MARKOS 10 - KA BAIBL

U Jisu u hikai shaphang kaba pyllait tnga

¹ Haba u la mih nangta, u la wan ha ki phang Judia, sha shiliang ka Jordan: bad ki paidbah ki la ïalum lang pat ha u; te kumba u la ju leh, u la hikai pat ïa ki.

² Te don na ki Pharisi kiba la wan ha u, bad ki la kylli ïa u, “Ka bit ne em ïa u briew ban pyllait noh ïa la ka tnga?” ba ki ïatynjuh ïa u.

³ U da ïathuh u la ong te ha ki, “Kaei ba u Moses u la hukum ïa phi?”

⁴ Ki te ki la ong, “U Moses u la shah ban thoh ïa ka kot iehnoh, bad ban ïapyllait noh.”

⁵ Hynrei, U Jisu u la ong ha ki, “Namar ka dohnud runar jong phi u la thoh ïa phi ïa kane ka hukum:

⁶ hynrei, la myndanglong ka pyrthei, ‘Shynrang bad kynthei U Blei u la thaw ïa ki:

⁷ na ka bynta kane, u briew un iehnoh ïa la u kpa bad ïa la ka kmie, bad un ïaineh bad la ka tnga;

⁸ ki baroh ar ngut te kin ïalong kawei ka doh. Kumta, kim long ar ngut shuh, hynrei, kawei ka doh.’

⁹ Namar kata, ïa kaba U Blei u la pynïasoh lem, to u briew wat pynïakhlad.”

¹⁰ Ynda ha ïing, ki synran jong u ki la kylli pat ïa u shaphang kata kajuh.

¹¹ U ong te ha ki, “Uno uno ruh u ban iehnoh ïa la ka tnga, bad u ban shongkurim ïa kawei pat, u klim ïa ka:

¹² lada kata ruh kan iehnoh ïa la u tnga, bad kan shongkurim ïa uwei pat, ka klim.”

U Jisu u kyrkhu ïa ki khynnah

¹³ Ynda kumta, ki la wallam ïa ki khunlung ha u, ba un ïoh ktah ïa ki, ki synran te ki la sneng ïa kita kiba ïawallam.

¹⁴ Hynrei, haba U Jisu u la ïohi ïa kata, u la sngewsih eh, bad u la ong ha ki, “To shah ïa ki khunlung ban wan ha nga, to wat khang ruh ïa ki: naba ïa kiba kum kita, long ka hima U Blei.

¹⁵ Shisha nga ong ha phi, uno uno ruh u ban ym pdiang ïa ka hima U Blei kum u khun khynnah, un ym leit bsut hapoh kata.”

¹⁶ Te haba u la shim kynthup ïa ki, u la buh ïa la ki kti ha ki, u da kyrkhu ïa ki.

U samla u bariewspah

¹⁷ Haba U dang leit te nangta sha lynti bah, uwei u la phet ha U bad u la dem khohsiew ha U, bad u la kylli ïa U, “Ko Nonghikai babha, kaei ngan leh ba ngan ïoh ka jingim bymjukut?”

¹⁸ U Jisu u la ong te ha u, “Balei ba me khot babha ïa nga? Ym don u babha, hynrei, tang uwei, uba U Blei.

¹⁹ Me tip ïa ki hukum: ‘Wat klim, wat pynïap, wat tuh, wat sakhi lamler, wat leh klop, burom ïa la u kpa bad ïa la ka kmie ruh.’ ”

²⁰ Te u la ïathuh ha U, “Ko Nonghikai, ïa kita baroh nga la sumar la myndang khynnah.”

²¹ U Jisu te haba U la khmih ha u, U la sngewieit ïa u, bad U la ong ha u, “Kawei ka dang duna ïa me: to khie leit, die noh katba me don, ai ruh ha ki baduk, te men ïoh ka jingkynshew ha bneng: te ale, da rah ïa ka diengphna, to bud ruh ïa nga.”

²² Te u la buhkhoh namar kata ka ktien, bad u la leit noh sngewsih, naba u la don shibun ki spah.

²³ Haba U Jisu te u la khmih baroh sawdong, u la ong ha ki synran jong u, “A, kaba da eh ïa kiba don spah, ba kin leit bsut ha ka hima U Blei!”

²⁴ Ki synran te ki la kyndit thred namar kita ki ktien jong u. Hynrei, U Jisu u da ïathuh pat, u ong ha ki, “Ko khun, ew! kaba da eh ïa kita kiba shaniah ha ki spah, ban leit bsut ha ka hima U Blei!

²⁵ Ka long kaba kham jem ïa ka ut ban bsut lyngba ïa ka thliew thyrnia, ban ïa u bariewspah ban leit bsut ha ka hima U Blei.”

²⁶ Ki te ki la nang sngewkyndit shikatdei eh, ki da ïa-ong ha u, “Te kumta uei ba lah ban lait im?”

²⁷ Haba U Jisu u la khmih shaiñ te ha ki, u la ong, “Ha ki briew, kata ka bym lah; hynrei, ym ha U Blei: naba kiei kiei baroh ki long kiba lah ha U Blei.”

²⁸ Ynda kumta, u Petros u la sdang ban ong ha U, “Ha khmih, ngi la iehnoh ïa kiei kiei baroh, ngi la bud ruh ïa me.”

