LEBITIKOS 2 - KA BAIBL

Ka jingainguh bam

¹ “Haba u briew u ainguh ha U Trai ïa ka jingainguh bam, ka dei ba kata ka jingainguh jong u kan long da u 'purew bani; bad un theh umphniang halor jong u, bad un buh ïa ka jingiwbih ruh halor jong u,

² bad un wallam ïa ka ha ki khun shynrang u Aaron ki lyngdoh: bad un shim nangta shi kham jong u na u 'purew bani jong ka, bad na ka umphniang jong ka, bad ïa ka jingiwbih jong ka baroh; bad u lyngdoh un thang ïa ka jingpynkynmaw jong ka halor ka duwan, ïa ka ban long ka jingainguh da ka ding, ka jingiw baiwbih keiñ ïa U Trai.

³ Te kaba dang sah na kata ka jingainguh bam kan long ka jong u Aaron bad ka jong ki khun shynrang jong u: ka long kaba la kyntang tam eh na ki jingainguh jong U Trai kaba da ka ding.

⁴ “Bad haba me ainguh da ka jingainguh bam ba la shet ha dpei, te kan long keiñ da ki kpu bakhlem thiat kiba da u 'purew bani, ba la khleh da ka umphniang, lane ki 'pu stang bakhlem thiat ba la suit umphniang ïa ki.

⁵ Bad lada ka jingainguh jong me kan long ka jingainguh bam ha ka nar sdieh, to kan long da u 'purew bani ba la khleh bad ka umphniang, bakhlem thiat;

⁶ to men ot dkhot ïa ka, bad to theh umphniang halor jong ka: ka long ka jingainguh bam.

⁷ Bad lada ka jingainguh jong me kan long ka jingainguh ban bam halor ka karai, to ai ban thaw ïa ka da u 'purew bani bad ka umphniang.

⁸ Bad to wallam ha U Trai ïa kata ka jingainguh bam ba la thaw da kine kiei kiei: bad ynda la lah wallam ïa ka ha u lyngdoh, u ruh un wallam ïa ka sha ka duwan.

⁹ Bad uta u lyngdoh un kyntiew noh na kata ka jingainguh bam ïa ka jingpynkynmaw jong ka, bad un thang ïa ka halor ka duwan: ka long ka jingainguh da ka ding, ka jingiw baiwbih keiñ ha U Trai.

¹⁰ Te kata kaba dang sah na ka jingainguh bam, kan long ïa u Aaron bad ïa ki khun shynrang jong u: ka long kaba la kyntang tam eh jong ki jingainguh ïa U Trai da ka ding.

¹¹ “Ïa ka jingainguh bam baroh ba phin wallam ha U Trai, yn ym thaw ïa ka da u thiat: naba phin ym thang ïa u thiat, lymne ïa ka ngap, ha kano kano ruh ka jingainguh ïa U Trai kaba da ka ding.

¹² Ïa ka jingainguh ki soh nyngkong phi lah ban ainguh ïa ki ha U Trai: hynrei, yn ym thang ïa ki halor ka duwan kum ka jingainguh ka jingiw baiwbih.

¹³ Ïa ka jingainguh bam jong me baroh ruh, men ber da ka mluh; bad ka mluh ka jutang jong U Blei jong me kan ym duh da lei lei na ka jingainguh bam jong me: ha ki jingkñia ainguh jong me baroh to kñia da ka mluh.

¹⁴ “Bad lada men ainguh ha U Trai ïa ka jingainguh bam ki soh nyngkong jong me, da ki soh Kew ba dang im ba la thang pyrthiew ha ding, ïa u Kew ba la shoh na ka kop kaba dap keiñ, men ainguh ban long ka jingainguh bam ki soh nyngkong jong me.

¹⁵ Bad men theh ka umphniang halor jong ka, bad men buh ka jingiw baiwbih halor jong ka: ka long ka jingainguh bam keiñ.

¹⁶ Bad u lyngdoh un thang ïa ka jingpynkynmaw jong ka, na u Kew jong kaba la shoh, bad na ka umphniang jong ka, lem bad ka jingiwbih jong ka baroh: ka long ka jingainguh da ka ding ha U Trai.