LEBITIKOS 8 - KA BAIBL

Ka jingpynkyntang ïa u Aaron bad ïa ki khun shynrang jong u

¹ Bad U Trai u la kren ha u Moses, u da ong,

² “To shim ïa u Aaron bad ki khun shynrang jong u lem bad u, bad ïa ki jaiñkup, bad ïa ka umphniang ka jingpynsleh, bad ïa uwei u masi lyngraw ban long ka jingkñia namar ka pop, bad ïa ki ar tylli ki 'lang shynrang, bad shi shang u kpu bakhlem thiat;

³ bad men khot ïaseng ïa u paidlang baroh ha ka jingkhang Ka Tabernakl ka jingïaseng.”

⁴ Bad u Moses u la leh kumba U Trai u la hukum ïa u; bad u paidlang u la ïaseng lang ha ka jingkhang Ka Tabernakl ka jingïaseng.

⁵ Bad u Moses u la ong ha uta u paidlang, “Kane ka long kata ïa kaba U Trai u la hukum ban leh ïa ka.”

⁶ Bad u Moses u la pynwan ïa u Aaron bad ïa ki khun shynrang jong u, bad u la pynsum ïa ki da ka um.

⁷ Ynda kumta, u la pynphong ïa ka sopti ha u, bad u la pynpanpoh ïa u da ka jingpanpoh, bad u la pynphong ïa ka barandi ha u, bad u la buh ïa ka ephod ha u, bad u la pynpanpoh da ka jingpanpoh ba-iphylla kata ka ephod, ïa kaba u la teh ha u da ka.

⁸ Bad u la pyndeng ha u ïa ka jingdeng shadem: bad u la buh ruh ïa ki Urim bad ki Thummim hapoh kata ka jingda shadem.

⁹ Bad u la pynphong ïa ka meitr ha ka khlieh jong u; bad halor kata ka meitr, ha ka shyllangmat jong u, u la pyndeng da ka sla ksiar, kaba long ka pansngiat ka bakyntang keiñ; kumba u la hukum U Trai ïa u Moses.

¹⁰ Ynda kumta, u Moses u la shim ïa ka umphniang ka jingpynsleh, bad u la pynsleh ïa Ka Tabernakl bad ïa kiei kiei baroh kiba don ha ka, bad u la pynkyntang ïa ki ruh de.

¹¹ U la synreit ruh na ka, hynñiew sien halor ka duwan, bad u la pynsleh ïa kata ka duwan bad ïa kiei kiei ki jingbuh jong ka baroh, bad ïa ka dabor ruh lem bad ka kjat jong ka, ïa ka ban pynkyntang ïa ki.

¹² Te u la theh ïa ka umphniang ka jingpynsleh halor ka khlieh u Aaron, bad u la pynsleh ïa u, ïa ka ban pynkyntang ïa u.

¹³ Bad u Moses u la pynwan ha khmat ïa ki khun shynrang u Aaron, bad u la pynphong ha ki, ïa ki sopti, bad u la pynpanpoh ïa ki da ki jingpanpoh, bad u la pynphong ïa ki tupia ha ki khlieh jong ki; kumba U Trai u la hukum ïa u Moses.

¹⁴ Hadien kata, u la pynwan ha khmat ïa u masi lyngraw jong ka jingkñia namar ka pop: bad u Aaron bad ki khun shynrang jong u, ki la ïabuh ïa la ki kti halor ka khlieh uta u masi lyngraw ka jingkñia namar ka pop.

¹⁵ Te u Moses, hadien ba u la pynïap ïa u, u la shim ïa ka snam bad u la thoh ïa ka, ha ki reng jong kata ka duwan baroh sawdong da la ka shynriah'ti, bad u la pynkyntang ïa ka duwan ruh de, ynda kumta, u la theh ïa ka snam ha trai kata ka duwan, bad u la pynkyntang ïa ka, ïa ka ban pynlong ka jingpynïasuk halor jong ka.

¹⁶ U la shim ruh ïa ka khleiñ baroh kaba dei ha ki snier, bad ïa ka sbiar kaba halor u dohnud, bad ïa ki khyllai baroh ar, lem bad ka khleiñ jong ki, bad u Moses u la thang ïa ki halor ka duwan.

¹⁷ Bad ïa uta u masi lyngraw, bad ïa ka snieh jong u, bad ïa ka doh jong u, bad ïa ka eit jong u de, u la thang ha ding shabar ka jaka shong dara; kumba u la hukum U Trai ïa u Moses.

¹⁸ Bad u la wallam ïa u langbrot ka jingkñia ainguh thang: bad u Aaron bad ki khun shynrang jong u, ki la ïabuh ïa la ki kti halor ka khlieh uta u langbrot.

¹⁹ Bad u la pynïap ïa u: bad u Moses u la synreit ïa ka snam halor ka duwan baroh sawdong.

²⁰ Bad u la ot dkhot ïa u langbrot; bad u Moses u la thang ïa ka khlieh, ïa ki dkhot, bad ïa ka khleiñ.

