MARKOS 13 - KA BAIBL

U Jisu u ïathuhlypa ïa ka jingpynjot ïa ka templ

¹ Te katba U dang mih noh na ka templ, uwei na ki synran jong U, u ong ha U, “Ko Nonghikai, ha khmih, ki maw kat kine bad ki jingtei kat kine!”

² U Jisu u da ïathuh te U la ong ha u, “Me ïohi ïa kine ki jingtei bakhraw? yn ym iehnoh maw halor u maw, u ban ym pynhap noh.”

Kaba sdang jong ki jingjynjar

³ Te katba u dang shong ha u lum ki Olib ha marpyrshah ka templ, u Petros bad u Jakob bad u Ïoannis bad u Andriw, ki la kylli jar jar ïa u,

⁴ “To ïathuh ha ngi, lano kine kiei kiei ruh kin long? bad ka dak kaba kumno ha ban sa pyndep ïa kine kiei kiei baroh?”

⁵ Bad U Jisu u la sdang ban ong ha ki, “To sumar ïoh ba uno uno ruh un shukor ïa phi:

⁶ naba bun kin wan ha ka kyrteng jong nga, ki da ong, ‘Ma nga U Khrist’, bad kin shukor ïa shibun.

⁷ Hynrei, haba phin ïohsngew shaphang ki thma bad ïa ki jingbna ki thma, wat khuslai phi; naba ka dei ba kine kin long, hynrei, ka bakut kam pat long.

⁸ Naba ka kynja bynriew kan ïeng ïaleh bad ka kynja bynriew, ka hima ruh bad ka hima; bad ki jingkhynñiuh jumai kin long ha bun ki jaka, bad kin long ki 'nemsniew: kine ki jingsdang ki jingjynjar.

⁹ “Hynrei, to sumar ïa lade; naba kin ai noh ïa phi ha ki jingbishar, bad ha ki synagog yn sympat ïa phi, bad yn pynïeng ïa phi ha khmat ki lyngskor bad ki syiem na ka bynta ka kyrteng jong nga, ïa ka ban long ka jingphla ïa ki.

¹⁰ Te ka dei shuwa ba yn ïalap ïa ka gospel ha ki kynja bynriew baroh.

¹¹ Hynrei, ynda kin ïalam ïa phi bad kin ai noh ïa phi, wat sngewkhuslai lypa phi kaei ba phin kren, lymne wat puson lypa; hynrei, kaei kaei ruh ba yn ai ha phi ha kata ka por, ïa kata phin kren, naba phi phim long kiba kren, hynrei, U Mynsiem Bakhuid.

¹² U para te un ai noh ïa u para sha ka ban ïap, bad u kpa ruh ïa la u khun, bad ki khun kin ïeng ïaleh ïa ki kmie ki kpa, bad kin pynïap ïa ki.

¹³ Bad ki briew baroh kin shun ïa phi na ka bynta ka kyrteng jong nga; hynrei, jar u ban da ïaineh ha ban da kut, uta keiñ, u ban lait im.

Ka jingijli bapynduh

¹⁴ “Hynrei, ynda phin ïohi ïa kata ka jingijli bapynduh, kaba la kren da u Daniel u nongïathuhlypa, ba ka ïeng sha ka bymdei (Jar uba pule un da sngap,) ynda kumta, kita kiba ha Judia, to kin ïaphet ïap noh sha ki lum;

¹⁵ jar uba halor ïing ruh, wat ai un hiar hapoh ka ïing, lymne rung shapoh ban shim ei ei na ka ïing jong u;

¹⁶ bad jar uba don ha lyngkha, wat ai un wan kylla dien pat, ban shim ïa ka jaiñkup jong u.

¹⁷ Hynrei, kordit ïa kita kiba punkhun, bad ïa kita kiba ai buiñ ha kita ki sngi!

¹⁸ Hynrei, to duwai ba kata kan ym long myntlang,

¹⁹ naba kin long ki sngi ki jingjynjar, kat ki bym pat ju la long la myndanglong ka pyrthei ïa kaba U Blei u la thaw, haduh mynta, kat kita ruh kin ym long shuh.

²⁰ Te lymda u la pynduna U Trai ïa kita ki sngi, kan ym da lait im kawei ka doh; hynrei, na ka bynta kiba la jied ïa kiba u la jied, u la pynduna ïa kita ki sngi.

²¹ Ynda kumta, lada uno uno ruh un ong ha phi, ‘Ha khmih, hangne U Khrist’, lane, ‘Ha khmih, hangta’, phi wat ngeit;

²² naba ki Khrist lamler bad ki nongïathuhlypa lamler kin mih, bad kin pyni ki dak bad ki jingphylla ïa ka ban shukor noh, lada lah, wat ïa kiba la jied.

²³ Hynrei, to sumar phi! ha khmih, nga la ïathuhlypa ha phi ïa kiei kiei baroh.

Ka jingwan U Khun u Briew

²⁴ “Hynrei, ha kita ki sngi, hadien kata ka jingjynjar, ïa ka sngi yn pyndum, bad u bnai un ym ai la ka jingshai,

²⁵ bad ki khlur bneng kin hap noh, bad ïa ki bor kiba ha ki bneng yn pynkhynñiuh.

²⁶ Ynda kumta, kin ïohi ïa U Khun u briew ba u da wan ha ki lyoh, bad ka borbah bad ka burom ruh.

²⁷ Ynda kumta ruh, un phah ïa ki angel, bad un ïalum lang ïa kiba la jied jong u na ki saw lyer, naduh ka bakut ka pyrthei haduh ka bakut ka bneng.

Ka jinghikai na u dieng Dumbur

²⁸ “To nang te ïa ka pharshi jong u dieng Dumbur. Mynba u tnat jong u, u la dang khie lung bad ba u sei sla, phi tip ba ka lyiur ka la jan;

²⁹ kumjuh ruh ma phi, ynda phin ïohi ba jia kine kiei kiei ruh, phin tip ba u la jan, ha ka jingkhang keiñ.

³⁰ Shisha nga ong ha phi, ba kane ka pateng bynriew kan ym leit noh, tad ynda la leh ïa kine kiei kiei baroh.

³¹ Ka bneng bad ka khyndew te kin duh noh, hynrei, ki ktien jong nga kin ym duh noh satia.

Ym don ba tip ïa kata ka sngi lane ïa kata ka por

³² “Hynrei, shaphang kata ka sngi bad kata ka por ruh ym don ba tip, em, wat ki angel kiba ha bneng, lymne U Khun, hynrei, tang U Kpa.

³³ To sumar, to sharai, to duwai ruh; naba phim tip lano ka long kata ka sngi.

³⁴ Namar U Khun u briew, u long kum u briew uba leit jingleit sha kawei pat ka ri; uba la iehnoh ïa la ka ïing, bad uba la ai ha la ki shakri ka bor, ha uwei uwei ruh ka kam la ka jong ka jong, bad uba la hukum ruh ïa u nongap jingkhang ban sharai.

³⁵ Namar kata, to sharai, naba phim tip lano uta u trai ka ïing u wan, ha kaba la janmiet, ne shiteng synñia, ne haba riew syiar, ne mynstep;

³⁶ ïoh, haba u wan kyndit, un shem ïa phi ba dang thiah.

³⁷ Ïa kaba nga ong te ha phi, nga ong ha baroh: To sharai.”