²⁹ Hynrei, U Jisu u da ïathuh u la ong, “Shisha nga ong ha phi, ym don uba la iehnoh ïa ka ïing, lane ïa ki hynmen hynbew shynrang ne kynthei, lane ïa u kpa lane ïa ka kmie, lane ïa ka tnga lane ïa ki khun, lane ïa ki bri, na ka bynta jong nga bad jong ka gospel,

³⁰ hynrei, un ïoh diang keiñ shispah shah ïa katta mynta ha kane ka por, ïa ki ïing, bad ïa ki hynmen hynbew shynrang bad kynthei, bad ïa ki kmie, bad ïa ki khun, bad ïa ki bri de, lem bad ki jinglehbeiñ; bad ha ka pyrthei ka ban sa wan, ka jingim bymjukut.

³¹ Hynrei, shibun ki bashuwa kin long khatduh, bad ki bakhatduh kin long shuwa.”

U Jisu u ïathuh ka balai sien shaphang la ka jingïap bad ka jingmihpat

³² Ki ïadon te ha lynti ba ki da ïaleit kiew sha Jerusalem, bad U Jisu u la ïaid ha shuwa jong ki: bad ki la kyndit eh, bad kita kiba bud ki la sheptieng. Haba u da shim pat ruh ïa ki khat-ar ngut, u la sdang ban ïathuh ha ki, ïa kiei kiei ki ban sa jia ha u.

³³ “Naba, ha khmih, ngi ïaleit kiew sha Jerusalem, te ïa U Khun u briew yn sa ai noh ha ki rangbah lyngdoh bad ha ki nongthoh; bad kin pynrem ïa u ïa ka ban ïap, bad kin ai noh ruh ïa u ha ki Jentil:

³⁴ ki te kin lehbeiñ ïa u, bad kin bynthiew ïa u, bad kin sympat ïa u, bad kin pynïap noh ïa u; hynrei, ha ka balai sngi un mihpat.”

Ka jingpan u Jakob bad u Ïoannis

³⁵ U Jakob bad u Ïoannis, ki khun u Sebedi, ki la wan te ha u, ki da ong, “Ko Nonghikai, ngi kwah ba men leh ïa ngi ïa kaei kaei ba ngin sa pan na me.”

³⁶ U la ong te ha ki, “Kaei ba phi kwah ïa nga ban leh ïa phi?”

³⁷ Ki la ong te ha u, “To ai ïa ngi ba ngin shong, uwei sha kamon jong me bad uwei pat sha kadiang jong me, ha ka burom jong me.”

³⁸ Hynrei, U Jisu u la ong ha ki, “Phim tip kaei ba phi pan. Phi lah ban dih na kata ka khuri na kaba ngan sa dih, bad ba yn pynbaptis ïa phi ruh da kata ka jingbaptis da kaba yn sa pynbaptis ïa nga?”

³⁹ Te ki la ong ha u, “Ngi lah.” Hynrei, U Jisu u la ong ha ki, “Ïa kata ka khuri, na kaba ngan sa dih, phin dih shisha, bad da kata ka jingbaptis da kaba yn sa pynbaptis ïa nga, yn pynbaptis ïa phi ruh;

⁴⁰ hynrei, ban shong sha kamon jong nga bad sha kadiang jong nga, kam long ka jong nga ban ai, hynrei, ka long ïa kita ïa kiba la pynkhreh ïa ka.”

⁴¹ Te haba kita ki shiphew ngut ki la ïohsngew, ki la sdang ban ïasngewsih ïa u Jakob bad ïa u Ïoannis.

⁴² Te U Jisu haba u la khot ïa ki ha u, u ong ha ki, “Phi tip ba kita kiba ki ïañiew ban synshar ïa ki Jentil, ki leh trai khlieh ïa ki; bad ki bakhraw batri na ki, ki leh bor ïa ki:

⁴³ hynrei, kan ym long kumta hapdeng jong phi; hynrei, uno uno ruh u ban kwah ban long bakhraw hapdeng jong phi, un long u shakri jong phi,

⁴⁴ bad uno uno ruh na phi u ban kwah ban long rangbah, un long u mraw jong phi baroh;

⁴⁵ naba shisha U Khun u briew um shym la wan ban ïoh shakri, hynrei, ban shakri, bad ban ai la ka jingim ban long ka jingsiewspah na ka bynta kiba bun.”

U Jisu u pynpeit ïa ki khmat u Bartimaïos u bamatlah

⁴⁶ Te ki la wan poi ha Jerikho; haba u dang leit noh ruh na Jerikho bad ki synran jong u bad u paidbah babun de, u Bartimaïos u bamatlah, u khun u Timaïos, u la shong harud lynti, ba u da makia.

⁴⁷ Haba u la ïohsngew te ba dei U Jisu uba na Nasaret, u la sdang ban kyrpad jam, ban ong ruh, “Ko Jisu me U Khun u Dabid, to isynei ïa nga!”

⁴⁸ Bun te ki la sneng ïa u, ba un sngap jar, hynrei, u la kyrpad jam kham tam, “Me U Khun u Dabid, to isynei ïa nga!”

⁴⁹ U Jisu haba U la ïeng te, U la ong, “To khot ïa u.” Bad ki khot ïa uta u bamatlah, ki da ong ha u, “To kyrmen, to ïeng ruh, U khot ïa me.”

⁵⁰ U ruh u da buh noh bak ïa la ka jaiñkup, haba u la ïeng joit, u la wan ha U Jisu.

⁵¹ U Jisu u da ïathuh te U la ong ha u, “Me kwah ba ngan leh aïu ïa me?” Uta u bamatlah u la ong te ha U, “Ko Nonghikai, ba ngan ïoh imat.”

⁵² U Jisu u la ong te ha u, “To khie leit noh, kata ka jingngeit jong me ka la pynkhiah ïa me;” te kumne kumne ruh, u la ïoh imat, bad u la bud ïa U ha kata ka lynti.