MARKOS 12 - KA BAIBL

Ka pharshi shaphang ka brisoh

¹ Bad u la sdang ban kren ïa ki ha ki pharshi. “U briew u la thung ka brisoh, bad u la ker baroh sawdong, bad u la tih jaka tylliat soh Waiñ bad u la tei ïa ka ïing phira, bad u la ai wai ïa ka ha ki nongsumar bri, bad u la leit noh ruh sha kawei pat ka ri.

² Te ha ka aïom babiang, u la phah ïa u shakri ha kita ki nongsumar bri, ba un ïoh diang na kita ki nongsumar bri na ki soh jong kata ka brisoh,

³ hynrei, haba ki la kem ïa u, ki la sympat, bad ki la phah noh suda.

⁴ U la phah pat te sa uwei pat u shakri ha ki; ïa uta, ki la pynmong ïa ka khlieh jong u, bad ki la phah noh ïa u haba la pynjahburom.

⁵ U la phah sa ïa uwei ruh: ïa uta, ki la pynïap noh; bad ïa bun kiwei pat; ïa kiwei ki la sympat, bad ïa kiwei pat ki la pynïap noh.

⁶ Te u dang don sa uwei, u khun uba ieit eh jong u; u la phah ïa uta ruh uba khatduh ha ki, u da ong, ‘Kin burom ïa u khun jong nga.’

⁷ Hynrei, kita ki nongsumar bri ki la ïa-ong paralok hi, ‘Une u ban sa long u trai ka brisoh; ïa, ngin ïa-pynïap noh ïa u, te ka bynta kan long ka jong ngi’:

⁸ haba ki la kem te ïa u, ki la ïa-pynïap noh, bad ki la ïabred noh shabar kata ka brisoh.

⁹ Namar kata, uta u trai ka brisoh un sa leh aïu? Un wan keiñ bad un pynjot noh ïa kita ki nongsumar bri, bad un sa ai ïa ka brisoh ha kiwei.

¹⁰ Phim shym la pule te ïa kane Ka Jingthoh? “ ‘Uta u maw ïa uba ki nongtei ki la kyntait, ïa une la pynlong u khlieh ka dong:

¹¹ kane ka la long na U Trai, bad ka long kaba iphylla ha ki khmat jong ngi.’ ”

¹² Ki la ïawad dong te ban kem ïa U; hynrei, ki la sheptieng ïa u paidbah; naba ki la tip ba U la kren ïa kata ka pharshi pyrshah ïa ki. Kumta, haba ki la iehnoh ïa U, ki la leit noh.

Ka jingkylli shaphang kaba ai khajna

¹³ Ki la phah te ha u kiba na ki Pharisi bad kiba na ki nongbud u Herod, ba kin riam ïa u ha kaba kren.

¹⁴ Ki te haba ki la wan, ki ong ha u, “Ko Nonghikai, ngi tip ba me long uba shisha bad ba mem ñiew ïano ïano ruh; naba mem khmih ïa ka khmat ki briew, hynrei, me hikai ïa ka lynti U Blei ha kaba shisha. Hato ka bit ne em ban ai khajna ha u Kaisar? ngin ai, ne ngim ai?”

¹⁵ Hynrei, u, ba u ithuh ïa ka buit arsap jong ki, u la ong ha ki, “Balei phi tynjuh ïa nga? wallam ha nga ka shi suka, ba ngan ïohi ïa ka.”

¹⁶ Ki la wallam te ïa ka. U la ong te ha ki, “Ka jongno kane ka dur bad ka jingthoh shalor?” Ki te ki la ong ha u, “Ki jong u Kaisar.”

¹⁷ U Jisu u la ïathuh u la ong te ha ki, “To ai ha u Kaisar ïa kiei kiei ki jong u Kaisar, bad ha U Blei ïa kiei kiei ki jong U Blei.” Hangta ki la sngewkyndit shibun eh ïa u.

Ka jingkylli shaphang ka jingmihpat

¹⁸ Ynda kumta, ki Saddusi ki la wan ha u, kiba ong bymdon ka jingmihpat, bad ki la kylli ïa u, ki da ong,

¹⁹ “Ko Nonghikai, u Moses u la thoh ha ngi, ba lada un ïap noh u hynmen jongno jongno ruh, bad un iehnoh tnga, te ba um shym don khun, ba u para jong u un shim ïa ka tnga jong u, bad un pynmih symbai ïa la u hynmen.

²⁰ La don hynñiew ngut shipara; uba shuwa te u la ïoh tnga, bad haba u ïap um shym la iehnoh symbai:

²¹ uba shi sien bud ruh u la shim ïa ka, u ruh u la ïap noh, bad um shym la iehnoh symbai: kumjuh ruh u ba-ar sien bud:

²² kumta, kita ki hynñiew ngut ki la ïoh ïa ka bad kim shym la iehnoh symbai: ka bakhatduh eh na ki baroh, kata ka kynthei ruh ka la ïap noh.

