MARKOS 15 - KA BAIBL

U Jisu ha khmat u Pilat

¹ Te kumne kumne ruh, ynda ka la shai, kita ki rangbah lyngdoh ki la ïasylla bad kita ki tymmen basan bad kita ki nongthoh bad kata ka dorbar baroh ruh; haba ki la khum ïa U Jisu, ki la ïalam noh ïa u, bad ki la ai noh ha u Pilat.

² Te u Pilat u la kylli ïa U, “Me long U Syiem ki Jiw?” U te U da ïathuh U la ong ha u, “Me ong.”

³ Bad ki rangbah lyngdoh ki la mudui ïa u shaphang bun kiei kiei ruh.

⁴ U Pilat te u la kylli pat ïa U, u da ong, “Mem ïathuh ei ei? Ha khmih katno kiei kiei ba ki mudui ïa me.”

⁵ Hynrei, U Jisu um shym ïathuh ei ei shuh, kat ban pynlyngngoh ïa u Pilat.

La aiti noh ïa U Jisu ban sahnarphna

⁶ Te ha Ka Jingkhawai Niam Ka Jinglait, u ju pyllait ha ki, ïa uwei u nongsah byndi, kat uba ki la ïapan na u.

⁷ Te la don uwei uba ki khot “u Barabbas”, ïa uba la khum lem bad kita kiba la pynkhihwin, ki briew kiba la pynïap briew ha ka jingkhihwin.

⁸ U paidbah te haba u la pyrta jam, u la sdang ban pan, ba un leh kumba u ju leh ha ki.

⁹ Hynrei, u Pilat u la ïathuh ha ki, u da ong, “Phi mon ba ngan pyllait noh ha phi ïa U Syiem jong ki Jiw?”

¹⁰ Naba u la tip ba namar kaba bishni kita ki rangbah lyngdoh ki la ai noh ïa U.

¹¹ Hynrei, kita ki rangbah lyngdoh ki la pynkhih ïa uta u paidbah, ba un pyllait noh keiñ ïa u Barabbas ha ki.

¹² Ynda kumta, u Pilat u da ïathuh u la ong pat ha ki, “Namar kata, phi mon ba ngan leh aïu ïa uta uba phi khot ‘u Syiem ki Jiw’?”

¹³ Ki te ki la ïapyrta jam pat, “Sahnarphna ïa u.”

¹⁴ U Pilat te u la ïathuh ha ki, “Balei, u la leh ka bymman aïu?” Ki te ki la ïapyrta jam kham tam, “Sahnarphna ïa u.”

¹⁵ Kumta, u Pilat, ba u da mon ban pynsngewbha ïa uta u paidbah, u la pyllait noh ha ki ïa u Barabbas; te u la ai noh ïa U Jisu, ynda u la sympat ïa U, ban sahnarphna.

Ki shipai ki pyrthuhbeiñ ïa U Jisu

¹⁶ Ki shipai te ki la ïalam noh ïa u hapoh phyllaw, kaba long ka ïingbah u lyngskor, bad ki ïakhot lang baroh shi kynhun;

¹⁷ bad ki la pynkup ïa u da ka jaiñ saw bthuh, bad haba ki la ïathain ïa ka pansngiat shiah, ki la pynphong ha u,

¹⁸ bad ki la sdang ban nguh ïa u, “Khublei U Syiem ki Jiw!”

¹⁹ Ki la shoh ruh ïa ka khlieh jong u da u prew, bad ki la bynthiew ïa u, bad haba ki la dem la ki khohsiew, ki la mane ïa u.

²⁰ Ynda ki la lah pyrthuhbeiñ te ïa u, ki la loit noh ïa kata ka jaiñ saw bthuh na u, bad ki la pynkup ïa u la ki jong ki jaiñ, bad ki la ïalam noh ïa u ban sahnarphna ïa u.

Kaba sahnarphna ïa U Jisu

²¹ Ki la pynbor te ïa uwei u Simon u nong Kyrini, uba ïaid lait, haba u wan na ka ri bri (u kpa u Alexander bad u Ruphos), ban bah ïa ka diengphna jong U.

²² Ki la ïalam ruh ïa U ha ka jaka Golgotha, kaba long, haba la batai, “Ka jaka maloi khlieh”.

²³ Bad ki la ai ha U ka umsoh Waiñ kaba la ïakhleh bad ka mirr ban dih; hynrei, um shim satia.

²⁴ Te haba ki la sahnarphna ïa U, ki ïabynta ïa ki jaiñ jong U, ba ki da ïakhalai ïa ki, kaei ba uwei uwei un shim.

