LEBITIKOS 12 - KA BAIBL

Ka jingpynkhuid ïa ki kynthei hadien kaba kha khun

¹ Bad U Trai u la kren ha u Moses, u da ong,

² “To kren ha ki khun Israel, da ong, ‘Lada ka briew ka punkhun, bad ka kha khun shynrang, kan long bymkhuid hynñiew sngi; katba kum ha ki sngi ka jingkyrpang bapoi bnai ïa ka, kan long bymkhuid.

³ Ha ka baphra sngi, ka dei ban ot ïa ka doh sher jong u.

⁴ Bad kan sah kumta ha ka snam ka jingpynkhuid jong ka, laiphew lai sngi; kan ym ktah ruh ïa kaei kaei kaba la kyntang, lymne wan bsut hapoh ka jaka kyntang, haduh ban da dep ki sngi ka jingpynkhuid jong ka.

⁵ Hynrei, lada ka kha da ka khun kynthei, ka dei ba kan sah bymkhuid, ar taïew, kum ha ka por ka jingpynkyrpang bnai jong ka: bad kan sah hynriewphew hynriew sngi ha kata ka snam ka jingpynkhuid jong ka.

⁶ “ ‘Bad ynda la pyndep ïa ki sngi ka jingpynkhuid jong ka, namar u khun shynrang, lane ka khun kynthei, to kan wallam u khun langbrot uba shi snem, ïa ka ban long ka jingkñia ainguh thang, bad i khun paro, lane ka lyngdkhur, ïa ka ban long ka jingkñia namar ka pop, ha u lyngdoh, ha ka jingkhang Ka Tabernakl ka jingïaseng:

⁷ bad uta un kñia ainguh ïa kata ha khmat U Trai, bad un pynlong ka jingpynïasuk na ka bynta jong ka; kumta kan long ba la pynkhuid na ka jingur ka met jong ka. Kane ka long ka hukum ïa kata kaba la kha khun shynrang lane kynthei.

⁸ Hynrei, lada ka kti jong ka kam lah kot haduh i khun langbrot, kan wallam da ar tylli ki lyngdkhur, lane ar tylli ki khun paro; kawei ban long ka jingkñia ainguh thang, bad kawei pat ïa ka ban long ka jingkñia namar ka pop: bad u lyngdoh un pynlong ka jingpynïasuk na ka bynta jong ka, ka ruh kan long khuid.’ ”