²³ Namar kata, ha ka jingmihpat haba kin mihpat, kan long ka tnga jongno na ki? naba kita ki hynñiew ngut ki la ïoh kurim ïa ka.”

²⁴ U Jisu u da ïathuh u la ong te ha ki, “Ym dei namar kane ba phi bakla, ba phim tip ïa Ki Jingthoh, lymne ïa ka bor U Blei?

²⁵ Naba haba kin mihpat na ki baïap, kim ïashongkurim, lymne pynshongkurim ïa ki, hynrei, ki long kum ki angel ha bneng.

²⁶ Hynrei, shaphang ki nongïap, ba yn pynmih pat ïa ki, phim ju pule ha Ka Kitab u Moses, kumno ba U Blei u la kren ha u ha kata ka 'law lynnong, u da ong. ‘Nga uba U Blei u Abraham, bad U Blei u Isaak, bad U Blei u Jakob ruh’?

²⁷ Um long U Blei ki baïap, hynrei, U Blei ki ba-im: namar kata, phi bakla shikatdei eh.”

Ka hukum kaba kongsan tam

²⁸ Haba la wan te ha U, uwei na ki nongthoh uba la ïohsngew ba ki ïasaid paralok hi, uba da sngewthuh ruh ba U la ïathuh bha ïa ki, u la kylli ïa U, “Kano ka long ka hukum kaba kongsan na ki baroh?”

²⁹ U Jisu u la ïathuh te ha u, “Kaba kongsan na ki hukum baroh long; ‘Sngew, A Israel, U Trai uba U Blei jong ngi u long uwei U Trai:

³⁰ men ieit ruh ïa U Trai uba U Blei jong me da ka dohnud jong me baroh, bad da ka mynsiem jong me baroh, bad da ka jingmut jong me baroh, bad da ka bor jong me baroh: kane keiñ ka hukum ka bakongsan’:

³¹ ka ba-ar ruh ka long kane: ‘Men ieit ïa la u paramarjan kumba ïa lade.’ Ym don ka hukum kawei pat kaba kham khraw ïa kine.”

³² Uta u nongthoh u la ong te ha U, “Kaba dei, ko Nonghikai! me la ong kaba shisha, ba u long uwei, bad ym don uwei pat, hynrei, tang ma u:

³³ bad ban ieit ïa u da ka dohnud baroh, bad da ka jingmut baroh, bad da ka mynsiem baroh, bad da ka bor baroh, bad ban ieit ïa la u paramarjan kumba ïa lade, ka long kham kor ïa ki jingainguh thang bad ïa ki jingkñia baroh.”

³⁴ Ynda U Jisu u la ïohi te ba u la ïathuh stad, U la ong ha u, “Mem long jngai na ka hima U Blei.” Te naduh kata, ym don ba nud ban kylli ei ei ïa U.

Ka jingkylli shaphang U Messiah

³⁵ U Jisu u la ïathuh u la ong ruh, haba u dang hikai ha ka templ, “Kumno ba ki nongthoh ki ong ba U Khrist u long u khun u Dabid?

³⁶ naba u Dabid hi u kren da U Mynsiem Bakhuid: “ ‘U Trai u la ong ïa U Trai jong nga, To shong ma me ha ka kti kamon jong nga, tad ynda ngan pynlong ïa kiba shun ïa me, ka jingïuh hapoh ki kjat jong me.’

³⁷ “U Dabid hi u khot ‘U Trai’ ïa u; nangno te u long u khun jong u?” Te bun u paidbah u la sngew ïa u da kaba sngewbha.

U Jisu u pynrem ïa ki Nongthoh

³⁸ U la ong te ha ki ha ka jinghikai jong u: “To kiar na kita ki nongthoh, kiba kwah ban ïaid kai ha ki jaiñkup bajynsur, bad ïa ki jingnguh ha ki ïew,

³⁹ bad ïa ki jingshong bakor tam ha ki synagog, bad ïa ki jaka kiba kham donburom ha ki jingkhawai;

⁴⁰ kiba bam duh ïa ki ïing ki riewkynthei, bad kiba duwai jlan ruh khnang ban tyllep; kine kin ïoh diang ka jingpynrem kaba kham khraw.”

Ka riewkynthei kaba noh ar damli

⁴¹ Te U Jisu haba u la shong ha marpyrshah ka jingkynshew, u la khmih kumno ba u paidbah u noh sbai sha kata ka jingkynshew: bad bun ki bariewspah ki la noh shikatdei.

⁴² Haba la wan te kawei ka riewkynthei ka baduk, ka la noh ar damli, kiba long la jan shi peisa.

⁴³ Haba u la khot ha u ïa ki synran jong u, u la ong ha ki, “Shisha nga ong ha phi, ba kane ka riewkynthei ka baduk ka la noh kham bun ïa kita baroh kiba la noh sha kata ka jingkynshew;

⁴⁴ naba kita baroh, ki la noh na kaba sah tam ïa ki, hynrei, kane, na ka jingkyrduh jong ka, ka la noh baroh katba ka don, wat ïa ka jingim jong ka phar.”