LEBITIKOS 4 - KA BAIBL

Ka jingkñia namar ka pop

¹ U Trai u la kren ruh ha u Moses, u da ong,

² “To kren ha ki khun Israel, da ong, ‘Haba u briew u leh pop pyrshah ïa kano kano na ki hukum U Trai da ka jingbymtip, bad u leh pyrshah ïa kano kano na ki, ïa kita kiei kiei ki bymdei ban leh,

³ lada uta u lyngdoh ba la pynsleh un leh pop kat ban pynlong pop ïa u paidbah; te un kñia na ka bynta kata ka pop jong u ba u la leh, da u masi lyngraw bajanai bha, ïa ka ban long ka jingkñia namar ka pop ha U Trai.

⁴ Bad un wallam ïa uta u masi lyngraw sha ka jingkhang Ka Tabernakl ka jingïaseng ha khmat U Trai; bad un buh ïa la ka kti halor ka khlieh jong uta u masi lyngraw, bad un pynïap ïa uta u masi lyngraw ha khmat U Trai.

⁵ Bad uta u lyngdoh ba la pynsleh, un shim na ka snam jong uta u masi lyngraw, bad un wallam ïa ka ha Ka Tabernakl ka jingïaseng;

⁶ bad u lyngdoh un wieh ïa la ka shynriah'ti ha kata ka snam, bad un synreit na kata ka snam ha khmat U Trai hynñiew sien, ha khmat ka jingkah jong ka jaka kyntang.

⁷ Bad uta u lyngdoh un buh khyndiat na kata ka snam ha khmat U Trai halor ki reng ka duwan ka jingiwbih thang baiwbih, kaba ha Ka Tabernakl ka jingïaseng; bad un theh noh ïa ka snam baroh jong uta u masi lyngraw ha trai ka duwan jong ka jingkñia ainguh thang, kaba don ha ka jingkhang jong Ka Tabernakl ka jingïaseng.

⁸ Bad un shim noh ïa ka khleiñ baroh na uta u masi lyngraw ka jingkñia namar ka pop; ïa ka 'leiñ ïarong, bad ïa ka khleiñ baroh kaba don halor ki snier,

⁹ bad ïa ki khyllai baroh ar, bad ïa ka khleiñ kaba don halor jong ki, haduh ki krung, bad ïa ka kyrdan snam kaba halor u dohnud, lem bad ki khyllai, un shim noh,

¹⁰ kumjuh kumba u la shim noh na uta u masi lyngraw ka jingkñia bapynïasuk: bad un thang noh u lyngdoh ïa ki halor ka duwan ka jingkñia ainguh thang.

¹¹ Hynrei, ïa ka snieh jong uta u masi lyngraw, bad ïa ka doh jong u baroh, bad ïa ka khlieh jong u, bad ïa ki kjat jong u, bad ïa ki snier jong u, bad ïa ka eit jong u,

¹² ïa uta u masi lyngraw baroh keiñ, un lam noh shabar ka jaka shong dara sha ka jaka bakhuid, ha kaba la ju theh ïa ka dpei, bad un thang ïa u halor ki dieng ha ka ding: hajan kata ka jaka ba ju theh ïa ka dpei, yn thang ïa u.

¹³ “ ‘Bad lada u paidbah Israel baroh un leh pop da ka jingbymtip, bad haba kata ka da sah ba la buhrieh na ki khmat ka jingïaseng u paidbah, bad ba ki la leh ei ei na kita kiei kiei kiba U Trai u la hukum ban ym leh, bad haba ki da rem;

¹⁴ haba la tip ïa kata ka pop, ha kaba ki la leh pop, ynda kumta, uta u paidbah un kñia ainguh da u masi lyngraw na ka bynta kata ka pop, bad kin ïawallam ïa u ha khmat Ka Tabernakl ka jingïaseng.

¹⁵ Bad ki tymmen ki san jong uta u paidbah, kin buh ïa la ki kti halor ka khlieh jong uta u masi lyngraw ha khmat U Trai: bad kin pynïap ïa uta u masi lyngraw ha khmat U Trai.

¹⁶ Bad uta u lyngdoh ba la pynsleh, un wallam na ka snam uta u masi lyngraw sha Ka Tabernakl ka jingïaseng.

¹⁷ Ynda kumta, uta u lyngdoh un wieh ïa la ka shynriah'ti ha kata ka snam, bad un synreit ïa ka, hynñiew sien ha khmat U Trai, kata, ha khmat ka jingkah.

¹⁸ Bad un thoh na kata ka snam halor ki reng jong ka duwan kaba ha khmat U Trai, kaba ha Ka Tabernakl ka jingïaseng, ynda kumta, un theh noh ïa ka snam baroh kaba dang sah ha trai ka duwan ka jingkñia ainguh thang, kaba hajan ka jingkhang Ka Tabernakl ka jingïaseng.

