LEBITIKOS 5 - KA BAIBL

¹ “ ‘Lada u briew u da leh pop, da kaba u ïohsngew ïa ka ktien ka jingsmai, haba u da long hi u sakhi, lada kaba u ïohi lane da kaba u ïoh tip, khlem da ïathuh, haba kumta, un kit hi ïa la ka pop.

² Lada u briew u ktah ïa kaei kaei ruh ka ba-tngit, la ka long ka metïap ka mrad khlaw ka bymkhuid, lane ka metïap ka kynja jingri ka bymkhuid, lane ka metïap jong ka kynja bapar ka bymkhuid, la um da tip ruh ïa kata, u ruh un long uba la tngit, bad uba la rem.

³ Lane haba u da ktah ïa kaei kaei ruh ka bymkhuid jong u briew, da kaba kumno kumno ruh ba u la long bymkhuid, la u khlem tip ïa kata; ynda u la ïoh tip, te u la rem hi:

⁴ Lane lada u briew u da smai da kaba kren da la ki rmiang shyntur, ba un leh ïa ka basniew, lane ïa ka babha, kaei kaei ruh ïa kaba u briew u kren da ka jingsmai, haba um da tip; te ynda u ïoh tip ïa kata, te u la rem hi, ha kawei na kine.

⁵ Bad haba u la rem ha kawei na kita, ynda kumta, ka dei ba un phla ba u la leh pop ha kata,

⁶ bad un wan ai ha U Trai ïa la ka jingkñia namar ka jingpalat na ka bynta la ka pop ba u la leh, da i khun langbrot kynthei lane i khun blang kynthei na ka kynhun, ïa ka ban long ka jingkñia namar ka pop; bad u lyngdoh un pynlong ka jingpynïasuk na ka bynta jong u namar kata ka pop jong u.

⁷ “ ‘Te lada ka kti jong u kam lah kot haduh i khun langbrot, ka dei ba un wan ai ha U Trai namar ka jingpalat jong u ba u la leh, da ar tylli ki lyngdkhur, lane ar tylli ki sohlyngngem; kawei ïa ka ban long ka jingkñia namar ka pop, bad kawei pat ïa ka ban long ka jingkñia ainguh thang.

⁸ Bad un wallam ïa ki ha u lyngdoh, u ban kñia shuwa ïa kata kaba long namar ka pop, bad da khyrwait noh ïa la ka khlieh na ka ryndang, hynrei, khlem da pyndkut ïa ka,

⁹ bad ka dei ïa u ban synreit na ka snam jong kata ka jingkñia namar ka pop ha krung ka duwan; bad ïa kaba dang sah na kata ka snam yn sa khem noh ha trai ka duwan: ka long ka jingkñia namar ka pop keiñ.

¹⁰ Bad ïa ita iwei pat un kñia kum ka jingkñia ainguh thang, kat kumba shong ka rukom: bad uta u lyngdoh un pynlong ka jingpynïasuk na ka bynta jong u, namar kata ka pop jong u ïa kaba u la leh, ynda kumta, yn map noh ïa u.

¹¹ “ ‘Hynrei, lada ka kti jong u kam lah kot haduh ar tylli ki sohlyngngem, lane ar tylli ki khun lyngdkhur, ynda kumta, ka dei ïa uta uba la leh pop ban wallam ïa la ka jingkñia da kumba ar ser shiteng u 'purew bani, ïa ka ban long ka jingkñia namar ka pop; un ym theh umphniang ha ka, lymne buh ka jingiwbih halor jong ka: naba ka long ka jingkñia namar ka pop.

¹² Ynda kumta, un wallam ïa ka ha uta u lyngdoh, bad uta u lyngdoh un shim na ka kat shi kham jong u ïa ka ban long ka jingpynkynmaw, hadien kata, un thang noh ïa ka halor ka duwan, kum ka jingkñia da ka ding ïa U Trai: ka long ka jingkñia namar ka pop.

¹³ Bad uta u lyngdoh un pynlong ka jingpynïasuk na ka bynta jong u, namar kata ka pop jong u ba u la leh ha kawei na kine, ynda kumta, yn map noh ïa u: te kaba sah noh kan long ka jong u lyngdoh, kum ka jingkñia ainguh bam.’ ”

Ka jingkhia namar ka jingleh palat

¹⁴ Bad U Trai u la kren ha u Moses, u da ong,

¹⁵ “Lada uno uno ruh u leh palat, bad u da leh pop da kaba khlem pyrkhat, shaphang kita kiei kiei ruh ba la pynkyntang ha U Trai; te ka dei ba un wallam ha U Trai namar la ka jingpalat, da u langbrot bajanai bha na ki kynhun, lem bad ka jingkheiñ dor jong me ha ki shekel rupa, kumba ka shong ka shekel ka jaka kyntang, ïa ka ban long ka jingkñia namar ka jingpalat.

¹⁶ Bad un pynburia noh ïa kaba u la leh palat shaphang kata kaba la kyntang, bad nalor kata ruh un ai lang ïa kaba san bynta, bad un ai ïa kata ha u lyngdoh: bad uta u lyngdoh un pynlong ka jingpynïasuk na ka bynta jong u, da uta u langbrot ka jingkñia namar ka jingpalat, ynda kumta, yn map noh ïa u.

¹⁷ “Bad lada uno uno ruh u da leh pop da kaba leh kaei kaei ruh ba la adong ha ki hukum U Trai; la um da tip ïa kata, u la rem pynban, bad un kit hi ïa la ka jingpalat.

¹⁸ Bad ka dei ïa u ban wallam ha u lyngdoh da u langbrot bajanai bha na ki kynhun, lem bad ka jingkheiñ dor jong me, ban long ka jingkñia namar ka jingpalat: bad uta u lyngdoh un pynlong ka jingpynïasuk na ka bynta jong u, namar kata ka jingleh khlem pyrkhat jong u ha kaba u la leh let, bad um tip; ynda kumta, yn map noh ïa u.

¹⁹ Ka long ka jingkñia namar ka jingpalat: shisha keiñ u la leh palat pyrshah ïa U Trai.”