²¹ Hynrei, ïa ki snier bad ki kjat u la sait ha um; bad u Moses u la thang ïa u langbrot baroh phar halor ka duwan: ka long ka jingkñia bathang ïa ka ban long ka jingiw baiwbih: ka jingkñia da ka ding keiñ ha U Trai; kumba u la hukum U Trai ïa u Moses.

²² Bad u la wallam ïa uta uwei u langbrot, u langbrot ka jingpynkyntang: bad u Aaron bad ki khun shynrang jong u, ki la ïabuh ïa la ki kti halor ka khlieh jong uta u langbrot.

²³ Bad u la pynïap ïa u; bad u Moses u la pyndei na kata ka snam ha ka khmuiñ ka shkor kamon ka jong u Aaron, bad ha ka 'ti kmie ka kti kamon jong u, bad ha ka 'jat kmie kamon jong u de.

²⁴ Bad u la pynwan ha khmat ïa ki khun shynrang u Aaron, bad u Moses u la pyndei na kata ka snam ha ka khmuiñ ka shkor kamon jong ki, bad ha ki 'ti kmie kamon jong ki, bad ha ki 'jat kmie kamon jong ki de: bad u Moses u la synreit ïa ka snam halor ka duwan baroh sawdong.

²⁵ Bad u la shim ruh ïa ka khleiñ, bad ïa ka dongnai, bad ïa ka khleiñ baroh basop ïa ki snier, bad ïa ka sbiar halor u dohnud, bad ïa ki khyllai baroh ar, lem bad ka khleiñ jong ki, bad ïa ka kti kamon ruh de:

²⁶ u la shim ruh na kata ka shang u kpu bakhlem thiat uba ha khmat U Trai, ïa uwei u kpu khlem thiat, bad ïa uwei u kpu ba la suit da ka umphniang, bad ïa iwei i 'pu stang, bad u la buh ïa ki halor ka khleiñ, bad halor ka kti kamon ruh de;

²⁷ ynda kumta, u la buh ïa ki baroh ha ki slakti u Aaron, bad ha ki slakti ki khun shynrang jong u, bad u la pynkaweh ïa ki kum ka jingainguh kaweh ha khmat U Trai.

²⁸ Te u Moses u la shim noh ïa ki na ki slakti jong ki, bad u la thang ïa ki halor ka duwan halor ka jingkñia bathang: kine ki long kita ki jingpynkyntang ki jong ka jingiw baiwbih: ka long ka jingkñia ainguh da ka ding keiñ ha U Trai.

²⁹ U Moses u la shim ïa ka shadem ruh, bad u la pynkaweh ïa ka ban long ka jingainguh kaweh ha khmat U Trai: ka la long ka bynta ka jong u Moses na uta u langbrot ka jingpynkyntang; kumba u la hukum U Trai ïa u Moses.

³⁰ U Moses u la shim ruh na kata ka umphniang ka jingpynsleh, bad na ka snam kaba halor ka duwan, bad u la synreit ïa ka halor u Aaron, bad halor ki jaiñkup jong u, bad halor ki khun shynrang jong u, bad halor ki jaiñkup ki khun shynrang jong u lem bad u; bad u la pynkyntang ïa u Aaron, bad ïa ki jaiñkup jaiñsem jong u, bad ïa ki khun shynrang jong u ruh, bad ïa ki jaiñkup jaiñsem jong ki khun shynrang jong u lem bad u.

³¹ Ynda kumta, u Moses u la ong ha u Aaron bad ha ki khun shynrang jong u de, “To shet ïa kata ka doh hajan ka jingkhang Ka Tabernakl ka jingïaseng: bad hangta ruh phin bam ïa ka bad ïa uta u kpu ruh uba ha kata ka shang ki jingpynkyntang, kumba nga la hukum, da kaba ong, ‘U Aaron bad ki khun shynrang jong u kin bam ïa kane.’

³² Hynrei, ïa kata kaba sah tam na ka doh bad na u kpu phin thang ha ding.

³³ Bad phin ym mih noh na ka jingkhang Ka Tabernakl ka jingïaseng, hynñiew sngi, haduh ka sngi ka jingpyndep ïa ka jingpynkyntang jong phi: naba hynñiew sngi un pynkyntang ïa phi.

³⁴ Kumba la leh ha kane ka sngi, kumta U Trai u la hukum ban leh, ïa ka ban pynlong ïa ka jingpynïasuk na ka bynta jong phi.

³⁵ Namar kata, to sah hajan ka jingkhang Ka Tabernakl ka jingïaseng hynñiew sngi, synñia bad sngi, bad to sumar biang ïa kaba U Trai u la hukum ïa phi, ba ïoh phin ïap: naba kumne la hukum ïa nga.”

³⁶ Kumta, u Aaron bad ki khun shynrang jong u, ki la leh ïa kiei kiei baroh ba la hukum U Trai da ka kti u Moses.