²⁵ Te ka la lai baje haba ki la sahnarphna ïa U.

²⁶ Bad la don ka jingthoh shalor shaphang ka pop jong U kaba la thoh haneng, “U Syiem ki Jiw.”

²⁷ Ki la sahnarphna ïa ar ngut ki dakaid ruh lem bad U, uwei sha kamon, uwei sha kadiang jong u.

²⁸ Kumta, la pyndep ïa kata Ka Jingthoh, kaba ong: “La ñiew ïa u lem bad ki nongpalat.”

²⁹ Kiba ïaid shata te ki la krenbeiñ ïa U, ki da kyrngah ki khlieh jong ki, ki da ong ruh, “A, me uba pynduh ïa ka templ, bad uba tei ïa ka, lai sngi!

³⁰ To pynim ïa lade, to hiar noh ruh na kato ka diengphna.”

³¹ Kumjuh ruh kita ki rangbah lyngdoh haba ki krenbeiñ, ki la ong paralok hi lem bad kita ki nongthoh, “U la pynim ïa kiwei, ïa lade pleng um lah ban pynim!

³² To U Khrist, uba U Syiem ki Israel, un hiar noh mynta na kato ka diengphna, ba ngin ïohi, bad ngin ïoh ngeit ruh!” Kita ruh ïa kiba la sahnarphna lem bad U, ki la krenbeiñ ïa U.

Ka jingïap U Jisu

³³ Te ynda la dap hynriew baje, ka la long dum ha kata ka ri baroh, haduh kaba khyndai baje.

³⁴ Te hamar kaba khyndai baje U Jisu u la pyrta da ka ktien bajam, u da ong, “Eloi Eloi lamma sabakhthani?” (kaba long, haba la batai, “U Blei jong nga, U Blei jong nga balei me la iehnoh ïa nga?”)

³⁵ Kiba na kita te kiba ïeng hajan, haba ki la ïohsngew, ki la ong, “Ha sngap, u khot ïa u Elias.”

³⁶ Uwei te haba u la mareh u la pyndap ïa ka spanj da ka bajew, bad u la spaiñ de ha u dieng, u la pyndih ïa U, u da ong, “To ieh phi, ngin ïakhmih la u wan u Elias ban pynhiar noh ïa u.”

³⁷ Haba U Jisu u la pynmih noh te ïa ka ktien bajam, u la ai noh ïa ka mynsiem.

³⁸ Te ka jingkah ka jong ka templ ka la kad ar liang, naduh jrong haduh tbian.

³⁹ U rangbah shispah te uba ïeng hajan ha pyrshah jong U, haba u ïohi ba kumta U ai noh la ka mynsiem, u la ong, “Shisha une u briew u la long U Khun U Blei.”

⁴⁰ La don ruh ki kynthei de kiba jngoh na sha jngai, hapdeng jong ki la don ka Mari ka nong Magdala, bad ka Mari ka kmie u Jakob uba rit bad u Ïosis, bad ka Salomi;

⁴¹ kine ruh, mynba u don ha Galilaïa, ki la ju bud ïa u, bad ki ju shakri ïa u; bad bun kiwei kiwei ruh ki kynthei kiba la kiew lem bad u sha Jerusalem.

Kaba tep ïa U Jisu

⁴² Mynta te haba la janmiet, namar ba ka long ka sngi Pynkhreh (kaba long ha shuwa ka Sabbaton),

⁴³ haba la wan u Joseph uba na Arimathaïa, u myntri uba donburom, uba u hi ruh u ju ap kyrmen ïa ka hima U Blei, da kaba shlur u la leit hapoh ha u Pilat, bad u la pan ïa ka met U Jisu.

⁴⁴ Te u Pilat u la sngewkyndit ba U la da ïap katta; te haba u la khot ha u ïa uta u rangbah shispah, u kylli ïa u, la U la lah ïap kham slem.

⁴⁵ Haba u la ïoh tip te na uta u rangbah shispah, u la ai sngewbha ïa ka met ha u Joseph.

⁴⁶ Te u la thied ïa ka jaiñ linen bani, bad haba u la pynhiar noh ïa U, u la sop spaiñ ïa U ha kata ka jaiñ linen, bad u la buh ïa U ha ka jingtep, ïa kaba la shna ha u mawsiang, bad u la pyntyllun ïa u maw ha ka jingkhang kata ka jingtep.

⁴⁷ Te ka Mari ka nong Magdala bad ka Mari ka kmie u Ïosis, ki la ïakhmih hangno ba la buh ïa U.