¹⁹ Bad un weng noh ïa ka khleiñ jong u baroh, bad un thang ïa ka halor kata ka duwan.

²⁰ Bad un leh ïa une u masi lyngraw, kumba u la leh ïa u masi lyngraw jong ka jingkñia namar ka pop, kumta hi keiñ un leh ïa u; bad u lyngdoh un pynlong ka jingpynïasuk na ka bynta jong ki, ynda kumta, yn map ïa ki.

²¹ Hadien kata, un leit lam ïa uta u masi lyngraw shabar ka jaka shong dara, bad un thang ïa u kumba u la thang ïa uta u masi lyngraw bamynshuwa; kane keiñ, ka long ka jingkñia namar ka pop jong uta u paidbah.

²² “ ‘Lada u kynja ba long san u da leh pop, da kaba leh khlem tip ïa kano kano na kita kiba U Trai U Blei jong u, U la hukum ban ym leh, bad haba u da rem;

²³ lada u la ïoh tip ïa la ka jingleh ïa kaba u la leh, un wan ai la ka jingkñia, da u 'lang shynrang uba janai bha;

²⁴ bad un buh ïa la ka kti halor ka khlieh uta u blang, bad un pynïap ïa u ha kata ka jaka ha kaba ki ju pynïap ïa ka jingkñia ainguh thang ha khmat U Trai: kane ka long ka jingkñia namar ka pop.

²⁵ Ynda kumta, uta u lyngdoh un shim na ka snam jong ka jingkñia namar ka pop da la ka shynriah'ti, bad un thoh halor ki reng jong ka duwan ka jingkñia ainguh thang, bad un theh ïa ka snam jong u ha trai ka duwan ka jingkñia ainguh thang.

²⁶ Bad un thang ïa ka khleiñ jong u baroh halor ka duwan, kumba la thang ïa ka khleiñ jong ka jingkñia bapynïasuk: bad u lyngdoh un pynlong ka jingpynïasuk na ka bynta jong u namar ka pop jong u, ynda kumta, yn map noh ïa u.

²⁷ “ ‘Bad lada mano mano ruh na u paidbah baroh u da leh pop da ka bymtip, da kaba leh ïa kano kano ruh na kita kiba U Trai u la hukum ban ym leh, bad haba u da rem;

²⁸ lada u la ïoh tip ïa la ka pop ïa kaba u la leh, hadien kata, un wan ai ïa la ka jingkñia da ka blang ka bajanai bha, na ka bynta kata ka pop ïa kaba u la leh.

²⁹ Bad un buh ïa la ka kti halor ka khlieh jong kata ka jingkñia namar ka pop, hadien kata, yn pynïap ïa ka jingkñia namar ka pop ha kata ka jaka ha kaba ki ju pynïap ïa ka jingkñia ainguh thang.

³⁰ Bad uta u lyngdoh un shim na ka snam jong ka da la ka shynriah'ti, bad un thoh halor ki reng jong ka duwan ka jingkñia ainguh thang, bad un theh noh ïa ka snam jong ka baroh ha trai ka duwan.

³¹ Bad un weng noh ïa ka khleiñ jong ka baroh, kumba ju weng ïa ka khleiñ na ka jingkñia bapynïasuk; hadien kata, uta u lyngdoh un thang ïa ka halor kata ka duwan, ïa ka ban long ka jingiw baiwbih ha U Trai; bad uta u lyngdoh un pynlong ka jingpynïasuk na ka bynta jong u, ynda kumta, yn map noh ïa u.

³² “ ‘Te lada u wan ai ïa la ka jingkñia namar ka pop da i khun langbrot, ka dei ba un wan ai da i kynthei i bajanai bha.

³³ Bad un buh ïa la ka kti halor ka khlieh kata ka jingkñia namar ka pop, bad un pynïap ïa ka na ka bynta ka pop ha kata ka jaka ha kaba ki ju pynïap ïa ka jingkñia ainguh thang.

³⁴ Bad uta u lyngdoh un shim na ka snam jong kata ka jingkñia namar ka pop, da la ka shynriah'ti, bad un thoh halor ki reng jong kata ka duwan ka jingkñia ainguh thang, bad un theh noh ïa ka snam jong ka baroh ha trai ka duwan.

³⁵ Bad un weng noh ïa ka khleiñ jong ka baroh, kumba ju weng noh ïa ka khleiñ jong ita i khun langbrot ka jingkñia bapynïasuk; bad uta u lyngdoh un thang noh ïa ka halor ka duwan, ïa ka ban long ka jingkñia da ka ding ha U Trai; bad uta u lyngdoh un pynlong ka jingpynïasuk na ka bynta jong u, namar kata ka pop jong u ïa kaba u la leh, ynda kumta, yn map noh ïa u.