban leit ïalap

¹⁴ Hadien te U la paw ha kita ki khatwei ngut hi, katba ki ïashong bam lem; bad U la pynrem ïa ka jingbymngeit bad ïa ka jingeh ka dohnud jong ki, namar ba kim ngeit ïa kita kiba la lah ïohi ïa U hadien ba U la mihpat.

¹⁵ U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh;

¹⁶ te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem.

¹⁷ Kine ki dak ruh kin bud ïa kita kiba ngeit; ha ka kyrteng jong nga kin ïabeh noh ïa ki ksuid, kin kren da ki thylliej bathymmai;

¹⁸ kin rah noh ïa ki bseiñ, bad lada kin dih ei ei ruh kaba pynïap, kan ym pynsniew ïa ki keiñ; kin buh ïa ki kti ha ki bapang, bad kita kin khiah.”

La pdiang noh ïa U Jisu sha bneng

¹⁹ Kumta te ïa U Trai Jisu, hadien ba U la lah kren ha ki, la pdiang soit sha bneng, bad U la shong sha kamon U Blei.

²⁰ Ki te haba ki la mih noh, ki la ïalap kylleng sawdong, U Trai ruh U da trei lem, bad U da pynskhem ïa kata ka ktien da ki dak kiba bud. Amen.